UDUTERONOMI 12 - IsiNdebele 2012 Translation

Indawo kanye nendlela efaneleko yokulotjha uSomnini

¹ Nanzi iimiso nemithetho enizayenza ngokutjheja enarheni uSomnini uZimu waboyihlomkhulu aninikele yona kobana niyithumbe, imihla yoke yokuphila kwenu endaweni leyo.

² Nitjhabalalise ngokupheleleko zoke iindawo lapha izizwe enizoziqotjha zilotjhela khona abosingazimu bazo eentabeni eziphakemeko, phezu kwemibundu nangaphasi komunye nomunye umuthi ohlaza.

³ Nizakubhuruza ama-aldarazo, niphadlhe namatjazo akhethekileko. Godu tjhisani imifanekiswazo yabo-Atjhera, nikghunule iinthombembazwa zabosingazimu bazo. Iye, nitjhabalalise ibizo labosingazimabo endaweni leyo.

⁴ Ningalotjhi uSomnini uZimenu ngendlela izizwezo zilotjha abosingazimu bazo ngayo,

⁵ kodwana akube sendaweni ezakukhethwa nguSomnini uZimenu hlangana kwazo zoke iinkoro zenu, kobana ijamise ibizo layo lapho belidunyiswe khonapho. Lapho kulapha nizakuza khona bona nibuze intando kaZimu,

⁶ nilethe lapho imihlabelwenu yokutjhiswa neyetjhebiswano, kwetjhumi neminikelwenu ekhethekileko, iminikelwenu yeenthembiso neyesihle, namazibulo weenkomo, wezimvu neweembuzi zenu.

⁷ Nigome khonapho phambi kwakaSomnini uZimenu, nijekezele, nina nemindenenu, ngayo yoke imisebenzi yezandla zenu uSomnini uZimenu anibusisa ngayo.

⁸ Ningenzi njengombana senza lapha namhlanje, lapha omunye nomunye azenzela khona umathanda.

⁹ Njenganje, anikabi ukungena enarheni yelifa lapha uSomnini uZimenu azaninikela khona ukuphumula.

¹⁰ Kodwana lokha naniyama iJordani, nihlale enarheni uSomnini uZimenu aninikela yona bona niyithumbe, nalokha aninikela ukuphumula ezitheni zenu zoke zombelele ukuze nihlale niphephile,

¹¹ nasele nazi indawo uSomnini uZimenu ayikhethileko kobana ibizo lakhe lijanyiswe lapho, khona-ke nizakuletha koke enginiyale ngakho: imihlabelwenu yokutjhiswa neyetjhebiswano, kwetjhumi kwenu neminikelo ekhethekileko, nayo yoke imihlabelo yeenthembiso enayithembisa kuSomnini.

¹² Nijekezele phambi kwakaSomnini uZimenu, nina, amadodana namadodakazenu, iinceku neencekukazi zenu kanye namaLevi asemadorobhenenu ngombana wona akanasabelo namkha ilifa phakathi kwenu.

¹³ Yelelani bonyana ninganikeli imihlabelwenu yokutjhiswa phezu kwanamkha ngiyiphi indawo eniyibonako,

¹⁴ kodwana akube sendaweni ekhethwe nguSomnini kenye yeenkoro zenu kwaphela. Lapho-ke nizanikela khona imihlabelwenu yokutjhiswa benenze khonapho koke enginiyala ngakho.

¹⁵ Nokho ningahlaba benigome inyama kinamkha ngiyiphi yamadorobhenu, kube ngendlela enithanda ngayo, kuye ngeembusiso eniziphiwe nguSomnini uZimenu, ongakahlambuluki nohlambulukileko angagoma inyama leyo njengombana benizakwenza nakugonywa itsephe nehlangumataka.

¹⁶ Kodwana ningagomi iingazi, nizithululele equlwanini njengamanzi.

¹⁷ Ningalingi nigomele ngemadorobhenenu kwetjhumi kwesivuno senu sekoroyi, sewayini kanye nesamafutha we-oliva, namkha amazibulo weenkomo zenu namkha wezimvu neembuzi namkha omunye nomunye umnikelo wenu weenthembiso enawuthembisako namkha iminikelo yesihle namkha iminikelo ekhethekileko.

¹⁸ Gomelani koke lokho phambi kwakaSomnini uZimenu endaweni ezakukhethwa nguSomnini uZimenu, nina namadodana namadodakazenu, iinceku neencekukazi zenu kanye namaLevi ahlala emadorobhenenu. Nijekezele phambi kwakaSomnini uZimenu ngayo yoke imisebenzi yezandla zenu.

¹⁹ Tjhejani bona ningahlanuki amaLevi qobe nisahlala eendaweni zenu.

^20-21 Lokha uSomnini uZimenu andisa imikhawulwenu njengombana anithembisile, indawo ayikhethileko kobana ajamise ibizo lakhe lapho, ingahle ibe kude nani. Nakube kunjalo bese nikhanukela inyama khulu, khona-ke ningayigoma ngesikhathi soke eniyikhanuka ngaso. Ningahlaba nanyana ngiyiphi yeenkomo, yezimvu namkha yeembuzi zenu eniziphiwe nguSomnini. Nigomele inyama leyo ngemadorobhenenu njengombana nginiyalile kube ngendlela nifuna ngayo.

²² Ningayigoma njengombana kugonywa itsephe nehlangumataka. Woke umuntu, ohlambulukileko nongakahlambuluki angagoma.

²³ Kwaphela qinisekisani bona ningagomi iingazi ngombana zikuphila, yeke ningagomi ipilo nenyama.

²⁴ Ningagomi iingazi kodwana zithululeleni equlwanini njengamanzi.

²⁵ Naningagomi iingazi nenza kuhle phambi kwakaSomnini, yeke koke kuzanikhambela kuhle nina neenzukulwana zenu.

²⁶ Kodwana iminikelo ekhethekileko eninayo, neminikelwenu yesithembiso nizayithatha niye nayo endaweni ekhethwe nguSomnini.

²⁷ Nikelani inyama neengazi zemihlabelwenu yokutjhiswa e-aldarini lakaSomnini uZimenu. Iingazi zeminikelwenu yetjhebiswano nizithululele e-aldarini lakaSomnini, kodwana inyama yona ningayigoma.

²⁸ Tjhejani ukwenza woke amezwi enginiyala ngawo ukuze koke kunikhambele kuhle, nina neenzukulwana zenu nini nanini ngombana nizabe nenza okuhle nokulungileko phambi kwakaSomnini uZimenu.

²⁹ Lokha uSomnini uZimenu nakabhubhisa izizwe eziphambi kwenu eniyokungena nithumbe inarhazo benihlale kiyo,

³⁰ tjhejani kobana ningathi ngemva kobana sezibhujisiwe, nilandele imikhubazo. Nizakubambeka esifwini lokha nanikhamba nibuza ngabosingazimu bazo nithi: “Izizwezi bezilotjha njani abosingazimu bazo? Nathi sifuna ukwenza njengazo nasilotjha uSomnini.”

³¹ Ningenzi njalo kuSomnini uZimenu ngombana izizwezo zenze kibosingazimu bazo isinyenyiso uSomnini asizondako! Zathuwelela kangangobana zabe zatjhisa amadodana namadodakazazo ngomlilo njengomnikelo kibosingazimu bazo.

³² Tjhejani ukuphetha elinye nelinye ilizwi enginiyale ngalo; ningangezeleli namkha niphungule kilo.