KWEBE-EFESU 4 - IsiNdebele 2012 Translation

Ubunye bomzimba kaKrestu

¹ Yeke, mina sibotjhwa ngebanga leKosi ngiyanincenga bonyana niphile ipilo efanelana nokubizwa kwenu,

² ngokobana nizithobe ngokupheleleko, nibe mnene, ninyamezele benibekezelelane ngethando.

³ Yenzani ngakho koke okusemandlenenu ukulonda ubunye bakaMoya ngesibopho sokuthula.

⁴ Munye umzimba noMoya munye; njengombana nanibizwako nabizelwa ethembeni linye,

⁵ eKosini yinye, ekukholweni kunye nembhajadisweni munye,

⁶ kuZimu munye nonguYise wabo boke, ongaphezu kwakho koke begodu ngakho koke nakikho koke.

⁷ Kodwana soke siphiwe umusa ukuya ngokwesilinganiso sesipho sakaKrestu.

⁸ Yeke kungakho kuthiwa: “Lokha nenyukela ekuphakameni, wathumba abathunjiweko, wabela abantu izipho.”

⁹ Alo-ke ukuthi: “Wenyuka” kutjho ukuthini ngaphandle kokobana wakhe wehlela phasi eengcenyeni eziphasi zephasi na?

¹⁰ Loyo owehlako, nguye kanye owenyukela ngaphezu kwawo woke amazulu ukuze azalise iphasi loke.

¹¹ Nguye owabela abanye bona babe bapostoli, abanye babe baphorofidi, abanye babe bavangeli, abanye babe belusi kanye nabafundisi,

¹² ukulungiselela abacwengileko imisebenzi yokulotjha ukuze kwakheke umzimba kaKrestu,

¹³ kufikela lapha soke siba munye khona ekukholweni nelwazini leNdodana kaZimu. Iye sikhule besifikelele ekuzuzeni isilinganiso soke sokuphelela kwakaKrestu.

¹⁴ Nje-ke asisesebantwana abawunawunwa mamaza, baphetjhulelwe le na le ngiyo yoke imimoya kanye nabantu abanobuqili ngamaqhingabo wekohliso.

¹⁵ Esikhundleni salokho, asikhulumeni iqiniso ngethando, ngakho koke sikhulele kiloyo oyihloko okunguKrestu

¹⁶ nokuhlangana kuye umzimba woke, ubumbane ndawonye ngamalungu woke onikelwa wona lokha isitho ngasinye nasisebenza ngendlela efaneleko, kwakheke umzimba, udzimelele ethandweni.

Ipilo etja kuKrestu

¹⁷ Yeke nginitjela lokhu begodu ngifakaza eKosini bonyana ningasaphili njengabatjhili emikhumbulwenabo elilize lakolize.

¹⁸ Imikhumbulwabo isebumnyameni, bahlukaniswe nendlela yokuphila evela kuZimu ngokungayeleli kwabo ngebanga lobukhuni beenhliziyo zabo.

¹⁹ Nasele bangasenanhloni, bazineka emanyaleni ukuze benze koke ukusilaphala, baragela phambili ngokukhanuka okungaphezu kwalokho.

²⁰ Kodwana nina azange nifunde uKrestu ngendlela enjalo,

²¹ ngombana sele nezwa ngaye benafundiswa ngaye ngokweqiniso elikuJesu.

²² Nafundiswa mayelana neendlela zenu zokuphila zaphambilini, kobana nilise imikhuba yenu yaphambilini eyonakaliswe ziinkanuko zayo zekohliso;

²³ kobana nenziwe butjha emikhubeni yemikhumbulwenu,

²⁴ nembathe ubuntu obutjha obubunjwe bafuza uZimu, ekulungeni kweqiniso nangokucwengeka.

²⁵ Yeke lisani amanga, ngiloyo naloyo akhulume iqiniso nomakhelwanakhe ngombana soke simalungu womzimba munye.

²⁶ Thukuthelani, kodwana ningoni. Akungatjhingi ilanga nisathukuthele,

²⁷ ningamnikeli ithuba uSathana.

²⁸ Owebako akalise ukweba, kodwana akasebenze, enze okuhle ngezandla zakhe ukuze akwazi ukuba nelitho azalabela abaswelako.

²⁹ Ningavumi bona ngemilonyeni yenu kuphume iinkulumo ezimbi ezilihlazo, kodwana nikhulume lokho okulisizo ekwakheni abanye ngokweendingo zabo ukuze kusizakale labo abalaleleko.

³⁰ Ningamdabukisi uMoya oCwengileko kaZimu enabekwa ngaye itshwayo mayelana nelanga lokuhlengwa.

³¹ Akuphele koke: ubumunyu, itukuthelo, ilaka, ukubangelana itjhada, ukukhulumana kumbi, kanye nabo boke ubumbi.

³² Yibani mnene, nirhawukelane, nilibalelane njengombana noZimu anilibalela ngoKrestu.