UDANYELA 4 - IsiNdebele 2012 Translation

Incwadi eyathunyelwa nguNebukadinetsari ezizweni

¹ Incwadi le ibuya ekosini uNebukadinetsari iya ebantwini boke, ezizweni nemalimini woke wephasi. Ukuthula akwande kini.

² Kubonakele kukuhle kimi ukunivezela iimbonakaliso neemangaliso uZimu ongoPhezulu azenze kimi.

³ Maye zikulu kangangani iimbonakaliso zakhe! Iye, zinamandla iimangaliso zakhe! Umbuswakhe, mbuso wanini nanini nokubusa kwakhe kungokweenzukulwana ngeenzukulwana.

⁴ Mina Nebukadinetsari, bengizigedlile ngakwami begodu nginepumelelo esigodlweni sami.

⁵ Kodwana ngobusuku obunye ngaba nebhudango elangenza ngoma. Iye, ngisemkghadinami ngabona imibono ebhudangweni neenthunzi engqondweni, zangethusa.

⁶ Yeke, ngenza isimemezelo kobana kubizelwe phambi kwami iinhlakaniphi zeBhabheli ukuze zizongazisa ihlathululo yebhudango.

⁷ Kwathi lokha abosomlingo, ababhuli, izazi zamaKasidi nezanusi nazifika kimi, ngazibikela ibhudango, kodwana zahluleka ukungihlathululela lona.

⁸ Ekugcineni kweza uDanyela, ngitjho loyo othiyelelwe ngoBhelithetjhatsari uzimami nokuhlezi kuye ummoya wabozimu abacwengileko, ngamtjela ibhudango,

⁹ ngathi: “Wena Bhelithetjhatsari, mphathi wabosomlingo, ngiyazi bonyana ummoya wabozimu abacwengileko ungaphakathi kwakho nokobana akunafihlakalo elikhuni kuwe. Yeke, yewungembulele ibhudango engalibonako, okutjho ihlathululwalo.

¹⁰ Imibono engayibonako ngisalele emkghadinami ngile: Qala, ngabona umuthi ujame ekabeni yephasi, ukuphakama kwawo bekukukhulu.

¹¹ Umuthi lowo wakhula waba mkhulu wadzimelela, nesitlhori sawo safika emkayini begodu bewubonakala emaphethelweni wephasi loke.

¹² Amakarawo bekamahle, iinthelo zawo zandile begodu unokudla okwaneleko. Iimbandana zoke zommango zafunyana umthunzi kiwo, iinyoni zezulu zakhela eengaleni zawo, iye, iindalwa zoke zondleka kiwo.

¹³ “Eenthunzini engazibona ngilele emkghadinami, qala, bekunesithunywa esicwengileko sehla sivela ezulwini.

¹⁴ Sarhuwelela sathi, ‘Quntula umuthi lowo bese uqoba iingala zawo, uhlube amakarawo, uhlakaze neenthelo zawo. Iimbandana azisuke emthunzinawo neenyoni zitlhwareke eengaleni zawo.

¹⁵ Kodwana isiphunzi esinemirabho esisehlabathini kanye nesimbi nekoporo kulise hlangana notjani bommango. Akwehlelwe mbethe womkayi, kuphile neenlwana etjanini bephasi.’

¹⁶ Isithunywa godu sathi, ‘Umkhumbulwakhe awutjhuguluke kewomuntu bese uphiwa wesilwana; bekudlule phezu kwakhe iinkhathi ezibuyelelwe kalikhomba.

¹⁷ Isigwebo lesi siliqunto leenthunywa; iye, umlayezo lo ubuya eendalweni zezulu ukuze woke ophilako azi bonyana ongoPhezulu unamandla phezu kwemibuso yababhubhako: Unikela ukubusa kinanyana ngubani amthandako; angabeka ngitjho nophasi phezu kwemibuso.’

¹⁸ “Nanto-ke ibhudango mina Nebukadinetsari engaba nalo; nje-ke wena Bhelithetjhatsari, yewungiphe ihlathululo ngombana zoke iinhlakaniphi zombuswami ziyahluleka ukungipha ihlathululo. Kodwana wena uyakghona ngombana ummoya wabozimu abacwengileko ukuwe.”

¹⁹ Nje-ke uDanyela, ibizo lakhe ebekunguBhelithetjhatsari, wakhungatheka kwesikhatjhana, imicabangwakhe yamenza waba nevalo. Mina ngathi: “Bhelithetjhatsari, ungavumeli ibhudango nehlathululo zikwethuse!” UBhelithetjhatsari waphendula wathi: “Kosami, inga ibhudango lingaba ngelalabo abazonde ikosi, ihlathululo ibe ngeyezitha zayo!

²⁰ Manje, mayelana nomuthi owawubona ukhula uba mkhulu udzimelela bekuthi isitlhori sawo sifike emkayini, nowabonakala emaphethelweni wephasi loke,

²¹ amakarawo amahle, iinthelo zawo zandile, unokudla okwaneleko begodu neembandana zoke zommango zafunyana umthunzi kiwo, iinyoni zezulu zakhela eengaleni zawo:

²² Nguwe lowo kosi okhule bewaba namandla. Ubukhulu bakho bukhule bebafika emkayini nombuswakho emaphethelweni wephasi.

²³ Nje-ke kosi, mayelana nesithunywa osibonileko, esingocwengileko sehla sivela ezulwini sathi uquntule umuthi lowo bese uyawuqoba, kodwana isiphunzi esinemirabho esisehlabathini kanye nesimbi nekoporo kulise hlangana notjani bommango; kwehlelwe mbethe womkayi bese ifumbe yakhe ibe hlangana neembandana zommango kuze kudlule iinkhathi ezilikhomba:

²⁴ Nasi ihlathululo kosi begodu kuliqunto longoPhezulu elehlela phezu kwengwenyama ikosami:

²⁵ Ikosi izakuqotjhwa emphakathini, izakuhlala neembandana zommango. Ikosi izakwenziwa bonyana idle utjani njengekomo yehlelwe mbethe womkayi bekudlule iinkhathi ezilikhomba, bekube kulokha nawazi kobana ongoPhezulu unamandla phezu kwemibuso yababhubhako begodu uyinikele kinanyana ngubani amthandako.

²⁶ Njengombana kwaba nomyalo wokobana akutjhiywe isiphunzi nemirabhaso, lokho kutjho bona umbuswakho uzakubuyiselwa kuwe kusukela lokha nawuvumako bona uZimu nguye obusako.

²⁷ Ngalokho kosi, kwanga iseluleko sami singamukeleka kuwe. Nje-ke tjhiya izono zakho ngokwenza ukulunga nobukhohlakali bakho ngokuba nesirhawu kwabagandelelekileko. Mhlamunye kungenzeka bonyana ukuphumelela kwakho kungaragela phambili.”

²⁸ Koke lokho kwehlela mina Nebukadinetsari.

²⁹ Ekupheleni kwenyanga yetjhumi nambili lokha nagade ngikhambakhamba ephahleni lesigodlo seBhabheli,

³⁰ ngathi: “Angitjho ngiyo iBhabheli ekulu le engiyakhe ngamandlami amakhulu njengehloko yesigodlo bona ibe ngeyedumo nobukhosi bami na?”

³¹ Kwathi ilizwelo lingakaphumi emlonyenami, kwehla ilizwi ezulwini lathi: “Kosi Nebukadinetsari, uyaziswa bonyana umbuso ususiwe kuwe.

³² Uzokuqotjhwa emphakathini, indawakho yokuhlala izakuba hlangana neembandana zommango; uzakukateleleka ukudla utjani njengekomo bekudlule kuwe iinkhathi ezilikhomba ukufikela lapha uvuma khona bonyana ongoPhezulu unamandla phezu kwemibuso yababhubhako begodu uyinikela kinanyana ngubani amthandako.”

³³ Masinyana ilizwelo lagcwaliseka kimi, mina Nebukadinetsari. Ngaqotjhwa emphakathini, ngadla utjani njengekomo nomzimbami waba manzi ngombethe womkayi ukufikela lapha uboya bami bukhula khona njengeensiba zekhozi neenzipho zami njengezenyoni.

³⁴ Ekupheleni kwesikhathi, mina Nebukadinetsari ngaphakamisela amehlwami ezulwini, ngacaculuka. Ngamdumisa ongoPhezulu, ngamphakamisa ngambabaza ophila isiphelani ngombana ubukhosi bakhe kubukhosi banini nanini nombuswakhe ujame iinzukulwana ngeenzukulwana.

³⁵ Zoke izizwe zephasi zithathwa njengelize, wenza akuthandako eendalweni zezulu, iye, ngokunjalo nebantwini bephasi. Akakho noyedwa ongaphaya isandla sakhe, namkha athi kuye: “Wenzani na?”

³⁶ Nangicaculukako idumo lobukhosi bami, iye, isithunzi nobuphaziphazi bami kwabuyela kimi: Lokha abeluleki neenkhulu zami nabangifunako, ngabuyiselwa ebukhosini bami, phezu kwalokho kwangezelelwa ubukhulu obukhulu kimi.

³⁷ Nje-ke mina Nebukadinetsari, ngiyadumisa ngiphakamisa begodu ngithobela iKosi yezulwini. Imisebenzayo iliqiniso neendlela zayo zilungile. Mbala, iyakwazi ukubathobisa labo abakhamba ngokuzigqaja.