KWEBEROMA 8 - IsiNdebele 2012 Translation

Ukuphila kuMoya

¹ Yeke akusekho ukulahlwa kilabo abakuKrestu Jesu

² ngombana umthetho kaMoya wokuphila okuKrestu Jesu, ukukhululile emthethweni wesono newokufa.

³ Lokho umthetho ogade unganamandla wokukwenza ngebanga lokwenziwa buthakathaka yimvelo yesono, uZimu wakwenza ngokuthumela iNdodanakhe ngobujamo bomuntu wokona kobana ibe mhlabelo wehlambululo

⁴ ukuze okulungileko okufunwa mthetho kuzaliseke kithi, thina esingakhambi ngokwenyama kodwana ngokoMoya.

⁵ Labo abaphila ngokwenyama babeka imikhumbulwabo ezintweni zenyama, kodwana abaphila ngokukaMoya babeka imikhumbulwabo kokukaMoya.

⁶ Ukubeka umkhumbulo kokwenyama kukukufa, kodwana ukubeka umkhumbulo kokukaMoya kukuphila kanye nokuthula.

⁷ Ngesizathweso-ke umkhumbulo osenyameni ulinaba kuZimu; awuthobeli umthetho kaZimu, ngambala angekhe wakghona ukuwuthobela.

⁸ Labo ababuswa yinyama angekhe bamthokozisa uZimu.

⁹ Kodwana nina anisisenyameni, nikuMoya ngombana uMoya kaZimu uhlala ngaphakathi kwenu. Umuntu onganaye uMoya kaKrestu akasuye wakaKrestu.

¹⁰ Kodwana nangabe uKrestu ungaphakathi kwenu, nanyana umzimba wenu ufile ngebanga lesono, ummoya wenu unokuphila ngebanga lokulunga.

¹¹ Nangabe uMoya waloyo owavusa uJesu ekufeni, uphila ngaphakathi kwenu, loyo owavusa uKrestu ekufeni uzokunikela imizimba yenu ebhubhako ukuphila, ngaye uMoya ohlala ngaphakathi kwenu.

¹² Nje-ke bazalwana, sinesibopho kodwana ingasi enyameni kobana singabe siphile ngokufuna kwayo.

¹³ Ngitjho ngombana naniphila ngokwenyama, nizokufa; kodwana naniphila ngokoMoya, nibulala izenzo ezimbi zomzimba, nizokuphila

¹⁴ ngombana labo abarholwa nguMoya kaZimu, babantwana bakaZimu.

¹⁵ Azange namukeliswe ummoya onenza bona nibe makhoboka godu benesabe, kodwana namukele uMoya onenza nibe bantwana bakaZimu. Yeke ngaye siyabiza sithi: “Aba, Baba!”

¹⁶ UMoya ngokwakhe ufakazela ummoya wethu bonyana sibantwana bakaZimu.

¹⁷ Nje-ke nakube sibantwana, kutjho bona siziindlalifa, iye, iindlalifa zakaZimu begodu siziindlalifa kanye noKrestu nakube ngambala sihlanganyela eenhluphekweni zakhe ukuze sihlanganyele naye ephazimulwenakhe.

Iphazimulo ezako

¹⁸ Ngiyaqinisa bonyana iinhlupheko zesikhathesi azisililitho nazilinganiswa nephazimulo esizokwambulelwa yona.

¹⁹ Indalo ilindele ngetjisakalo yokulabalabela bona abantwana bakaZimu babonakaliswe.

²⁰ Yeke indalo yenziwa into enganamsebenzi, ingasi ngokwentando yayo, kodwana ngokwentando yaloyo oyenze yaba njalo, ngethemba

²¹ lokobana indalo leyo ngokwayo izokutjhatjhululwa ekubotjhweni kwayo, ibole bese ilethwa ekululekweni ephazimulako yabantwana bakaZimu.

²² Siyazi bona yoke indalo beyiquma inemirhelo bekube kunjesi;

²³ begodu ingasi indalo kwaphela, kodwana nathi ngokwethu, thina esineenthelo zokuthoma zakaMoya, sibubulela ngaphakathi khibe silindele ngetjisakalo ukwenziwa abantwana bakaZimu, okukuhlengwa kwemizimba yethu.

²⁴ Ngitjho ngombana sasindiswa ethembeni. Kodwana ithemba elibonwako akusilo ithemba ngombana ngubani onethemba ngento asele anayo na?

²⁵ Kodwana nasinethemba ngalokho esingakakuboni, sikulindela ngokunyamezela.

²⁶ Ngokunjalo uMoya uyasisiza ebuthakathakeni bethu ngombana asikwazi ekumele sikuthandazele. Kodwana uMoya ngokwakhe usithandazela ngokububula okungekhe kwahlathululwa ngamezwi.

²⁷ UZimu ohlola iinhliziyo, uyakwazi okusemkhumbulweni kaMoya ngombana uMoya uthandazela abacwengileko ngokwentando kaZimu.

²⁸ Siyazi bonyana kilabo abathanda uZimu, wenza bona koke kuhlangane bekubakhambele kuhle, iye, labo ababizwe ngokweminqopho yakhe.

²⁹ Labo uZimu abazi ngaphambilini, wabakhethela bona bafane nesibumbeko seNdodanakhe ukuze ibe lizibulo emndenini omkhulu.

³⁰ Labo abakhetha ngaphambilini, godu wababiza, nalabo ababizileko godu wabalungisisa, nalabo abalungisisako godu wabaphazimulisa.

Ithando lakaZimu ngoKrestu Jesu

³¹ Alo sizakuthini ngezintwezi na? Nakube uZimu ujame ngakithi, ngubani-ke ongajamelana nathi na?

³² Yena ongazange agodle iNdodanakhe, kodwana wayinikela ngebanga lethu soke, akazukusinikela koke ngayo na?

³³ Ngubani ongamangalela abakhethiweko bakaZimu na? NguZimu olungisisako.

³⁴ Ngubani olahla ngomlandu na? NguKrestu Jesu owafako, iye, owavuswa ekufeni, ohlezi ngesigomeni sakaZimu nosincengelako.

³⁵ Ngubani ongasihlukanisa nethando lakaKrestu na? Kghani ingaba kutlhaga, ziinkathazo, kuzunywa, yindlala, kutlhoga izambatho, yingozi namkha yisabula na?

³⁶ Njengombana kutloliwe kwathiwa: “Ngebanga lakho sibulawa imihla yoke, sesesifana nezimvu zokuhlatjwa.”

³⁷ Kodwana kikho koke lokho singaphezu kwabahluli ngaye owasithandako.

³⁸ Nje-ke ngineqiniso lokobana akunalitho, nanyana kungaba kukufa, kuphila, ziingilozi, babusi, zizinto ezikhona, zizinto ezizakubakhona, mibuso,

³⁹ kuphakama, kuzika, nanyana kungaba yini edaliweko ezasihlukanisa nethando lakaZimu kuKrestu Jesu iKosethu.