KWEBEROMA 16 - IsiNdebele 2012 Translation

Ukulotjhisa

¹ Ngiyambuka kini udadwethu uFuwebe, oyinceku yebandla leKhengirheriya.

² Ngibawa bona nimamukele eKosini njengokufanele abacwengileko, nimsize ngakho koke angahle akudinge kini ngombana ube lisizo elikhulu kabanengi, nakimi.

³ Ngilotjhiselani kuPriska no-Akuyila, ababasebenzi kanye nami kuKrestu Jesu,

⁴ ababeka ipilwabo engozini ngebanga lami. Akusimi ngedwa obathokozako kodwana namabandla woke wabatjhili ayabathokoza.

⁵ Ngilotjhiselani nebandleni elihlanganyela emzini wabo. Yeningilotjhisele nemnganini wami othandekako u-Epayinetosi okwaba nguye umuntu wokuthoma esifundeni se-Asiya owatjhugulukela kuKrestu.

⁶ Lotjhisani nakuMariya, owanisebenzela kabudisi.

⁷ Lotjhisani u-Andronikha noJuniyasi abaziinhlobo zami ebengibotjhwe nabo. Baziwa khulu hlangana nabapostoli ngombana bona batjhugulukela kuKrestu qangi kunami.

⁸ Ningilotjhisele ku-Ampliyatusi, engimthanda khulu eKosini.

⁹ U-Uribanosi osisebenzi kanye nathi kuKrestu naye nimlotjhise kanye nomngani othandekako uStarhisi.

¹⁰ Lotjhisani u-Aphelesi ozizinywe bewamukeleka kuKrestu. Lotjhisani nakebomndeni ka-Aristobulusi

¹¹ nakuHerodiyona isihlobo sami. Nilotjhise nakebomndeni kaNarikisu abaseKosini.

¹² Ningilotjhisele nakuTrayifina noTrayifosa abaziinsebenzi eKosini. Ningakhohlwa uPherisisi othandekako naye osebenza nzima eKosini.

¹³ Ngilotjhiselani kuRufusi okhethiweko eKosini nakunina obekaseze angumma nakimi.

¹⁴ Ningilotjhisele ku-Asugikritusi, uFlegoni, uHerimesi, uPatrobhasi, uHerimasi kanye nabazwalana abanabo.

¹⁵ Lotjhisani uFilologosi, uJuliya, uNeriyusi nodadwabo, u-Olimpasi nabo boke abacwengileko abakanye nabo.

¹⁶ Lotjhisanani ngokukhethekileko. Amabandla woke kaKrestu ayanilotjhisa.

Imiyalo yokugcina

¹⁷ Ngiyanincenga bazalwana bona nibayelele labo ababanga ukwahlukana bese banibekela iinqabo endleleni yenu eziphikisana nesifundo enisifundileko. Khambelani kude nabo

¹⁸ ngombana abantu abanjalo abalotjhi iKosethu uKrestu, kodwana balotjha izisu zabo.

¹⁹ Boke sebezwile ngokuzithoba kwenu, nje-ke ngithabe khulu kwamambala ngani. Kodwana ngithanda bona nihlakaniphe kokuhle, nibe msulwa kokumbi.

²⁰ Akusesekude bona uZimu wokuthula aqhoboze uSathana ngaphasi kweenyawo zenu. Sengathi umusa weKosi yethu uJesu ungaba nani.

²¹ Uyalotjhisa kini uThimothi esibambisene naye kanye noLukiyasi, uJasoni noSosipatrosi abaziinhlobo zami.

²² Mina Teritiyusi omtloli wencwadi le, ngiyanilotjhisa eKosini.

²³ UGayusi osiphethe kuhle khulu nebandla loke lapha, naye uyalotjhisa. U-Erastusi omphathisikhwama wedorobhenapha kanye nomzalwana wethu uKwaritosi nabo bayalotjhisa.

²⁴ Sengathi umusa weKosi yethu uJesu Krestu ungaba nani noke. Amen.

Isiphetho

²⁵ Kuye onamandla wokuniqinisa ngevangeli lami kanye nokutjhunyayelwa kwakaJesu Krestu, ngokwesambulo sefihlakalo ebeyiseze ifihlakele kusukela ekadeni,

²⁶ kodwana kwanjesi esele yembuliwe bekwathi ngemitlolo yabaphorofidi, yaziswa kizo zoke izizwe ukuya ngomyalo kaZimu wanini nanini, ukuletha ukuzithoba kokukholwa,

²⁷ iye, kuye okunguye yedwa uZimu ohlakaniphileko, akube lidumo isiphelani ngoJesu Krestu! Amen.