UDUTERONOMI 10 - IsiNdebele 2012 Translation

¹ Ngesikhatheso uSomnini wathi kimi: “Baza imiqebethu emibili ifane neyokuthoma ukhuphukele kimi entabeni bese wenze umfaji weengodo.

² Ngizotlola kiyo amezwi agade akeyokuthoma owayephulako bese uyifaka ngemfajini.”

³ Yeke ngenza umfaji ngeengodo zomtholo, ngabaza imiqebethu emibili njengeyokuthoma, ngakhuphukela entabeni ngiphethe imiqebethu emibili leyo.

⁴ USomnini watlola emiqebethwinapho njengekuthomeni: imithetho elitjhumi akhuluma ngayo kini entabeni aphakathi komlilo ngelanga lomhlangano, wanginikela yona.

⁵ Ngasuka entabeni ngehlela phasi, ngabeka imiqebethu ngemfajini engangiwenzile, naso-ke imiqebethu leyo njengombana uSomnini angiyala.

⁶ (Ama-Israyeli gade afuduke emithonjeni yeBheni-Jakhani aya eMosera. U-Aroni wahlongakala bewabulungelwa lapho. Indodanakhe u-Elazara yalotjha njengomphristi esikhundleni sakhe.

⁷ Ekufudukeni kwama-Israyeli lapho, anqomba eGudigoda, asuka eGudigoda aya eJothibata inarha enemilanjana.

⁸ Ngesikhatheso uSomnini wahlukanisela ikoro yakwaLevi kobana ithwale umfaji wesivumelwano sakhe nokobana ibe ziinceku zakhe ukuze ilotjhe uSomnini beyibusise ebizweni lakhe njengombana kunjalo nanamhlanje.

⁹ Ngalokho amaLevi akanasabelo namkha ilifa kubafowawo, ilifa lawo nguSomnini njengombana uSomnini atjho njalo kiwo.)

¹⁰ Ngahlala entabeni njengekuthomeni, kwaba malanga amatjhumi amane nobusuku bakhona. Nalapha uSomnini wangilalela, wangathanda ukunirhayila.

¹¹ Nje-ke uSomnini wathi kimi: “Sikima uthathe ikhambo lakho urhole abantu ukuze bangene bathumbe inarha engayifungela kiboyihlomkhulu kobana ngizabanikela yona.”

Umyalo wokuthanda nokulalela uSomnini

¹² Alo-ke wena Israyeli, yini efunwa nguSomnini uZimakho ngaphandle kobana wesabe uSomnini uZimakho, ukhambe eendleleni zakhe zoke, uthembeke kuye, umlotjhe ngehliziywakho yoke nangomphefumulwakho woke,

¹³ ugcine imiyalo neemiso zakaSomnini engikuyala ngazo namhlanje kobana izinto zikukhambele kuhle.

¹⁴ Nanyana izulu, iye izulu lamazulu lingelakaSomnini uZimenu nephasi nakho koke okukilo

¹⁵ khonapho uSomnini bekasoloko abeke ihliziywakhe kiboyihlomkhulu bewakhetha iinzukulwana zabo, okutjho nina, phakathi kwezizwe zoke njengombana kunjalo namhlanje.

¹⁶ Ngalokho sokani amajwabu weenhliziyo zenu, ningasabi nekani.

¹⁷ USomnini uZimenu unguZimu ongaphezu kwabozinyana, yiKosi yamakhosi, uZimu omkhulu, onamandla nosabekako, ongenzi izinto ngokukhetha ibala nongafunjathiswako.

¹⁸ Iye, uSomnini ujamela intandani nomhlolokazi, uthanda isikhonzi, ubapha ukugoma nokokwembatha.

¹⁹ Ngalokho thandani isikhonzi ngombana nani gade niziinkhonzi enarheni yeGibhide.

²⁰ Nesabe uSomnini uZimenu, nimlotjhe beninamathele kuye, nifunge ngebizo lakhe.

²¹ Uyindumiswenu, unguZimenu onenzele izinto ezikulu nezethusakwezo enizibone ngamehlwenu.

²² Aboyihlomkhulu behlela eGibhide bamatjhumi alikhomba wabantu. Nje-ke gadesi uSomnini uZimenu unenze naba banengi njengeenkwekwezi zomkayi.