UDANYELA 8 - IsiNdebele 2012 Translation

Umbono kaDanyela weqama nepongo

¹ Ngomnyaka wesithathu wokubusa kwekosi uBhelitjhatsari, mina Danyela ngabona umbono emva kwalowo ebengiwubone ekuthomeni.

² Embonweni lowo ngazibona ngiseTjhutjhani, ihlokodorobho esesifundeni se-Elamu. Nje-ke embonwenapho bengizibona ngiseqadi komsele i-Ulayi.

³ Ngaphakamisa amehlo, qala nanto iqama lijame magegana nomsele. Belineempondo ezimbili ebeziphakamile kodwana elinye lilide kunelinye. Elide lelo bekungilo elimile muva.

⁴ Ngabona iqama lelo lijokolela ngetjingalanga, ngetlhagwini nangesewula. Bekunganasibandana ebesingajama phambi kwalo begodu kungekho ekugade kungasinda emandlenalo. Belizenzela umathanda begodu linamandla.

⁵ Kuthe ngisacabanga njalo, qala kwavela ipongo ngetjingalanga ivundla iphasi loke, ngaphandle kokuthinta phasi. Beyinephondo eliveleleko hlangana namehlwayo.

⁶ Yona yeza eqameni ebelineempondo ezimbili engalibona lijame magegana nomsele, yalithelekela ngokubila kweengazi.

⁷ Ngayibona ukuza kwayo eqamenelo kobana ifutheke khulu, yaliqhula beyephula iimpondo ezimbilezo. Iqamelo belinganamandla wokujama phambi kwayo. Yeke ipongo leyo yalithela phasi yaligadanga. Gade angekho ongasindisa iqamelo emandleni wepongo leyo.

⁸ Nje-ke ipongo leyo yaba namandla khulu. Kuthe lokha nayizizwa amandla, iphondo layo elikhulwelo lephuka. Esikhundleni salo kwamila iimpondo ezine eziveleleko ziqale emimoyeni emine yezulwini.

⁹ Eempondweni ezinezo kwamila iphonjwana elincani, lona-ke lakhula khulu latomulukela nca yangesewula, ngepumalanga nangendaweni ehle khulu.

¹⁰ Lasoloko likhula belafika emkhambathini womkayi, laphosa phasi ezinye zeendalwa ezilapho, okutjho iinkwekwezi, lagadanga phezu kwazo.

¹¹ Ngitjho naphambi kwesiKhulu seendalwa zomkhambathi womkayi laziphakamisa ukuze kususwe umhlabelo wokutjhiswa wangemihla esiKhulwineso nendawaso ecwengileko yabhuruzwa.

¹² Ngebanga leemphambeko, umhlabelo wokutjhiswa wangemihla wajanyiselelwa ngemisebenzi eyonakeleko yokulotjha, nomthetho weqiniso walahlelwa phasi. Laphumelela kikho koke elikwenzako.

¹³ Nje-ke ngezwa ocwengileko akhuluma, godu ngezwa nomunye ocwengileko asithi kimi: “Sizakuba ngangani isikhathi sombono omayelana nomhlabelo wangemihla neemphambeko ezibhubhisako na? Kuzabe kube nini indawo ecwengileko kanye nomsebenzi wokulotjha usilaphazwa na?”

¹⁴ Wangiphendula wathi: “Kuzakuthatha ukuhlwa nokusa okuziinkulungwana ezimbili namakhulu amathathu bese indawo ecwengileko iyahlanjululwa.”

¹⁵ Kuthe sengiwubonile umbono, mina Danyela ngafunisisa bona ngiwuzwisise. Nje-ke qala, phambi kwami kwajama omunye onesibumbeko somuntu.

¹⁶ Ngezwa ilizwi lomuntu ngehla komsele i-Ulayi lirhuwelela lisithi: “Gabhariyela! Yenza bona umuntu loyo azwisise umbono!”

¹⁷ Nje-ke watjhidela eduze nalapha ngijame khona. Sele afikile, ngethuka khulu bengawa ngobuso. Kodwana yena wathi kimi: “Ndodana yomuntu, zwisisa ngombana umbono ungowesikhathi semihla yokuphela.”

¹⁸ Kwathi asakhuluma nami njalo, ngehlelwa mumoya ngilele ngobuso phasi. Kodwana wangithinta, wangisikimisa khonapho.

¹⁹ Wathi: “Qala la, ngizokwazisa lokho okuzokubakhona emihleni yokuphela yesibetho ngombana lokho kusikhathi sokuphela esijanyisiweko.

²⁰ Mayelana neqama owalibonako elineempondo ezimbili, lokho kutjho amakhosi weMediya nePheresiya.

²¹ Ipongo emaruthuruthu iyikosi yeGirisi bese kuthi iphondo elihlangana namehlwayo liyikosi yokuthoma.

²² Mayelana nephondo elephukako kwathi endawenalo kwavela amanye amane, lokho kumibuso emine ezakubakhona ngokuvela esizweni sekosi leyo kodwana angekhe kwaba ngamandlayo.

²³ “Emihleni yokuphela yokubusa kwawo, lokha iimphambeko sele zifike ezingeni elipheleleko, kuzakusikima ikosi enobuso obutjhibileko nenamano wobuqili.

²⁴ Izakuba namandla amakhulu, kodwana ekungasiwo wayo. Izakubanga ihlekelele engazange kheyibonwe begodu izakuphumelela kikho koke ekwenzako. Izakubhubhisa abanamandla nesizwe nabacwengileko.

²⁵ Ngobuqili bayo izakwenza bonyana ukukhwabanisa kuvame. Engqondwenayo izazibona iyikulu begodu izakwenza abanengi bonakale bangakatjheji. Izakujamelana ngitjho nesiKhulu seenkhulu kodwana izakuphohlozwa ngaphandle kwesandla somuntu.

²⁶ “Umbono wobusuku nokusa otjelwe wona uliqiniso. Kodwana wena vala umbono ngokuwugiba ngombana ungowamalanga amanengi kusukela nje.”

²⁷ Mina Danyela, bengiqobekile begodu bengigula amalangana. Emva kwalapho ngavuka ngaragela phambili nomsebenzi wekosi. Bengisamangele ngombono kodwana akakho owakuyelelako lokho.