KWEBE-EFESU 2 - IsiNdebele 2012 Translation

Sisindiswa ngomusa kuKrestu

¹ Nakungini, benifile eemphambekweni nezonweni zenu,

² ebenijayele ukuphila kizo lokha nabegade nilandela iindlela zephaseli nezombusi wombuso womkayi, okumumoya osebenza phakathi kwalabo abangalaleliko.

³ Soke nje sakhe saphila phakathi kwazo ngesinye isikhathi, sanelisa iinkanuko zemvelo yethu yokonakala, salandela iinkanuko nemikhumbulwayo. Njengabo boke, ngokwemvelo besizizinto zokulahlwa.

⁴ Kodwana ngebanga lethando lakhe elikhulu, uZimu onothileko ngomusa,

⁵ wasenza saphila ngoKrestu nanyana besifile ngeemphambeko. Yeke kungomusa bona nibe ngabasindisiweko.

⁶ UZimu wasivusa naye bewasihlalisa kanye naye embusweni wezulu kuKrestu Jesu

⁷ ukuze kuthi eenkhathini ezizako akhombise umnono ongalinganisekiko womusa wakhe, obonakaliswe esiseni sakhe kithi ngoKrestu Jesu.

⁸ Nje-ke kungomusa kobana nibe ngabasindisiweko ngokukholwa begodu lokhu akuveli kini, kodwana kusisipho sakaZimu,

⁹ akuveli ngemisebenzi ukuze kungabikho ozozikhakhazisa.

¹⁰ Thina simsebenzi wezandla zakhe, kuKrestu Jesu kobana senze imisebenzi emihle uZimu asilungiselele yona ngaphambilini ukuze siphile kiyo.

Simunye noKrestu

¹¹ Ngalokho khumbulani bona phambilini labo abazibiza bona “ngabasokako” (basitjho ukusoka okwenziwa emzimbeni ngezandla zomuntu) bebanibiza bona ningabatjhili ngokubelethwa.

¹² Khumbulani bona ngesikhatheso beninganabudlelwano noKrestu, benininwa ekubeni zizakhamuzi zakwa-Israyeli, beningabalwa nesivumelwaneni sesithembiso. Beninganathemba begodu ninganaZimu ephasini.

¹³ Kodwana nina ebenikude noKrestu Jesu, senitjhideziwe ngeengazi zakhe.

¹⁴ Yena ngokwakhe ukuthula kwethu, iye, loyo owenza ababili baba munye, watjhabalalisa isiqabo okumthangala wobutha owahlukanisako,

¹⁵ ngokuphelisa enyamenakhe umthetho nemiyalo yawo kanye neemiso zawo. Umnqopho wakhe bekukubumba kuye umuntu oyedwa ngokuhlanganisa ababili, ngalokho enze ukuthula,

¹⁶ kuthi emzimbeni owodwa lowo enze ababili babuyisane noZimu esiphambanweni aphelisa ngaso ubutha.

¹⁷ Alo-ke, uKrestu weza watjhumayela ukuthula kini nina ebenikude nakilabo ebebaseduze,

¹⁸ ngombana ngaye, soke sikghona ukufikelela kuBaba ngoMoya munye.

¹⁹ Ngalokho-ke, anisesemiqhamuka namaphandle, kodwana nizizakhamuzi kanye nabantu bakaZimu begodu nimalunga womndeni kaZimu.

²⁰ Nakhelwe phezu kwesisekelo sabapostoli nabaphorofidi ngoKrestu Jesu ngokwakhe, olilitje elisisekelo.

²¹ Kuye kuhlanganiswe umakhiwo woke, uphakame ube lithempeli elicwengileko kuSomnini.

²² Nani-ke, niyakhiwa ndawonye kuye kobana nibe yindlu lapha kuhlala khona uZimu ngoMoya wakhe.