UDANYELA 2 - IsiNdebele 2012 Translation

Ibhudango lakaNebukadinetsari

¹ Emnyakeni wesibili wokubusa kwakaNebukadinetsari, waba nebhudango bewadungeka emmoyeni kangangobana akhange asaba nobuthongo.

² Nje-ke ikosi yayala bona kubizwe abosomlingo, abaloyi nezanusi kanye nezazi zamaKasidi kobana beze bazokuhlathululela ikosi ibhudango layo lelo. Kuthe bona bafike phambi kwayo,

³ yathi kibo: “Ngibenebhudango elingihlubayezako, nje-ke ngifuna ukulazi kobana litjho ukuthini.”

⁴ Nje-ke izazi zamaKasidi zakhuluma nekosi ngesi-Aramu zathi: “Ikosi ayiphile siphile! Ngalokho ikosi ingatjela iinceku zayo ibhudango, zona zizalihlathulula.”

⁵ Ikosi yaphendula izazi zamaKasidi yathi: “Kwamambala ngiqinisile: Nakube nihluleka ukungazisa ibhudango nehlathululwalo, nizokuhlahlelwa iinquqwana nemizenu izokwenziwa amarubhi.

⁶ Kodwana naningitjela ibhudango nehlathululwalo, ngizonamukelisa izipho nemivuzo kanye nokuhlonitjhwa okukhulu. Yeke, ngitjelani-ke ibhudango nehlathululwalo.”

⁷ Zona zayiphendula kwesibili zathi: “Ikosi ayitjele iinceku zayo ibhudango mantange, nje-ke thina sizakutjho ihlathululwalo.”

⁸ Ikosi yaziphendula yathi: “Ngambala ngiyazi bonyana nizama ukuzenzela isikhathi ngombana niyabona bona bengiqinisile ngequnto lami:

⁹ Nangabe aningitjeli ibhudango, sinye isigwebo senu. Ngalokho nilumbe amaqhinga ngomnqopho wokukhuluma amala nekohliso phambi kwami ngokucabanga bona ubujamo buzakuphenduka. Yeke, nina ngitjelani ibhudango, mina-ke ngizakwazi bonyana ningalihlathulula.”

¹⁰ Izazi zamaKasidi zaphendula phambi kwekosi zathi: “Ephasinapha, akakho noyedwa ongakghona ukwenza lokho okufunwa yikosi. Kwakhona azange khekube nekosi, nanyana kuthiwa yikulu begodu inamandla kangangani eyakhe yabuza into enjalo kibosomlingo, kubabhuli namkha ezazini zamaKasidi.

¹¹ Into ebuzwa yikosi le, inzima; akakho ongayembula ekosini ngaphandle kwabozinyana begodu bona abahlali hlangana nabantu.”

¹² Ngebanga lendaba leyo, ikosi yasilingeka beyafutheka kangangobana yayala kobana zoke iinhlakaniphi zeBhabheli zibhujiswe.

¹³ Nje-ke kwakhutjhwa isimemezelo kobana iinhlakaniphezo zibhujiswe. Godu kwafunwa noDanyela nabangani bakhe kobana nabo babulawe.

¹⁴ Kwathi lokha u-Ariyoki, umphathi wobuzimba naphumako bona ayokubhubhisa iinhlakaniphezo, uDanyela wakhuluma naye ngobuhlakani nangamaqhinga.

¹⁵ Wathi ku-Ariyoki, godu ogade ayinduna yesigodlo: “Kanti kubayini isimemezelo sekosi sinesihluku kangaka?” Nje-ke u-Ariyoki wahlathululela uDanyela koke.

¹⁶ Ngalokho uDanyela wangena ekosini wazibawela isikhatjhana kobana azokwazi ukuyihlathululela ibhudango.

¹⁷ Nje-ke uDanyela waya lapha ahlala khona wafese wabika indaba leyo kuRhananiya, uMitjhayeli no-Azariya abangani bakhe,

¹⁸ wabatjela kobana babawe umusa kaZimu wezulwini mayelana nefihlakalo le ukuze bangabhujiswa yena nabangani bakhe kanye nezinye iinhlakaniphi zeBhabheli.

¹⁹ Nje-ke kwathi ebusuku, ifihlakalo yembuleka kuDanyela ngombono. Ngalokho uDanyela wadumisa uZimu wezulwini.

²⁰ Wathi: “Nini nanini akudunyiswe ibizo lakaZimu ngombana ukuhlakanipha namandla kungokwakhe.

²¹ Yena utjhugulula iinkhathi nobujamo, wehlisa amakhosi abuye abeke amanye; upha iinhlakaniphi ubuhlakani nelwazi kilabo abanokuzwisisa.

²² Wembula izinto ezimanzima nezifihlakeleko, uyakwazi okusebumnyameni, khisibe nokukhanya kukuye.

²³ Ngiyakuthokoza bengiyakudumisa wena Zimu wabokhokho ngombana ungiphe ukuhlakanipha namandla, wangivezela lokho esikuthandazeleko, iye, wembule indaba yekosi le.”

²⁴ UDanyela waya ku-Ariyoki obegade abekwe yikosi kobana abhubhise iinhlakaniphi zeBhabheli, wafese wathi kuye: “Ungazibhubhisi iinhlakaniphi zeBhabheli. Wena ngithatha nje ungise ekosini, mina ngizakulethela ikosi ihlathululo.”

²⁵ Nje-ke masinyana u-Ariyoki wasa uDanyela phambi kwekosi, wafese wathi kiyo: “Hlangana nabathunjwa bakwaJuda, ngifunyene umuntu ongatjela ikosi ihlathululo.”

²⁶ Ikosi yabuza uDanyela obesele aziwa bona nguBhelithetjhatsari, yathi: “Ungakghona ukungitjela ibhudango engilibhudangileko nehlathululwalo na?”

²⁷ UDanyela waphendula wathi: “Lokho ikosi ebuze ngakho, akukho iinhlakaniphi, ababhuli, abosomlingo namkha izanusi ezingakwembula ekosini.

²⁸ Kodwana kukhona uZimu ezulwini owembula iimfihlakalo begodu yena wembulile ekosinami uNebukadinetsari kobana kuzokwenzekani emalangeni ezako. Nje-ke ibhudango nombono owedlule engqondweni yekosi isalele, ngilokhu:

²⁹ Kuthe ikosi isalele emkghadinayo, yafikelwa mbono walokho okuzokwenzeka ukusukela njesi, nomembuli weemfihlakalo wavezela ikosi bonyana kuzokwenzekani.

³⁰ Nje-ke nakungimi, ifihlakalo le yembulwe kimi ingasi ngombana ngihlakaniphe ukwedlula abanye abantu, kodwana kube ngehloso yokobana ikosi yaziswe ihlathululo nokobana izwisise imizindlo yemicabangwayo.

³¹ “Kosi, angitjho wathi usaqalile, wabona isithombesibunjwa esikhulu! Isithombeso besisikhulu kwamanikelela nokuphazimula kwaso bekurara. Sona besijame phambi kwakho sinesibumbeko esesabekako.

³² Isithombesibunjweso besinehloko yegolidembala; isifuba nemikhonwaso kulisiliva, amadinaso neenyonga kulikoporo,

³³ imilenze neenyawo zaso kuyisimbi nomdaka otjhisiweko.

³⁴ Uthe usaqalile njalo, kwaqephuka ilitje entabeni kungasi ngesandla somuntu, lafese latshidlha isithombesibunjweso eenyaweni eziyisimbi kanye nomdaka lazephula iinquqwana.

³⁵ Nje-ke isimbi, umdaka, ikoporo, isiliva kanye negolide kwaba ziinquqwana njengomungu eselelweni nawuphephethwa mumoya ehlobo: Akukho nokukodwa kweenquqwanezo okwafunyanwako. Kodwana ilitje elatshidlha isithombesibunjweso laphenduka idwala elikhulu lazala iphasi loke.

³⁶ “Bekungilelo-ke ibhudango. Kwanjesi sizokuhlathululela ikosi bona litjho ukuthini.

³⁷ Wena kosi, kosi yamakhosi, wena onikelwe nguZimu wezulwini umbuso, amandla, iinkhwepha nobukhosi,

³⁸ wabeka esandleni sakho abantu abaphila nanyana kuphi, iimbandana zommango, iinyoni zesibhakabhaka; iye wena owajanyiswa bona ulawule ngaphezu kwakho koke lokho, wena uyihloko yegolidelo.

³⁹ Emva kwakho kuzakuvuka omunye umbuso omncani kunewakho, godu bekube nowesithathu wekoporo, ozakubusa iphasi loke.

⁴⁰ Kuzakuba khona umbuso wesine ozakuba ngoqine njengesimbi. Iye, njengesimbi etshidlhako, ngaleyondlela uzakurhayila ugaye yoke eminye imibuso.

⁴¹ Njengombana ubone iinyawo namazwani ebekanengcenye emdaka wombumbi nesimbi, lokho kuzakuba mbuso ohlukeneko: Ukuqina kwesimbi kuzakuba kiwo. Njengombana ubone isimbi ihlanganiswe nomdaka,

⁴² iye, ingcenye yamazwani bekuyisimbi nengcenye imdaka, ngendlela enjalo ingcenye yombuso lowo izakuba ngeqinileko, enye ibe ngebuthakathaka.

⁴³ Njengalokhu ubonile isimbi ivangene nomdaka, ngendlela enjalo abantu bazakuhlangana ngokwendiselana, kodwana angekhe babemunye njengombana nesimbi ayibumbani nomdaka.

⁴⁴ Khona emalangeni wamakhosi lawo, uZimu wezulwini uzakujamisa umbuso ongasoze wapheliswa namkha udluliselwe kabanye abantu. Uzakutshidlha bewuphelise yoke imibuso eminye, kodwana wona uzakujama nini nanini.

⁴⁵ Kuzakuba njengombana ubone ilitje liqephuka entabeni kungasi ngesandla somuntu, latshidlha isimbi, ikoporo, umdaka, isiliva kanye negolide iinquqwana. Ngambala, uZimu omkhulu wazise ikosami lokho okuzakwenzeka emva kwalokhu. Ibhudango liqinise kwamambala nehlathululwalo ithembekile.”

⁴⁶ Nje-ke, ikosi uNebukadinetsari yawa ngobuso phambi kwakaDanyela yamlotjha, beyayala kobana kunikelwe kuye umnikelo weenthoro newetjhwalo

⁴⁷ begodu yathi kuDanyela: “Mbala, uZimenu unguZimu ongaphezu kwabozinyana, iye, uyiKosi yamakhosi nomembuli weemfihlakalo, ngalokho ukghonile ukungivezela ifihlakalo.”

⁴⁸ Nje-ke ikosi yaphakamisa uDanyela yamupha nezipho ezihle khulu. Yambeka umbusi ngaphezu kwesifunda soke seBhabheli beyamenza umphathi weenhlakaniphi zakhona.

⁴⁹ Ngesibawo sakaDanyela ikosi yabeka uTjhedreke, uMitjhaka no-Abhedinigo njengabalawuli besifunda seBhabheli. UDanyela yena wahlala ngesigodlweni sekosi.