KWEBE-EFESU 6 - IsiNdebele 2012 Translation

Abantwana nababelethi

¹ Bantwana, thobelani ababelethi benu eKosini ngombana lokhu kulungile.

² “Hlonipha uyihlo nonyoko.” Lo myalo wokuthoma onesithembiso,

³ esithi “ukuze kunikhambele kuhle nokobana nibe nepilo ede ephasinapha”.

⁴ Nani bobaba, ningabathukuthelisi abantwabenu, esikhundleni salokho bakhuliseni esifundisweni nemyalweni weKosi.

⁵ Makhoboka, thobelani abaphathi benu bephasini ngehlonipho, ngokwesaba nangobuqotho behliziyo, njengombana beningenza kuKrestu.

⁶ Ningakwenzi ngombana nifuna ukuthenga amehlwabo nabanibeke ilihlo, kodwana thembekani nanyana bangekho, njengamakhoboka kaKrestu, yenzani intando kaZimu ngeenhliziyo zenu ezipheleleko.

⁷ Yenzani umsebenzi wenu ngommoya omuhle kube ngathi anenzeli abantu kodwana nenzela iKosi,

⁸ njengombana nisazi bonyana iKosi izokuvuza omunye nomunye ngakho koke okuhle akwenzako, nanyana alikhoboka namkha atjhaphulukile.

⁹ Nani baphathi, phathani amakhoboka wenu ngayo yona leyondlela. Ningabasongeli njengombana nisazi bonyana yena loyo oMphathi wabo newenu usezulwini begodu akathengi amehlo wabantu.

Ukuhloma iinhlabano zakaZimu

¹⁰ Kokugcina, qinani eKosini nemandleni wayo amakhulu!

¹¹ Hlomani zoke iinhlabano zakaZimu ukuze nikghone ukulema nijamelane namaqhinga kaSathana,

¹² ngombana asibindani nenyama neengazi, kodwana sibindana nababusi, iimphathimandla, imibuso yephasi elisemnyameneli kanye nemibutho yemimoya emimbi esemkayini.

¹³ Nje-ke hlomani zoke iinhlabano zakaZimu ukuze kuthi nakufika ilanga lobumbi, nikghone ukudzimelela ningatjhidi bekuthi nasele nenze koke, nibonakale nisajamile.

¹⁴ Dzimelelani-ke, nizibophe ngebhande leqiniso edinini, ukulunga kube sivikelo senu sesifuba,

¹⁵ iinyawo zenu zembathe ukulungela ukukhambisa ivangeli lokuthula.

¹⁶ Phezu kwakho koke lokhu, phakamisani ukukholwa kube sihlangu senu enikghona ukucima ngaso yoke imisubela evuthako yokhohlakeleko.

¹⁷ Yamukelani isindiso ibe sikupuru, ilizwi lakaZimu libe yisabula kaMoya.

¹⁸ Thandazani nikuMoya ngeenkhathi zoke ngayo yoke imihlobohlobo yemithandazo kanye neembawo. Nisakhumbule lokho, yelelani begodu ngeenkhathi zoke hlalani nithandazela boke abacwengileko.

¹⁹ Nami ningithandazele ukuze kuthi njalo nangivula umlomo, ngiphiwe amezwi wokobana ngitjhumayele ifihlakalo yevangeli ngesibindi,

²⁰ engimzenda walo ngibotjhiwe. Thandazani bona ngilitjhumayele ngesibindi njengombana ngifanele.

Isiphetho

²¹ UTirhikosi umfowethu othandekako nosisebenzi esithembekako seKosi, uzanitjela koke ukuze nani nazi bonyana ngivuke njani nokobana ngenzani.

²² Kungebangelo ngimthumela kinapho ukuze nazi bona sivuke njani begodu anikhuthaze.

²³ Ukuthula akube kubazalwana nethando elinokukholwa okuvela kuZimu uBaba neKosini uJesu Krestu.

²⁴ Akube mumusa kibo boke abathanda iKosethu uJesu Krestu ngalo loke ithando elingapheliko.