KWEBEROMA 3 - IsiNdebele 2012 Translation

¹ Kusiza ngani ukuba mJuda namkha kuqakatheke ngani ukusoka na?

² Kusiza khulu ngazo zoke iindlela. Kokuthoma amaJuda aphathiswe umlayezo kaZimu.

³ Alo, kwenzakalani nakube abanye azange bathembeke na? Ukungakholwa kwabo kuzakwenza bona ukwethembeka kwakaZimu kube lilize na?

⁴ Nakanye! Nanyana woke umuntu amleyimala, uZimu yena uneqiniso njengombana kutloliwe kwathiwa: “Ukuze uhlanjululwe emezwinakho, uhlule ekugwebeni kwakho.”

⁵ Kodwana nangabe ukungalungi kwethu kubonakalisa ukulunga kwakaZimu, sizokuthini na? Sithi uZimu akakalungi nasihlunguphaza ngetukuthelo na? (Ngikhuluma ngendlela yabantu).

⁶ Nakanye! Nabegade kunjalo, uZimu ubezaligweba njani iphasi na?

⁷ Kodwana nakube ngamangami iqiniso lakaZimu landisa iphazimulwakhe, ngisabekelwani-ke umlandu wokuba sisoni na?

⁸ Kungebanga lani-ke singathi: “Asenzeni okumbi ukuze kuvele okuhle” na? Iye, sitjho njalo njengombana abantu abathileko nabasithukako bathi sitjho njalo. Abantwabo, ukulahlwa kwabo kubafanele.

Akakho noyedwa olungileko

⁹ Alo-ke sizakuthini na? Sizakuthi singcono kunabanye na? Awa, nakanye, ngombana sele sibamangalele boke labo ngokuthi bangaphasi kwamandla wesono, okutjho umJuda nomGirigi,

¹⁰ njengombana kutloliwe kwathiwa: “Akakho olungileko, ngitjho noyedwa tere.

¹¹ Akakho noyedwa olemukako, akakho noyedwa ofuna uZimu.

¹² Boke baphambukile, baphenduke baba msuqwa ndawonye. Akakho okhombisa isisa, akakho ngitjho noyedwa tere.

¹³ Imiphimbo yabo imaliba avulekileko; basebenzisa amalimabo ukukhohlisa. Isihlungu seenyoka singaphasi kweembhena zabo.

¹⁴ Imilomo yabo izele ukwethukana nobumunyu.

¹⁵ Iinyawo zabo zimsinyana ekuthululeni iingazi.

¹⁶ Icucu nesizi kusendlelenabo,

¹⁷ indlela yokuthula abayazi.

¹⁸ Ukwesaba uZimu akukho emehlwenabo.”

¹⁹ Gadesi sele sisazi bona nanyana yini etjhiwo mthetho, imalungana nalabo abangaphasi komthetho ukuze yoke imilomo ithuliswe, nephasi loke libe nokuziphendulela kuZimu.

²⁰ Akunamuntu ozakulungisiswa phambi kwakhe ngemisebenzi etjhiwo mthetho ngombana emthethweni kuvela ilwazi lesono.

Ukulungisiswa ngokukholwa

²¹ Kodwana kwanjesi, ngaphandle komthetho, ukulunga kwakaZimu sele kwembuliwe, begodu kufakazelwa mthetho nabaphorofidi,

²² ukulunga kwakaZimu ngokukholwa kuJesu Krestu kibo boke abakholwako. Nje-ke akunamehluko,

²³ ngombana boke bonile, batlhayelelwa yiphazimulo kaZimu.

²⁴ Kodwana kwanjesi sele balungisiswa ngomusakhe njengesipho ngokuhlengwa okukuKrestu Jesu,

²⁵ uZimu anikela ngaye njengomhlabelo wesono ngeengazi zakhe, ngokukholwa. Wakwenza lokho ukubonisa ukulunga kwakhe ngombana ngokubekezela kwakhe kobuZimu, azange abale izono ezenziwe phambilini.

²⁶ Lokho bekukubonisa kilesikhathi bonyana yena ngokwakhe ulungile begodu ulungisisa loyo okholwa kuJesu.

²⁷ Alo-ke kuphi ukuzigqaja na? Akubalwa nokubalwa. Ngamuphi umthetho na? Ngomthetho wemisebenzi? Awa, kodwana ngomthetho wokukholwa.

²⁸ Thina esiyiphetheko ngethi umuntu ulungisiswa ngokukholwa ngaphandle kwemisebenzi etjhiwo mthetho.

²⁹ Kghani uZimu lo nguZimu wamaJuda kwaphela na? Akasuye nowabatjhili na? Iye, nabatjhili unguZimabo,

³⁰ ngombana uZimu munye; begodu uzokulungisisa abasokileko ngeenzathu zokukholwa nabangakasoki ngakho ukukholwa lokho.

³¹ Alo-ke, ingabe siyawulahla umthetho ngebanga lokukholwa lokhu na? Nakanye! Kodwana esikhundleni salokho siyawuhlonipha umthetho.