UDANYELA 12 - IsiNdebele 2012 Translation

¹ “Ngesikhatheso uMikayeli ingilozi ekulu, omvikeli wabantu bekhenu uzakusikima. Kuzakubakhona isikhathi sesizi elikhulu esingazange khesibe khona emlandweni wokuphila kwezizwe bekube sikhathi esibekiweko. Kodwana esikhathineso boke abantu bekhenu abafunyanwa batlolwe encwadini, bazakutjhaphululwa.

² Inengi lalabo abalele ethulini lehlabathi, lizakuvuka, abanye bavukele ekuphileni okungapheliko, abanye bavukele ehlazweni elisinyenyiso esingapheliko.

³ Abahlakaniphileko bazakukhanya njengokudarha komkayi, kuthi labo abadosela abanye emthethweni wokulunga, bakhanye nini nanini njengeenkwekwezi.

⁴ Kodwana wena Danyela londa amezwi la abe yifihlo, uvale incwadi ngokuyigiba bekube sikhathi sokuphela. Abanengi bazakwenza irhubhululo nelwazi lizakwanda.”

⁵ Nje-ke mina Danyela, ngaqala, napo abanye ababili, omunye ajame ngaphetjheya esebeni lomlambo omunye ajame nganeno.

⁶ Omunye wabo wabuza endodeni eyembethe zelineni, kwanjesi ebegade iphezu kwamanzi womlambo wathi: “Kuzokuthatha isikhathi esingangani ukufika kwesiphetho seemangaliswezi na?”

⁷ Indoda eyembethe zelineni egade iphezu kwamanzi womlambo leyo yaphakamisela isidla nesincele sayo ezulwini; ngayizwa ifunga ngaloyo ophila isiphelani yathi: “Kuzakuba sikhathi, iinkhathi nesiqunto sesikhathi. Kuzakuthi lokha ukuqotjwa kwamandla wabantu abacwengileko nasele kuphelile, zoke izintwezi zizaliseke.”

⁸ Ngezwa kodwana akhange ngizwisise; nje-ke ngathi: “Kosami, uzakuba yini umphumela wezintwezi?”

⁹ Yathi kimi: “Danyela, zikhambele mntabantu ngombana amezwi la kufuze ahlale ayifihlo abe avalwe ngokugitjwa bekube sikhathi sokuphela.

¹⁰ Abanengi bazakuhlungwa, bahlanjululwe bebacwengiswe, kodwana abakhohlakeleko bazakuragela phambili nobukhohlakali. Akakho wabakhohlakeleko ozakuzwisisa, kodwana abahlakaniphileko bona bazakuzwisisa.

¹¹ Kusukela esikhathini sokususwa komhlabelo wokutjhiswa wangemihla nokujanyiswa kwesinyenyiso esibhubhisako kuzakuba yikulungwana namakhulu amabili namatjhumi alithoba wamalanga.

¹² Babusisiwe labo ababekezela bebafikelele ekupheleni kwamalanga ayikulungwana namakhulu amathathu namatjhumi amathathu nahlanu.

¹³ Kodwana wena phila bekube sekugcineni; uzakuphumula bese uvukela isiphetho sakho ekupheleni kwamalanga.”