UDUTERONOMI 14 - IsiNdebele 2012 Translation

Imiyalo yokuhlambulukileko nokusilapheleko

¹ Nina nibantwana bakaSomnini uZimenu, ngalokho ningazirhayi namkha nizigude ehloko ngebanga labahlongakeleko.

² Nina nisisizwe esicwengileko kuSomnini uZimenu begodu uSomnini unikhethe phakathi kwabo boke abantu abasebusweni bephasi kobana nibe ngebakhe.

³ Ningagomi litho elinyenyisako.

⁴ Nanzi iinlwana enizazigoma: ikomo, imvu, imbuzi,

⁵ imihlobo yehlangumataka, yeentsephe neyeenkukhama kanye nembuzi yommango,

⁶ okutjho zoke iinlwana ezihlukanisa iinqatha kabili bezetjise.

⁷ Kodwana ezihlukanisa iinqatha kabili kwaphela namkha ezetjisa kwaphela ningazigomi. Ikamela, umqasa nembila ziyetjisa kodwana azihlukanisi iinqatha kabili, ngalokho zisilaphele kini.

⁸ Iwotji nayo ningayigomi ngombana ihlukanisa iinqatha kabili kodwana ayetjisi; isilaphele kini. Ningasithinti isidumbu sayo.

⁹ Kizo zoke eziphila ngemanzini gomani lezi: zoke ezineengwedlo neempepha;

¹⁰ koke okunganangwedlo neempepha ningakugomi. Lokho kusilaphele kini.

¹¹ Ningagoma zoke iinyoni ezihlambulukileko.

¹² Kodwana lezi, ngilezo eningakafaneli ukuzigoma: yoke imihlobo yamadlanga;

^13-18 imihlobo yabokholo, yoke imihlobo yamagubulu, iinciliba, yoke imihlobo yeenrhulurhulu, yoke imihlobo yamakhozi, abotlhame, amalanda, abonogolantethe, imihlobo yabodoyi, amagqovu nabonomaphelaphelana.

¹⁹ Zoke iinunwana ezineempiko zisilaphele kini, ningazigomi.

²⁰ Zoke iinunwana ezihlambulukileko zona ningazigoma.

²¹ Ningagomi ingcuba; inikeleni abatjhili abasemadorobhenenu kobana bazigomele yona. Nakungasinjalo niyithengisele imiqhamuka. Khumbulani bona nina nisisizwe esicwengileko kuSomnini uZimenu. Ningapheki imbuzana ngebisi lakanina.

Ukukhutjhwa kokwetjhumi

²² Nikhuphe kwetjhumi kwakho koke enikutjeleko enikuvuna minyaka yoke.

²³ Thathani kwetjhumi kwenu kwekoroyi, iwayini namafutha we-oliva kanye namazibulo weenkomo, wezimvu neweembuzi zenu nikugomele phambi kwakaSomnini uZimenu endaweni azayikhetha kobana ajamise ibizo lakhe lapho. Ngaleyondlela nizakufunda ukwesaba uSomnini uZimenu soke isikhathi.

²⁴ Nakube ibanga lide khulu kini kobana ningafika endaweni uSomnini uZimenu ayikhethileko bona ajamise ibizo lakhe lapho bese nibhalelwa kuletha kwetjhumi lokha uSomnini uZimenu nanibusisako,

²⁵ khona nizayenana ngesiliva. Niyitjhubelele, nikhuphukele endaweni uSomnini uZimenu ayikhethileko leyo,

²⁶ bese niyigomele lapho ngokuthenga namkha yini eniyithandako, iinkomo, izimvu, iwayini namkha utjwala, nanyana yini eniyikhanukelako. Nibethe esimonyongwana lapho phambi kwakaSomnini uZimenu, nijekezele nina nemindenenu.

²⁷ Ningahlanuki amaLevi ahlala emadorobhenenu ngombana akanasabelo namkha ilifa phakathi kwenu.

²⁸ Njalo ekupheleni kweminyaka emithathu nilethe koke kwetjhumi kwemikhiqizo yenu ngawo lowo mnyaka, nikukghubelele emadorobhenenu.

²⁹ AmaLevi anganasabelo nelifa phakathi kwenu, iinkhonzi kanye neentandani nabahlolokazi abasemadorobhenenu beze bazogoma babethe esimonyongwana. Ngaleyondlela uSomnini uZimenu uzanibusisa kiwo woke umsebenzi wezandla zenu eniwenzako.