UDUTERONOMI 11 - IsiNdebele 2012 Translation

¹ Ngalokho khathalelani uSomnini uZimenu, nigcine iimfanelo zakhe, okutjho iimiso zakhe, imithethwakhe, kanye nemiyalwakhe ngaso soke isikhathi.

² Yazini-ke namhlanje bona abantwabenu abazi begodu azange babone ukukhalima kwakaSomnini uZimenu, kodwana nina niyabazi ubukhulu bakhe, isandla sakhe esinamandla kanye nesiphanga sakhe.

³ Iye, niyawazi amatshwayo kanye nezenzo zakhe azenza ekabeni yeGibhide kuFaro ikosi yakhona nenarhenakhe yoke;

⁴ nalokho akwenza ebuthweni leGibhide, eenjomaneni neenkaraneni zalo lokha nagubuzesa ibuthwelo ngamanzi welwandle lomGaba nalinigijimisako nangendlela uSomnini alibhubhisa nya ngayo njengombana nazi namhlanje.

⁵ Niyakwazi okwenziwa nguSomnini kini naniserhalawumbeni kufikela lapha nifika khona endaweni le,

⁶ nokobana yenzani kuDatani no-Abiramu amadodana ka-Eliyabu umsa kaRubeni lokha iphasi livula umlomalo bonyana libaginye nemindenabo, amatendabo nakho koke okuphilako okwabalandelako, phakathi kwawo woke ama-Israyeli.

⁷ Njengombana amehlwenu abone yoke imisebenzi emikhulu uSomnini ayenzileko,

⁸ gcinani yoke imiyalo enginiyala ngayo namhlanje. Qinani idolo, ningene nithumbe inarha eniyamela kiyo ukuyithatha bona ibe ngeyenu

⁹ ukuze niphile isikhathi eside endaweni uSomnini ayifungela kiboyihlomkhulu bona uzabanikela yona kanye neenzukulwana zabo. Leyo-ke yinarha egeleza ibisi neliju.

¹⁰ Ngambala, inarha eningena kiyo kobana niyithumbe ayifani neGibhide eniphuma kiyo, lapha benitjala khona imbewenu kwanga sivande semirorho, niyisezela ngokumodza edakeni;

¹¹ kodwana inarha eningena kiyo kobana niyithumbe yinarha yeentaba nemirhoba esezelwa lizulu emkayini.

¹² Kuyinarha etjhejwa nguSomnini uZimenu, amehlwakhe ahlala akiyo ukusuka ekuthomeni komnyaka bekube sekupheleni kwawo.

¹³ Nakube ngambala nizakulalela imiyalo kaSomnini enginiyala ngayo namhlanje, ukobana nikhathalele uSomnini uZimenu, nimlotjhe ngeenhliziyo zenu zoke nangemiphefumulwenu yoke,

¹⁴ yena wathembisa bonyana uzakunisa izulu enarhenenu ngesikhathi esifaneleko: izulu lokuthoma nelamuva. Nizakubulunga ikoroyi, iwayini namafuthenu we-oliva;

¹⁵ godu uSomnini uzakumilisa utjani emirhulenenu kobana ifuywenu ikarule, nina nigome nisuthe.

¹⁶ Ziyeleleni ningayengwa bese niyaphambuka nilotjhe abosingazimu benibakhothamele

¹⁷ ngombana itukuthelo kaSomnini izakuvutha phezu kwenu, ivale amazulu ukuze izulu lingasana, inarha ingasakhiqiza ukudla bese nibhubha masinyana enarheni ehle uSomnini aninikele yona.

¹⁸ Ngalokho bekani amezwami la eenhliziyweni zenu nemiphefumulwenenu; niwabophelele abe njengenyongo ezandleni zenu nanjengomkhala eenhloko zenu abe sikhumbuzo.

¹⁹ Niwafundise abantwabenu, nikhulume ngawo naniditjhileko emizinenu, nanikhambako endleleni, nanilalako nalokha nanivukako.

²⁰ Niwatlole eengosenini zeenkumba zenu nemasangwenenu

²¹ ukuze amalangenu newabantwabenu ande endaweni uSomnini ayifungela kiboyihlomkhulu ukubanikela yona ikani kusaphilwa.

²² Naniwulonda ngokupheleleko woke umyalo enginiyala bona niwenze, nikhathalele uSomnini uZimenu, nikhambe eendleleni zakhe zoke benikakarele kuye,

²³ khona-ke uSomnini uzokuqotjha zoke izizwezi phambi kwenu, nina niphange izizwe ezikulwezo nezinamandla kunani.

²⁴ Yoke indawo lapha inyawo lenu ligadanga khona izakuba ngeyenu; umkhawulwenu uzakuthoma erhalawumbeni ngesewula uphelele eLibhanoni ngetlhagwini begodu usuke emlanjeni iYufrathe ngepumalanga ukuya elwandle elingetjingalanga.

²⁵ Akunamuntu ozakghona ukujamelana nani; uSomnini uZimenu uzakubeka ukwesabeka nevalo lenu phezu kwayo yoke inarha enibeka kiyo inyawo lenu njengombana anithembisa.

²⁶ Qalani, ngibeka namhlanje phambi kwenu isibusiso namanikelela:

²⁷ isibusiso, nakube nilalela imiyalo kaSomnini uZimenu enginiyala ngayo namhlanje;

²⁸ amanikelela, naningalaleli imiyalo kaSomnini uZimenu, niphambuke endleleni enginiyale ngayo namhlanje, kobana nidlhemadlheme ngemva kwabosingazimu beendawezi.

²⁹ Lokha uSomnini uZimenu aniletha enarheni eningena kiyo kobana niyithumbe, nizakubeka isibusiso entabeni iGerizimu nibeke amanikelela entabeni i-Ebali.

³⁰ (Iintabezi zingaphetjheya kweJordani ngetjingalanga, zifulathele indlela eya ngetjingalanga, enarheni yamaKanana ahlala emrhobeni weJordani. Iintabezi zingaphetjheya kweGiligali eduze nemithi emikhulu yeMore. )

³¹ Lokha naniyama iJordani kobana ningene nithumbe inarha uSomnini uZimenu aninikela yona nalokha naniyithathako benihlale kiyo,

³² tjhejani bona nenza zoke iimiso nemithetho engininikela yona namhlanje.