KWEBEROMA 15 - IsiNdebele 2012 Translation

Ningazithokozisi nina kwaphela, thokozisani nabanye

¹ Thina esidzimeleleko kufanele sinyamezelele ukuhluleka kwabatekatekako, singazithabisi thina sodwa.

² Ngiloyo naloyo wethu akathabise umakhelwanakhe, kube kuhle kuye, naye akheke.

³ UKrestu azange azithabise yena kwaphela, kodwana njengombana kutloliwe kwathiwa: “Iinhlamba zabakuthukako, ziwele phezu kwami.”

⁴ Koke okwatlolwa ngaphambilini kwatlolelwa ukusifundisa ukuze kuthi ngokunyamezela nangokukhuthazeka kwemitlolo, sibe nethemba.

⁵ Sengathi uZimu wokubekezela newokukhuthazeka anganipha ukuphilisana ngokuzwana ngokukaKrestu Jesu

⁶ ukuze kuthi ngahliziyonye nangelizwi linye nidumise uZimu, uYise weKosethu uJesu Krestu.

⁷ Yamukelanani njengombana uKrestu anamukela ukuze kudunyiswe uZimu.

⁸ Ngiyanitjela ngithi uKrestu waba yinceku yabasokileko ngebanga leqiniso lakaZimu ukuze aqinise iinthembiso ezanikelwa abokhokho,

⁹ nokobana abatjhili badumise uZimu ngebanga lesirhawu sakhe njengombana kutloliwe kwathiwa: “Nje-ke ngizakudumisa Somnini, hlangana nezizwe; ngibhine iingoma zokudumisa ebizweni lakho.”

¹⁰ Godu uthi: “Thabani nina abatjhili nikanye nabantu bakhe.”

¹¹ Godu kwathiwa: “Dumisani uSomnini, noke nina abatjhili; abantu boke abamdumise.”

¹² Godu umphorofidi u-Isaya wabuye wathi: “Ipande yakaJese izakuza, iye, loyo ophakamela ukubusa abatjhili. Abatjhili bazakuba nethemba kuye.”

¹³ Sengathi uZimu wethemba anganizalisa ngethabo loke kanye nokuthula ekukholweni ukuze nande ethembeni, ngamandla kaMoya oCwengileko.

Isizathu sakaPowula sokutlola ngesibindi esingaka

¹⁴ Ngizizwa nginethemba ngani bazalwana bami kobana nina ngokwenu nizele beniphelele ngelwazi nelemuko begodu niyakwazi ukuyalana.

¹⁵ Nokho-ke nginitlolele ngesibindi kamanye amaphuzu ngokunikhumbuza ngebanga lomusa engiwuphiwe nguZimu

¹⁶ kobanyana ngibe yinceku kaKrestu Jesu kabatjhili. Ngiphiwe umsebenzi wobuphristi bona ngimemezele ivangeli lakaZimu ukuze abatjhili babe mnikelo owamukelekako kuye, bacwengiswe ngoMoya oCwengileko.

¹⁷ Yeke ngiyazigqaja kuKrestu Jesu emsebenzinami engiwenzela uZimu.

¹⁸ Ngalokho angizukuvelela, ngikhulume ngananyana yini ngaphandle kwalokho uKrestu akwenze ngami kobana ngizuze ukuzithoba kwabatjhili ngamezwi nangezenzo,

¹⁹ ngamandla weembonakaliso nemikarisomraro, ngamandla kaMoya kaZimu ukuze ngitjhumayele ivangeli lakaKrestu ukusuka eJerusalema ukuya mazombe ne-Iluriko.

²⁰ Bekuseze kuyitjisakalo yami ukutjhumayela ivangeli lapha uKrestu angakaziwa khona ukuze ngingakheli esisekelweni somunye

²¹ njengombana umtlolo usithi: “Labo abangazange khebatjelwe ngaye bazakubona nalabo abangazange khebezwe ngaye bazakulemuka.”

UPowula ubhincela ukuya eRoma

²² Ngilokho-ke ebekuseze kungibamba kanenginengi ukuza kini.

²³ Kodwana kwanjesi, njengombana kungasekho indawo ekumele ngisebenze kiyo eemfundenezi nje, begodu njengombana sele kuminyaka eminengi ngiseze ngihlulukela ukuza kini,

²⁴ ngihlela ukuzonibona lokha nangiya eSipeyini. Nginethemba lokobana ngizazonibona nangidlulako nginikhombele bona ningisize ekhambeni lami lapho nasele ngihlezahlezi nani isikhatjhana.

²⁵ Nokho-ke khona nje ngisaya eJerusalema ukuyokusiza abacwengileko lapho

²⁶ ngombana bathaba kwamambala beMasedoniya nebe-Arhaya ukubuthelela umnikelo wokusiza abadududu eJerusalema.

²⁷ Bakuthabela khulu ukwenza lokho begodu ngambala bebafanele babenzele ngombana nakube abatjhili bahlanganyela eembusisweni zamaJuda zakaMoya, kumele bahlanganyele namaJuda eembusisweni zabo zenyama.

²⁸ Nje-ke nasele ngiwuqedile umsebenzi lo, begodu sele ngiqinisekisile bonyana bafunyana iinthelo lezi, ngizokuya eSipeyini ngidlule nginibona.

²⁹ Ngiyazi bona lokha nangiza kini, ngizokuza ngokuphelela kwesibusiso sakaKrestu.

³⁰ Ngiyanincenga bazalwana, ngeKosi yethu uJesu Krestu nangethando lakaMoya kobana nihlanganyele nami ekutjhabatjhekeni kwami ngokungithandazela kuZimu.

³¹ Iye, thandazani bonyana ngiphephe kabangakholwako eJudiya nokobana umsebenzami eJerusalema wamukeleke kabacwengileko lapho

³² ukuze kuthi ngentando kaZimu, ngize kini ngethabo ngiphumule kanye nani.

³³ Sengathi uZimu wokuthula angaba nani noke. Amen.