KWEBEROMA 7 - IsiNdebele 2012 Translation

Isiboniso ngomtjhado

¹ Bazalwana, ngikhuluma nalabo abazi umthetho; kghani anazi bonyana umthetho uba sibopho phezu komuntu, kwaphela umuntu loyo nasaphilako na?

² Ngaleyondlela umfazi ngokomthetho ubopheleleke endodenakhe qobana isaphila; kodwana yahlongakala, uyatjhatjhululwa emthethweni omayelana nendodakhe.

³ Ekhabo lakhona, uzakubizwa bona sihlobongi nakube wenda kenye indoda khisibe yakhe isaphila. Kodwana nasele indodakhe ihlongakele, utjhaphulukile emthethweni lowo, nje-ke nakube wenda kenye indoda, akabi sihlobongi.

⁴ Nakini-ke kunjalo, bazalwana; nafa emthethweni ngomzimba kaKrestu ukuze nibe ngewomunye, loyo owavuswa ekufeni ukuze sithelele uZimu iinthelo.

⁵ Lokha nabesisaphila enyameni, iinkanuko zethu zokona, ebezivuswa mthetho, bezisebenza ezithweni zethu kobana sithele iinthelo zokufa.

⁶ Kodwana kwanjesi sitjhatjhululiwe emthethweni, safa kilokho ebekusibophile ukuze sibe makhoboka angasi ngaphasi komthetho wakade otloliweko kodwana angaphasi kwepilo etja yakaMoya.

Umthetho nesono

⁷ Alo-ke sizakuthini na? Kghani sizakuthi umthetho usisono? Awa, nakanye! Nokho nagade kungasi ngebanga lomthetho, bengingekhe ngasazi isono. Bengingekhe ngazi bona kuyini ukukhanuka nabethana umthetho akhange uthi: “Ungakhanuki.”

⁸ Kodwana isono safunyana ithuba ngomyalo, saveza kimi yoke imihlobo yekanuko. Ngaphandle komthetho, isono sife ukufa.

⁹ Ngakhe ngaphila ngaphandle komthetho. Kodwana kwathi nakufika umyalo, isono savuka,

¹⁰ yeke ngafa. Kwathi wona umyalo lowo obewufanele ungilethele ukuphila, wabonakala ukukufa kimi

¹¹ ngombana isono safunyana ithuba ngomyalo, sangilutha, bekwathi ngawo sangibulala.

¹² Nje-ke umthetho ucwengile nomyalo ucwengile, ulungile begodu muhle.

¹³ Alo, kutjho bona lokho okuhle kwaletha ukufa kimi na? Awa, nakanye! Kwaba sisono esangena nokufa kimi ngokusebenzisa okuhle ukuze isono sibonakaliswe sisisono, begodu kuthi ngomyalo sibe sisono sakosono.

Irarano elingaphakathi kwami

¹⁴ Siyazi bona umthetho ungewokommoya, kodwana mina ngingowenyama, ngathengiselwa ebukhobokeni ngaphasi kwesono.

¹⁵ Angizipheleli ngombana angenzi lokho engikuthandako, kodwana ngenza kanye lokho engingakufuniko.

¹⁶ Nje-ke, nakube ngenza lokho engingakufuniko, kutjho bona ngiyavuma bonyana umthetho muhle.

¹⁷ Emanyeni akusesengimi owenza lokho, kodwana ngikwenziswa sisono esikimi

¹⁸ ngombana ngiyazi bona akunalitho elilungileko elihlala ngaphakathi kwami, lokho kusemvelwenami yenyama. Ngingathanda ukwenza okuhle kodwana ngiyabhalelwa bona ngikwenze

¹⁹ ngombana angenzi okuhle engithanda ukukwenza, kodwana okumbi engingafuni ukukwenza, ngiyakwenza.

²⁰ Nangabe ngenza lokho engingathandi ukukwenza, khona-ke angizipheleli, ngenziswa sisono esihlala ngaphakathi kwami.

²¹ Ngalokho-ke ngikufunyana kumthetho ongibusako wokobana nangifuna ukwenza okuhle, ubumbi bungilalele eduze.

²² Emanyeni ngithatjiswa mthetho kaZimu ngaphakathi kwami,

²³ kodwana ngibona ezithweni zami kunomthetho omunye olwisana nomthetho womkhumbulwami, ungenza ngibe likhoboka lomthetho wesono ohlala ngaphakathi kwezitho zami.

²⁴ Maye mina ngilisizi! Ngubani ozongikhulula kilomzimba wokufa na?

²⁵ Akathokozwe uZimu ngoJesu Krestu iKosethu! Nje-ke ngomkhumbulwami ngilikhoboka emthethweni kaZimu, kodwana ngenyama yami ngilikhoboka emthethweni wesono.