KWEBEROMA 14 - IsiNdebele 2012 Translation

Isiyeleliso ngokugweba

¹ Yamukelani loyo onokukholwa okutekatekako ngaphandle kokumgweba ngokunande niphikisana naye.

² Ukukholwa komuntu omunye kumvumela bona agome nanyana yini, kodwana omunye onokukholwa okutekatekako uzigomela imirorho kwaphela.

³ Umuntu ogoma koke akangamqaleli phasi loyo okhethako. Naloyo ongagomi koke angamgwebi loyo osogoma yoke into ngombana naye uZimu umamukele.

⁴ Ungubani-ke wena bona ungazokugweba inceku yomunye umuntu na? Ukujama nokuwa kwayo kukumniniyo. Izakujama ngombana iKosi inamandla wokuyenza bona ijame.

⁵ Omunye umuntu uthi ilanga elinye liqakathekile kunelinye, omunye uthi woke amalanga ayafana. Ngiloyo naloyo akazanelise ehliziywenakhe.

⁶ Loyo onelanga alihloniphako, ulihloniphela ukudumisa iKosi. Naloyo ogoma inyama, uyigomela iKosi ngombana uthokoza uZimu. Naloyo ongagomiko, lokho ukwenzela iKosi begodu uthokoza uZimu.

⁷ Akakho noyedwa wethu oziphilelako, kanti-ke godu akakho noyedwa ozifelako

⁸ ngombana nasiphilako, siphilela iKosi nalokha nasifako sifela iKosi. Nje-ke nanyana siyaphila namkha siyafa, singebeKosi.

⁹ Ngesizathweso uKrestu wafa, wabuye waphila godu ukuze abe yiKosi yabafileko nabaphilako.

¹⁰ Alo, umgwebelani-ke umfowenu na? Namkha kubayini uqalela umfowenu phasi na? Soke nje sizokujama phambi kwesihlalo sokugweba sakaZimu

¹¹ ngombana kutloliwe kwathiwa: “Ngizifunga ngokwami.” Kutjho uSomnini. “Woke amadolo azokuguqa phambi kwami namalimu woke adumise uZimu.”

¹² Nje-ke omunye nomunye wethu uzoziphendulela kuZimu.

¹³ Nje-ke asiliseni ukugwebana, kodwana endaweni yalokho tjhugululani imikhumbulwenu, ningabeki isiqabo namkha isisitho endleleni yomfowenu.

¹⁴ Ngiyazi begodu ngikholisekile eKosini uJesu bonyana akunanto esilaphele ngokwayo, kodwana iba ngesilapheleko kiloyo ocabanga bonyana isilaphele.

¹⁵ Nakube umzalwana wakho ukhubekiswa ngilokho okugomako, khona-ke awusakhambi ethandweni. Ungavumeli bona lokho okugomako kubhubhise loyo amfelako uKrestu.

¹⁶ Yeke ukulunga kwakho akungathathwa njengobumbi

¹⁷ ngombana umbuso kaZimu awusi kugoma nokusela, kodwana kulunga, kuthula nokuthokoza kuMoya oCwengileko.

¹⁸ Nje-ke loyo olotjha uKrestu, wamukelekile kuZimu begodu nabantu bayamvuma.

¹⁹ Ngalokho-ke asirhulupheleni lokho okuletha ukuthula nokwakhana.

²⁰ Ungatjhabalalisi umsebenzi kaZimu ngebanga lokudla. Iye, ije koke ukudla kuhlwengile, kodwana akukalungi kobana wena uwise abanye ngalokho okugomako.

²¹ Kuhle ukuzigoba ungagomi inyama, ungaseli iwayini namkha ungenzi nanyana yini ezokubangela bona umzalwana wakho akhubeke.

²² Ukukholwa onakho akube yindabakho noZimu. Babusisiwe labo abanganasizathu sokuzilahla ngebanga lalokho abakubona kukuhle.

²³ Kodwana labo abazazako bayalahlwa nakube bayagoma ngombana nabenza njalo bakhombisa ukungakhambi ngokukholwa. Nanyana yini engaveli ekukholweni isisono.