KWEBEROMA 6 - IsiNdebele 2012 Translation

Ukufa nokuvuka noKrestu

¹ Alo-ke sizakuthini na? Kufanele sirage siphile esonweni ukuze kuvame umusa na?

² Nakanye! Thina esesafa esonweni, singaraga njani siphile kiso na?

³ Kghani anazi bonyana soke thina esabhabhadiselwa kuKrestu Jesu, sabhabhadiselwa ekufeni kwakhe na?

⁴ Nje-ke sabulungwa kanye naye ngokubhabhadiselwa ekufeni ukuze kuthi njengombana uKrestu avuswa ekufeni ngephazimulo kaBaba, ngokunjalo nathi sikhambe epilweni etja.

⁵ Nangabe besihlanganiswe naye ekufeni kwakhe, ngambala sizokuhlanganiswa naye nekuvukeni kwakhe.

⁶ Siyazi bona umuntu wethu omdala wabethelwa naye esiphambanweni ukuze kuthi umzimba wesono ulahlwe, singabe sisaba makhoboka wesono

⁷ ngombana nanyana ngubani ofileko, ukhululiwe emandleni wesono.

⁸ Kodwana nakube sife noKrestu, siyakholwa bonyana sizokuphila naye.

⁹ Siyazi bonyana njengombana uKrestu avuswa kabafileko, angekhe abuye afe godu, nokufa akusenawo amandla phezu kwakhe.

¹⁰ Ukufa akufako, wakufela esonweni kwaba kanye; kodwana ukuphila akuphilako, ukuphila kuZimu.

¹¹ Ngokunjalo-ke nani kufanele nizithathe njengabafileko mayelana nesono, kodwana niphile kuZimu ngoKrestu Jesu.

¹² Nje-ke ningasavumeli isono bona sibuye sibuse imizimba yenu ebhubhako besinenze bona nithobele iinkanuko zayo.

¹³ Ningabe nisanikela izitho zenu zomzimba esonweni kobana sizisebenzise njengeensetjenziswa zobukhohlakali, kodwana zinikeleni kuZimu njengalabo ababuyiswe ekufeni basiwa ekuphileni, ninikele izitho zemizimba yenu kuZimu njengeensetjenziswa zokulunga.

¹⁴ Ngaleyondlela isono angeze sabusa phezu kwenu njengombana ningasingaphasi komthetho kodwana ningaphasi komusa.

Amakhoboka wokulunga

¹⁵ Alo sizakuthini na? Sizakona ngombana batjho asisingaphasi komthetho kodwana singaphasi komusa na? Nakanye!

¹⁶ Kghani anazi bona lokha nanizinikela kinanyana ngubani njengamakhoboka alalelako, niba makhoboka waloyo enimthobelako na? Ningaba makhoboka wesono esirholela ekufeni namkha nibe makhoboka wokulalela okurholela ekulungisisweni.

¹⁷ Kodwana akadunyiswe uZimu kobana nina enakhe naba makhoboka wesono, sele ningabalalelako ukuthoma ehliziyweni ukuya endleleni yesifundo enamukeliswa sona,

¹⁸ nokobana nikhululiwe esonweni, naba makhoboka wokulunga.

¹⁹ Ngikhuluma ngendlela ejayelekileko ngebanga lobuthakathaka benyama yenu. Njengombana nakhe nanikela izitho zenu njengamakhoboka wokusilapheleko esiphambekweni esikhulu khulu, nje-ke nikelani izitho zenu njengamakhoboka wokulunga kikho ukucwengiswa.

²⁰ Lokha nanisesemakhoboka wesono, benitjhaphulukile mayelana nokulunga.

²¹ Alo, nazuzani nje ngezinto esele nineenhloni ngazo namhlanjesi na? Isiphetho sezintwezo kukufa.

²² Kodwana gadesi njengombana sele nikhululiwe esonweni benaba makhoboka kaZimu nje, umvuzo eniwufunyanako kucwengiswa. Isiphetho salokho kuphila okungapheliko.

²³ Umvuzo wesono kukufa; kodwana isipho somusa kaZimu sikuphila okungapheliko ngoKrestu Jesu iKosethu.