UDANYELA 10 - IsiNdebele 2012 Translation

Ukulwa kwemibuso

¹ Kwathi ngomnyaka wesithathu wokubusa kwakaKoretjhi ikosi yePheresiya, uDanyela obekathiywe bonyana nguBhelithetjhatsari wembulelwa ilizwi. Ilizwelo beliliqiniso begodu likhuluma ngehlupheko ekulu. UDanyela walizwisisa begodu waba nelemuko lombono.

² UDanyela wathi: “Emihleni leyo mina Danyela bengisesililweni iimveke ezintathu zoke swana.

³ Bengingazange khengidle litho elimnandi, inyama newayini azange kuthinte iimbhena zami. Azange ngizitjhatjhe bekwaba ziimveke ezintathu zoke swana.

⁴ Ngelanga lamatjhumi amabili nane lenyanga yokuthoma ngajama esebeni lomlambo omkhulu iRhidekheli.

⁵ Ngaphakamisa amehlwami ngaqala, naso indoda yembethe ilineni, iinyonga zayo zithekeleze igolide le-Ufazi.

⁶ Umzimbayo bewufana nebherili, ubuso bayo bebunjengokuphazima kombani. Amehlwayo bekanjengesihlothi esivuthako, imikhono neenyawo zayo ziphazima njengekoporo emanyako. Ukuzwakala kwamezwayo bekunjengokuhlokoma kwewoma.

⁷ Kwaba ngimi kwaphela, mina Danyela owabona umbono ngombana amadoda agade anami akhange awubone. Nanyana kunjalo ehlelwa kukwesaba okukhulu athuthumela. Ngalokho abaleka kobana ayozifihla,

⁸ mina ngasala ngingedwa, ngibona umbono omkhulu lowo. Amandlami besele aphelile nobuso bami buphaphatheke njengombala wesidumbu; iye, amandla angasekho kimi.

⁹ “Nje-ke ngezwa ukuzwakala kwamezwayo. Kwathi lokha nangizwa ukuzwakala kwamezwi lawo, ngehlelwa mumoya ngilele ngobuso phasi.

¹⁰ Qala, khonapho ngathintwa sisandla, sangiphaphamisa, ngaguqa ngibambelele ngezandla phasi, ngiqhaqhazela.

¹¹ Indoda leyo yathi kimi, ‘Danyela, muntu othandwa khulu, lalela amezwi engizowakhuluma kuwe begodu jama rwe ngombana ngithunywe kuwe.’ Kwathi isakhuluma lokho kimi, ngasikima ngiqhaqhazela.

¹² “Nje-ke yathi kimi, ‘Danyela, ungesabi ngombana kusukela elangeni lokuthoma owazimisela ngalo kobana uzwisise nokuzithoba kwakho phambi kwakaZimu, amezwakho alalelwe begodu ngize ngebanga lawo.

¹³ Ingilozi yombuso wePheresiya yajamelana nami amalanga amatjhumi amabili nalinye. Kodwana uMikayeli ongomunye weengilozi ezikulu weza wazongisiza ngombana bengisele ngingedwa ekuqalaneni nombuso wemimoya yePheresiya.

¹⁴ Nje-ke, ngize kobana uzwisise lokho okuzokwehlela abantu bekhenu emihleni yokuphela ngombana kusese nombono omunye omayelana nesikhathi esizako.’

¹⁵ “Kuthe lokha nasele akhulume nami amezwi lawo, ngaqalisa ubuso phasi, ngasala ngikakamele.

¹⁶ Qala-ke, omunye onejamo elifana nendodana yomuntu wathinta iimbhena zami, nje-ke ngathoma ukukhuluma, ngathi kojame phambi kwami, ‘Awu kosami, ngebanga lombono ngehlelwe lisizi namandla akasekho kimi.

¹⁷ Alo, inceku yekosami ingakhuluma njani nekosayo na? Kimapha amandla aphelile ngihluleka ngitjho nokuphefumula.’

¹⁸ “Godu omunye ofana nomuntu wangithinta wangiqinisa,

¹⁹ wathi, ‘Danyela, muntu othandwa khulu, ungesabi. Yiba nokuthula, uqine ube nesibindi.’ Kuthe lokha nasakhuluma nami, ngaqina idolo bengathi, ‘Ikosami ayikhulume ngombana seyingiqinisile.’

²⁰ Wathi kimi, ‘Sewuyazi kwanjesi bonyana ngizeleni kuwe, kodwana kumele ngirhabe ngibuyele emuva ngiyokulwa nengilozi yePheresiya. Kuzakuthi lokha nangiphuma kobana ngiyokulwa, kuze ingilozi yeGirisi.

²¹ Nokho-ke ngizokutjela lokho okutlolwe ngencwadini yeqiniso. “ ‘Akakho ongisekela ukujamelana nazo ngaphandle kwakaMikayeli, ingilozenu.’ ”