KWEBE-EFESU 5 - IsiNdebele 2012 Translation

Ukuhlala ekukhanyeni

¹ Yeke yibani balingisi bakaZimu njengabantwana abathandekako,

² niphile ipilo yethando njengombana uKrestu asithanda wabe wazinikela ngenca yethu, waba mnikelo onuka kamnandi kanye nomhlabelo kuZimu.

³ Kodwana phakathi kwenu akungabikho ukuziphatha kumbi ngokwamabhayi, nanyana kungaba ngiwuphi umhlobo wokusolaphala namkha womrhawu, ngombana lokho akukalungeli abantu abacwengileko bakaZimu.

⁴ Akungabikho amanyala, iinkulumo zobudlhadlha namkha isikhathi samahlaya angayi ngandlela, kodwana kunalokho yibani nokuthokoza.

⁵ Ngambala qinisekani ngalokhu: Akunasifebe, umuntu osilapheleko namkha omarhamaru njengaloyo olotjha abosingazimu, ozakuba nesabelo elifeni lombuso kaKrestu noZimu.

⁶ Ningakhohliswa mumuntu ngamezwi angatjho ilitho ngombana ngebanga lezinto ezinjalo itukuthelo kaZimu yehlela labo abangalaleliko.

⁷ Nje-ke ningabi nobudlelwano nabo.

⁸ Nani nakhe naba bumnyama, kodwana gadesi sele nikukhanya eKosini. Philani njengabantwana bokukhanya

⁹ ngombana isithelo sokukhanya sinabo boke ubuhle, ukulunga neqiniso

¹⁰ bese nifunyane bona yini okuthokozisa iKosi.

¹¹ Ningabi nandaba nezinto ezililize ezenziwa babantu, izinto ezisebumnyameni, kunalokho zivezeni ekukhanyeni izintwezo.

¹² Kulihlazo ngitjho nokutjho bona abangalaleliko benzani ngemsitheleni.

¹³ Kodwana koke okuvezwa kukhanya kuba semtarini

¹⁴ ngombana kukhanya okwenza koke kubonakale. Kungalokho kuthiwa: “Phaphama wena oleleko, uvuke kabafileko, nje-ke uKrestu uzakukhanya kuwe!”

¹⁵ Ngalokho-ke tjhejisisani bona niziphethe njani, ningabi ziindlhayela, kodwana nihlakaniphe

¹⁶ ngokusebenzisa elinye nelinye ithuba ngombana imihla le esiphila kiyo mimbi.

¹⁷ Ningabi ziindlhayela, kodwana lemukani bona iyini intando kaZimu.

¹⁸ Ningadakwa liwayini ngombana lidosela ekukhohlakaleni. Esikhundleni salokho zaliswani ngoMoya oCwengileko.

¹⁹ Khulumisanani ngamarhubo, ngeenhlabelelo nangeengoma zakaMoya. Vumani benirhubele iKosi niyidumise ngeenhliziyo zenu,

²⁰ nihlale njalo nithokoza uZimu uBaba ngakho koke, ebizweni leKosethu uKrestu Jesu.

Amadoda nabafazi

²¹ Thobelanani ngokuhlonipha uKrestu.

²² Bafazi, thobelani amadoda wenu sengathi nithobela iKosi

²³ ngombana indoda iyihloko yomfazi, njengombana uKrestu ayihloko yebandla elimzimba wakhe begodu yena aMsindisi walo.

²⁴ Njengombana ibandla limthobela uKrestu, ngokunjalo nabafazi kumele bathobele amadoda wabo kikho koke.

²⁵ Madoda, thandani abafazi benu njengombana uKrestu athanda ibandla, wadela ukuphila kwakhe ngebanga lalo.

²⁶ Walicwengisa, walihlanza ngamanzi nangelizwi lakhe

²⁷ begodu waliletha kuye lilibandla elinephazimulo, elinganachaphazi, ukutjhwabana namkha umphambo wananyana yini kodwana licwengile begodu limsulwa.

²⁸ Ngokunjalo namadoda kufanele athande abafazi bawo njengombana athanda imizimba yawo. Othanda umkakhe uzithanda yena ngokwakhe.

²⁹ Akakho owakhe wazonda umzimbakhe kodwana ngiloyo naloyo uyawondla awutlhogomele, njengombana noKrestu asenza ebandleni

³⁰ ngombana sizizitho zomzimbakhe.

³¹ “Ngalokho-ke indoda izokutjhiya uyise nonina inamathele kumkayo, nje-ke ababili labo babe nyamanye.”

³² Yifihlakalo ekulu le, kodwana ngikhuluma ngoKrestu nebandla.

³³ Nokho-ke omunye nomunye wenu kumele athande umkakhe njengombana azithanda yena, nomfazi kumele ahloniphe indodakhe.