KWEBE-EFESU 3 - IsiNdebele 2012 Translation

Ukusebenza kwakaPowula hlangana nabatjhili

¹ Ngebangelo-ke, mina Powula engisibotjhwa sakaKrestu Jesu, esikhundleni senu nina abatjhili,

² ngineqiniso bona nizwile ngokuphathwa komusa wakaZimu enganikelwa wona mayelana nani,

³ okutjho ifihlakalo engaziswa yona ngesambulo njengombana sengatlola kafitjhazana.

⁴ Nanifunda lokhu, ningalemuka umqondo wami mayelana nefihlakalo kaKrestu,

⁵ engazange yaziswe abantu eenzukulwaneni ezinye njengombana sele yambulwe nguMoya kubapostoli nabaphorofidi bakhe abacwengileko.

⁶ Ifihlakalo leyo kukobana abatjhili baziindlalifa kanye nathi, bamalunga womzimba munye begodu babahlanganyeli besithembiso kuKrestu Jesu ngebanga levangeli.

⁷ Mina ngenziwa inceku yevangeli leli ngokwesipho somusa kaZimu engawuphiwa ngokusebenza kwamandla wakhe.

⁸ Nanyana mina ngingomncancani kunabo boke abacwengileko, ngaphiwa umusa lo, kobana ngitjhumayele kabatjhili umnono kaKrestu ongaphenyekiko,

⁹ nokulemukisa boke abantu ukubona bonyana liyini ihlelo lefihlakalo ebeyifihlwe kwekadeni kuZimu owadala koke.

¹⁰ Ihloso yakhe bekukukobana gadesi, ngokusebenzisa ibandla, ukuhlakanipha kwakaZimu okubonakalisiweko kuvezwe ebabusini neemphathimandleni zombuso wezulwini,

¹¹ ngokwehloso yakhe yanini nanini ayiphelelisa ngoKrestu Jesu iKosethu.

¹² Kuye nangokukholwa kuye, singaya kuZimu ngokukhululeka nangesibindi.

¹³ Yeke ngiyanirabhela, ningapheli amandla ngalokho enginihluphekela ngakho, okulidumo lenu.

Ithando lakaKrestu

¹⁴ Ngesizathwesi ngiguqa phambi kwakaBaba,

¹⁵ imindeni yoke yezulwini nephasinapha ebizwa ngaye.

¹⁶ Inga ngomnono wephazimulwakhe anganiqinisa ngamandla ngoMoyakhe ongaphakathi kwenu,

¹⁷ ukuze uKrestu ahlale eenhliziyweni zenu ngokukholwa. Njengombana nidzimelele benasekeleka ethandweni lakaKrestu, ngithandazela bona

¹⁸ nibe namandla kanye nabo boke abacwengileko, nilemuke ububanzi, ubude, ukuphakama nokutjhinga kwethando lakhe.

¹⁹ Godu nilazi ithando lakaKrestu elidlula ilwazi loke ukuze nizaliswe ngalo kufikela esilinganisweni sakho koke ukuphelela kwakaZimu.

²⁰ Yeke loyo onamandla wokwenza okukhulu ngokungalinganisekiko ukudlula lokho esikukhombelako namkha esikucabangako, ukuya ngamandla wakhe asebenza ngaphakathi kwethu,

²¹ akube kuye idumo ebandleni nakuKrestu Jesu iinzukulwana ngeenzukulwana! Amen.