KWEBEROMA 9 - IsiNdebele 2012 Translation

Ukukhethwa kwaka-Israyeli nguZimu

¹ Ngikhuluma iqiniso kuKrestu, angirhwayi amanga; nonembezami uyakuqinisa lokho ngoMoya oCwengileko,

² nangisithi nginokudabuka okukhulu nobuhlungu obungapheliko ehliziyweni yami.

³ Ngitjho ngombana bengingafisa bona mina ngokwami ngithukwe bengijutjwe kuKrestu ngebanga labazalwana bami, iye iinhlobo zami ngenyama.

⁴ Bona bama-Israyeli, baphiwe ukwenziwa abantwana bakaZimu, iphazimulo, iimvumelwano, ukunikelwa umthetho, ukulotjha kanye neenthembiso.

⁵ Bayinzalo yabokhokho lapha kuvela khona uMesiya ngokwenyama, ongikho koke, obusiswe nguZimu isiphelani. Amen.

⁶ Akusingathi ilizwi lakaZimu lihlulekile ngombana akusiwo woke ama-Israyeli angewakwa-Israyeli mbala.

⁷ Begodu akusibo boke abantwana baka-Abrahamu abaziinzukulwana zakhe zamambala, kodwana “iinzukulwana zakho zizokuthiyelelwa ngo-Isaka.”

⁸ Lokhu kutjho bonyana abantwana bakaZimu akusibo benyama kodwana bantwana besithembiso ababalelwa eenzukulwaneni

⁹ ngombana nakhu okwatjhiwo sithembiso: “Ngesikhathi esifaneleko, ngaso lesisikhathi ngizakubuya, begodu noSara uzabe sele anendodana.”

¹⁰ Akugcini lapho kwaphela, nakuRabega kwenzeka soneso lokha nagade azithwele abantwana bendoda yinye, engukhokho wethu u-Isaka.

¹¹ Khonapho kwathi bangakabelethwa namkha benze nanyana yini ehle namkha embi (ukuze umnqopho kaZimu wokukhetha uragele phambili

¹² ingasi ngokwemisebenzi kodwana ngokubizwa kwakhe) uRabega watjelwa kwathiwa: “Omkhulu uzakukhothamela omncani”,

¹³ njengombana umtlolo uthi: “UJakopo ngamthanda, kodwana u-Esewu ngamlahla.”

¹⁴ Alo, sizakuthini na? Sizakuthi uZimu akakalungi? Awa, nakanye!

¹⁵ Angithi wathi kuMosi: “Ngizokurhawukela engimrhawukelako, ngizwele engimzwelako.”

¹⁶ Yeke akuyi ngentando yomuntu namkha ngamandlakhe, kodwana kuya ngomusa kaZimu

¹⁷ ngombana umtlolo uthi kuFaro: “Ngakwenyusela khona lokhu kobana ngiveze amandlami ngawe nokobana ibizo lami libatjazwe kilo loke iphasi.”

¹⁸ Yeke urhawukela afuna ukumrhawukela, enze bukhuni afuna ukumenza bukhuni.

Ubukhali kanye nomusa kaZimu

¹⁹ Wena-ke uzakuthi kimi: “Alo-ke, usasolelani na? Ngubani ongajamelana nentando yakhe na?”

²⁰ Kodwana ungubani-ke wena kobana ungaphendulana noZimu na? Okubunjiweko kungatjho njani kumbumbi ukuthi: “Ungibumbeleni ngaba nje na?”

²¹ Umbumbi akanalo ilungelo phezu komdaka na? Angithi ngawo umdaka lowo angabumba isitja esikhethekileko godu enze esinye esingakakhetheki?

²² Sizakwazi ngani nakube uZimu, ngokuthanda ukubonisa ubukhali bakhe kanye nokwazisa amandlakhe, ubekezelele khulu ngesineke izitja afanele azithukuthelele, ezibekelwe ukubhujiswa na?

²³ Sizakwazi ngani bona mhlambe wenze lokho ukuze kuthi lezo azibekele umusa, iye lezo azilungiselele umusa phambilini, azazise umnono wephazimulwakhe ayilungiselela zona na?

²⁴ Iye, kufaka ngitjho nathi asibizileko, ingasi hlangana namaJuda kwaphela kodwana naphakathi kwabatjhili.

²⁵ Kunjengobana asitjho kuHosiya: “Abantu ebekungasibo bami, ngizababiza bona ngebami, naloyo obekangathandeki ngithi ‘unguthandiwe’.”

²⁶ “Nendaweni lapho kwathiwa kibo, “ ‘Anisibo abantu bami,’ lapho bazakubizwa bona babantwana bakaZimu ophilako.”

²⁷ U-Isaya umemezela ngo-Israyeli uthi: “Nanyana isibalo sama-Israyeli besingangetjhwabatjhwaba yelwandle, misalela kwaphela ezakusindiswa.

²⁸ Ngombana uSomnini uzosiphetha isigwebo sakhe ephasinapha ngokurhaba nangokuphelelisa.”

²⁹ Kunjengombana u-Isaya atjhwile ngaphambilini ukuthi: “Nakube uSomnini uMninimandla woke ubengakasitjhiyeli isizukulwana, besizokuba njengeSodoma, sifane neGomora.”

Ukungakholwa kwama-Israyeli

³⁰ Alo, sizakuthini na? Abatjhili abangazange batjhabatjhekele ukulungisiswa, bakufumene, okutjho ukulungisiswa ngokukholwa,

³¹ kodwana ama-Israyeli ebegade atjhabatjhekela ukulungisiswa ngomthetho, azange aphumelele ukuthobela umthetho lowo.

³² Ngebanga lani na? Ngebanga lokobana angazange akutjhabatjhekele ngokukholwa kodwana kwaba inga kungokwezenzo zawo. Akhutjwa elitjeni elisikhubekiso,

³³ njengombana kutlolwe kwathiwa: “Qalani, ngibeka eZiyoni, ilitje elizokwenza abantu bakhubeke, idwala elizobenza bawe, nje-ke loyo okholwa kuye, angeze ajabhiswa.”