KWEBE-EFESU 1 - IsiNdebele 2012 Translation

Ukulotjhisa

¹ UPowula umpostoli kaKrestu Jesu ngokwentando kaZimu, kibo abacwengileko abase-Efesu nabathembekileko kuKrestu Jesu:

² Akube kini ukuthula nomusa ovela kuZimu uBaba neKosi uJesu Krestu.

Iimbusiso zakaMoya ngoKrestu

³ Akadunyiswe uZimu nonguYise weKosethu uJesu Krestu, osibusisileko embusweni wezulu ngazo zoke iimbusiso zakaMoya kuKrestu.

⁴ Wasikhethela kuye ngaphambi kokudalwa kwephasi kobana sibe ngabacwengileko nabamsulwa ebusweni bakhe. Ngethando

⁵ waqunta ngaphambilini bona sithathwe njengabantwana bakhe ngoJesu Krestu, ukuya ngokuthanda kwakhe nangentando yakhe,

⁶ kiyo indumiso yomusa wakhe ophazimulako asinikele wona ngesihle ngaloyo amthandako!

⁷ Kuye sinesihlengo ngeengazi zakhe, ukucolelwa kwezono, ukuya ngomusa omkhulu kaZimu

⁸ awuthela phezu kwethu ngokuhlakanipha koke nangokuzwisisa.

⁹ Wasazisa ngokuhlakanipha koke nangokulemuka iimangaliso zentando yakhe, ukuya ngokomnqopho wakhe awuveza ngoKrestu

¹⁰ njengehlelo lokupheleliswa kweenkhathi, ukuhlanganisa zoke izinto kuye, iye, izinto ezisezulwini nezisephasini.

¹¹ Kuye godu sakhethwa, saquntelwa ngaphambilini ukuya ngehlelo laloyo owenza koke ngokukhambisana nehloso yentando yakhe,

¹² ukuze kuthi thina ebesingebokuthoma ukwethemba kuKrestu, sidumise iphazimulwakhe.

¹³ Nani-ke nafakwa kuKrestu lokha nanizwa ilizwi leqiniso, ivangeli lesindiso yenu. Senikholiwe, nabekwa kuye itshwayo ngesigibo, ekunguMoya oCwengileko owathenjiswako.

¹⁴ Yena osibambiso esiqinisa ilifa lethu bekufike ukuhlengwa kwalabo abaselifeni lakaZimu, kilo idumo lephazimulwakhe.

Umthandazo kaPowula

¹⁵ Ngalokho-ke, soloko ngezwa ngokukholwa kwenu eKosini uJesu kanye nethando lenu kibo boke abacwengileko,

¹⁶ azange ngilise ukunithokoza, ngihlala nginikhumbula emithandazwenami.

¹⁷ Ngihlala ngikhombela bona uZimu weKosethu uJesu Krestu, uBaba wephazimulo, aniphe uMoya wokuhlakanipha nesambulo ukuze nimazi ngcono.

¹⁸ Godu ngithandazela bona inga amehlo weenhliziyo zenu angavuleka ukuze nazi ithemba anibizela kilo, umnono welifa lakhe eliphazimulako kabacwengileko

¹⁹ namandla wakhe angalinganisekiko ngobukhulu, kithi abakholwako. Amandla lawo afana nokusebenza kwesiphanga sakhe,

²⁰ iye, amandla avusa ngawo uKrestu kabafileko, wambeka ngesigomeni sakhe embusweni wezulu,

²¹ ngaphezu kwakho koke ukubusa kanye negunya, amandla nobukhosi kanye namabizo woke angabizwa ngawo, ingasi esikhathinesi kwaphela kodwana nakileso esizako.

²² UZimu wabeka koke ngaphasi kweenyawo zakaKrestu, wambeka bona abe yihloko phezu kwakho koke kwebandla,

²³ elimzimba wakhe nelikuzaliseka kwakhe ozalisa koke ngazo zoke iindlela.