UDANYELA 7 - IsiNdebele 2012 Translation

Ibhudango lakaDanyela

¹ Ngomnyaka wokuthoma wokubusa kwakaBhelitjhatsari ikosi yeBhabheli, kwafika engqondweni kaDanyela ibhudango nombono alele emkghadinakhe. Nje-ke watlola ibhudangwelo phasi, wakhuluma iinhloko zalo kwaphela.

² Nje-ke uDanyela wathi: “Qala ngabona embonwenami ebusuku imimoya emine yezulwini iphehla ilwandle elikhulu.

³ Kwabonakala iimbandana ezine ezikulu ziphuma ngelwandle, esinye sehlukile kesinye.

⁴ Sokuthoma besifana nebhubezi kodwana sineempiko zekhozi. Kwathi ngisaqalile njalo, iimpiko zaso zahluthwa, sasikinyiswa ehlabathini sajanyiswa ngeenyawo ezimbili njengomuntu besaphiwa ingqondo yomuntu.

⁵ Qala-ke, esinye isibandana sesibili, besinjengebhere. Sona saphakamisa iinyawo siphethe iimbambo ezintathu hlangana namazinywaso. Kwathiwa kiso, ‘Sikima, udle inyama enengi!’

⁶ “Emva kwalokho ngathi ngiyaqala, ngabona esinye isibandana esinjengengwe, sineempiko ezine zenyoni emhlanaso. Isibandanesi besineenhloko ezine begodu saphiwa ukubusa.

⁷ “Emva kwalapho, qala ngabona ngombono ebusuku isibandana sesine esethusako, sitjhibile begodu sinamandla khulu. Besineengevula zamazinyo wesimbi, sirhiribidele ngokuphohloza bese kuthi okuseleko sikufihlize ngeenyawo. Sona-ke besehlukile kunaleza zokuthoma begodu besineempondo ezilitjhumi.

⁸ Ngithe ngisadlumbana ngeempondwezo, qala kwamila phakathi kwazo elinye godu iphondo elincani, lajamiselela zokuthoma ezintathu. Ephondwenapho bekunamehlo anjengowomuntu kanye nomlonyana okhuluma ukuzazi.

⁹ “Ngathi ngisaqalile njalo, “kwabekwa iinhlalo zobukhosi; kwathi oMdala weminyaka wahlala esihlalweni sakhe. Izambatho zakhe bezimhlophe njengeliqhwa neenhluthu zakhe zinjengoboya obucwebileko. Isihlalo sakhe sirubha amalangabi, amavili waso amlilo ovuthako.

¹⁰ Kwehla amalangabi avela phambi kwakhe; bekaphahlwe ziinkulungwana ngeenkulungwana, iye, amatjhumitjhumi weenkulungwana bekajame phambi kwakhe. Abagwebi bahlala ebandla, kwavulwa iincwadi.

¹¹ “Ngaragela phambili ngaqala ngebanga letjhada lamezwi wokuzikhakhazisa kwephonjwanelo. Ngisaqalile njalo, isibandaneso sabulawa: Umzimbaso wabhujiswa bewaphoselwa emlilweni.

¹² Ezinye iimbandana zemukwa umbuswazo, kodwana ipilwazo yelulwa isikhathi phezu kwesikhathi.

¹³ “Emibonweni yebusuku leyo ngabona: “Qala, emafini wezulu kwehla ofana nendodana yomuntu; waya koMdala weminyaka wafese wethulwa phambi kwakhe.

¹⁴ Waphiwa ukubusa, iphazimulo nombuso, ukuze boke abantu, amalimi nezizwe zimlotjhe. Umbuswakhe ngewanini nanini begodu angeze wadlula nobukhosi bakhe bubukhosi obungeze babhujiswa.

¹⁵ “Nje-ke mina Danyela, ummoyami bewuwurubajekile nemibono emicabangwenami yangethusa.

¹⁶ Ngaya komunye wabagade bajame lapho, ngambuza bona eqinisweni izintwezi zitjho ukuthini. Nje-ke wangitjela, wangazisa ihlathululo yalokho ezikutjhoko, wathi,

¹⁷ ‘Iimbandana ezine ezikulu zimakhosi amane azakuvela ephasini.

¹⁸ Kodwana abacwengileko bongoPhezulu, bazakwamukeliswa umbuso bebawuthathe isiphelani kube nini nanini.’

¹⁹ “Nje-ke ngathanda ukwazisisa kuhle mayelana nesibandana sesine ebegade sehlukile kunezinye; sethusa kokwethusa, sinamazinyo wesimbi neenzipho zekoporo; iye, leso ebesirhiribidele ngokuphohloza bese kuthi okuseleko sikufihlize ngeenyawo.

²⁰ Godu ngabuza nangeempondo ezilitjhumi ehloko yaso nangalelo elamilako kwase kuthi ezinye iimpondo ezintathu zasuswa phambi kwalo, okutjho iphondo ebelinamehlo nomlomo okhuluma ukuzazi begodu livelele kunezinye.

²¹ Iye, lelo ekwathi ngisaliqalile, laphehla ipi kabacwengileko ladlondlobala ngehla kwabo,

²² bekwaba kulapha kufika khona oMdala weminyaka, wamela abacwengileko bongoPhezulu, bekwafika isikhathi lapha abacwengileko bamukela khona umbuso.

²³ “Nje-ke yena wangiphendula wathi, “ ‘Isibandana sesine sitjho bona kuzakuba nombuso wesine; wona uzakwehluka kuneminye imibuso begodu uzakurhiribidela loke iphasi, ugadange phezu kwalo bewuliqobaqobe iinquqwana.

²⁴ Nakuziimpondo ezilitjhumi zona, zitjho bona embusweni lowo, kuzakuvela amakhosi alitjhumi. Nje-ke enye izakuvela emva kwawo, yona izakwehluka kunamanye wokuthoma begodu izakumadlha phasi amakhosi amathathu.

²⁵ Izakukhuluma amezwi ajamelene nongoPhezulu, ikhathaze abacwengileko bongoPhezulu begodu izakucabanga ukutjhugulula iinkhathi nomthetho, babe sesandleni sayo isikhathi, iinkhathi ezimbili nesiquntu.

²⁶ Kodwana abagwebi bazakuhlala ebandla bagwebe: Umbuswayo uzakususwa uthathwe, uqothulwe bewubhujiswe bekube sekupheleni.

²⁷ Nje-ke umbuso nobukhosi, ubukhulu bemibuso engaphasi kwezulu buzakunikelwa abantu abacwengileko bongoPhezulu. Umbuswabo uzakuba ngowesiphelani, yoke imibuso izabalotjha beyibathobele.’

²⁸ “Nakhu-ke ukuphela kwendaba. Nakungimi mina Danyela, imicabangwami beyingethuse khulu nobuso bami buphaphathekile. Kodwana ngalonda indaba leyo ehliziywenami.”