UDUTERONOMI 13 - IsiNdebele 2012 Translation

Ukuyalwa kwama-Israyeli bona angalotjhi abosingazimu

¹ Kungenzeka bonyana kuvuke umphorofidi phakathi kwenu, namkha umbhudangi wamabhudango anibonise itshwayo namkha isimangaliso

² bese itshwayelo namkha isimangalisweso siyenzeka begodu ngemva kwalokho athi: “Asilandeleni abozinyana sibalotjhe.” Nakube labo bozinyana, akusinguZimu enimaziko,

³ ningalaleli amezwi womphorofidi namkha wombhudangi loyo ngombana uSomnini uZimenu uyanizizinya ukubona bonyana nimkhathalela ngeenhliziyo zenu zoke nangomphefumulwenu woke na.

⁴ Nizakulandela uSomnini uZimenu kwaphela benimesabe, nilonde imiyalwakhe, nilalele ilizwi lakhe, nimlotjhe benikakarele kuye kwaphela.

⁵ Kodwana umphorofidi namkha umbhudangi wamabhudango loyo akabulawe ngombana unihlohlozele bona nihlubuke uSomnini uZimenu owanikhupha enarheni yeGibhide wanihlenga ekumbeni yobukhoboka. Uniyenge bona nisuke endleleni uSomnini uZimenu aniyala bona nikhambe ngayo. Ngalokho thanyelani ubumbi phakathi kwenu.

⁶ Nakube umfowenu, indodana kanyoko namkha indodanakho nanyana indodakazakho namkha umfazakho oyintandokazi namkha umnganakho enimamathe nelimu, ukuyenga ngasese athi: “Namba siyokulotjha abozinyana.” Nakube labo bozinyana, akusinguZimu omaziko wena ngitjho naboyihlomkhulu

⁷ kodwana khibe ngomunye wabosingazimu babantu abanibhodileko nanyana bangaba seduze namkha kude nani, ukusuka egumbini lomhlaba ukuya kelinye,

⁸ ungaphiki naye, ungamlaleli begodu ungamtlhuweli, ungamzweli namkha umfihle.

⁹ Umbulale nya! Isandla sakho asibe ngesokuthoma bese kulandele zabo boke abanye abantu.

¹⁰ Mkhandeni ngamatje abe afe ngombana ufune ukukuyenga kobana usuke kuSomnini uZimakho owakukhupha enarheni yeGibhide, ekumbeni yobukhoboka.

¹¹ Woke u-Israyeli uzakuzwa, esabe, angasenza ubuhlola obunjengalobo obenzeke phakathi kwenu.

¹² Kungenzeka bonyana kelinye lamadorobhenu uSomnini uZimenu aninikela wona bona nihlale kiwo,

¹³ kunabaphehli benturhu abaphuma bayokuyenga abahlali bedorobhabo bathi: “Nambani siyokulotjha abozinyana.” Nakube labo bozinyana, akusinguZimu enimaziko

¹⁴ khona-ke nizakubuzisisa bese niyafunisisa nikhambe nibuza ngokuzimisela. Nakube ngambala nifunyana bona isinyenyisweso senzekile phakathi kwenu,

¹⁵ bulalani nya abahlali bedorobhelo ngesabula, nirhayile ngokupheleleko loke idorobhelo nakho koke okukilo, ngitjho nefuyo yakhona yoke, niyibhubhise ngesabula.

¹⁶ Buthelelani ipango yakhona niyibeke ekabeni yetatawu ledorobho, nitjhise idorobho nayo yoke ipangwalo njengomnikelo otjhiswa woke kuSomnini uZimenu. Idorobhelo lihlale liliqubi njalo lingabe lisakhiwa godu.

¹⁷ Ningababaleli izinto ekufanele zirhayilwe ukuze uSomnini atjhuguluke ekuthukutheleni kwakhe. Uzakuba nomusa kini, anandise njengombana afunga kiboyihlomkhulu

¹⁸ nakube nilalela ilizwi lakaSomnini uZimenu, nigcine yoke imiyalwakhe enginiyale ngayo namhlanje, nenze okuhle phambi kwakhe.