KWEBEROMA 2 - IsiNdebele 2012 Translation

Isigwebo esilungileko sakaZimu

¹ Yeke awunalo izaba, nanyana ungaba ngubani, wena ogweba abanye; nawugweba omunye umuntu uzilahla wena ngombana uthi ugweba abanye nje khibe nawe wenza yona into abayenzako leyo.

² Siyazi bona isigwebo sakaZimu kilabo abenza izinto ezinjalo singokweqiniso.

³ Alo-ke wena, nanyana ungaba ngubani, udlumbana bona nawugweba labo abenza okunjalo khonapho khibe nawe uyakwenza lokho, uzakuphunyurha esigwebeni sakaZimu na?

⁴ Kghani unyaza umusa omkhulu kaZimu nokunyamezela kwakhe okubanzi na? Awuboni bonyana uZimu unomusa ngombana uhlose bona utjhuguluke na?

⁵ Kodwana ngobulikhuni bakho nangehliziyo engatjhugulukiko, uzikghubelelela itukuthelo ngelanga lelaka elizako lokha ukugweba okulungileko kwakaZimu nakwembulwako.

⁶ Uzakuvuza omunye nomunye ngokwemisebenzakhe:

⁷ Labo abaphikelele njalo ukwenza okulungileko, barhuluphele iphazimulo nedumo nokungabhubhi; uzobapha ukuphila okungapheliko.

⁸ Kodwana labo abazifunela kwabo nabangalaleli iqiniso, balalela ukukhohlakala, bazokwehlelwa lilaka netukuthelo.

⁹ Kuzokuba khona isizi neenhlungu kibo boke abenza ubumbi; kuzokuthoma ngomJuda kulandele umGirigi,

¹⁰ kodwana kibo boke abenza okulungileko, kuzokuba khona iphazimulo, idumo nokuthula; kuthome ngomJuda kulandele umGirigi

¹¹ ngombana uZimu akakhethi ubuso.

¹² Boke abone bangaphandle komthetho, bazokubhujiswa bangaphandle komthetho; nabo boke abone bangaphasi komthetho, bazokugwetjwa ngomthetho.

¹³ Yeke akusibo abezwa umthetho abangabalungileko phambi kwakaZimu, kodwana ngabenza okutjhiwo mthetho, labo-ke ngibo abazokulungisiswa.

¹⁴ Lokha abatjhili, abanganawo umthetho, nabaphetha okutjhiwo mthetho ngaphandle kokuyalwa, labo-ke, nanyana banganawo umthetho, bamthetho ngokwabo.

¹⁵ Bayakhombisa bonyana lokho okufunwa mthetho kutlolwe ngeenhliziyweni zabo, okufakazelwa ngunembeza wabo, nemikhumbulo yabo evuthako iyabalahla namkha ibahlambulule

¹⁶ ngelanga, ukuya ngokwevangeli lami, mhlana uZimu azokugweba ngalo imicabango efihlakeleko yabo boke, ngoJesu Krestu.

AmaJuda kanye nomthetho

¹⁷ Wena-ke ozibiza ngomJuda bese uthembela emthethweni bewuzigqaje ngokuba nobudlelwano noZimu,

¹⁸ wazi intandwakhe bewuqunte nokobana ngikuphi okulungileko ngombana wena ukhamba ngomthetho;

¹⁹ begodu unesiqiniseko sokobana umhlahli wesiphofu, umkhanyo walabo abasebumnyameni;

²⁰ umyali weendlhayela, umfundisi wabantwana, unalo loke ilwazi lomthetho neqiniso,

²¹ alo-ke, wena ofundisa abanye, kubayini ungazifundisi wena na? Utjhumayela ngokujamelana nokweba khibe ngapha wena uyeba na?

²² Wena ojamelene nokuhlobonga, uyahlobonga na? Wena onyenya abosingazimu, udlelezelelani amathempeli?

²³ Wena ozigqaja ngomthetho, uhlubukelani uZimu ngokwephula umthetho na?

²⁴ Iye, kutloliwe kwathiwa: “Ibizo lakaZimu liyahlanjalazwa phakathi kwabatjhili ngebanga lakho.”

²⁵ Ukusoka kunobubhadekelo nakube uphetha umthetho, kodwana nawephula umthetho, ukusoka kwakho semlunga ungakasoki.

²⁶ Yeke nakube labo abangakasoki baphetha okufunwa mthetho, ukungasoki kwabo akuzukuthathwa njengokusoka na?

²⁷ Ngalokho-ke abangakasoki enyameni kodwana abaphetha umthetho bazonilahla nina eninomthetho otloliweko begodu ninokusokwa kodwana nibe nephula umthetho.

²⁸ Umuntu akabi mJuda ngokubonakala ngaphandle, ngokunjalo nokusoka kwamambala akusikho okubonakalako nokwangaphandle.

²⁹ Kodwana umuntu uba mJuda ngaphakathi, ngokunjalo nokusoka kwamambala ngokwehliziyo, kuyinto kaMoya, akusingokwenyama. Umuntu onjalo ufunyana idumo kuZimu, ingasi ebantwini.