KWEBEROMA 12 - IsiNdebele 2012 Translation

Ipilo etja kuKrestu

¹ Nje-ke bazalwana, ngebanga lesirhawu sakaZimu ngiyanirabhela bonyana ninikele imizimba yenu ibe mihlabelo ephilako, ecwengileko nethandekako kuZimu. Lokhu kukulotjha kwenu okwamukelekako.

² Ningaziphathi njengokwemikhuba yephaseli, kodwana tjhugululwani ngokwenziwa kabutjha emikhumbulweni yenu ukuze nikghone ukuhlukanisa okuyintando kaZimu; okuhle, okwamukelekako nokupheleleko.

³ Ngomusa engiwuphiweko ngithi kini noke: Ningaziphatheli phezulu ngaphezu kwalokho eningikho, kodwana ziphatheni ngokuzigoba ukuya ngokwesilinganiso sokukholwa enikuphiwe nguZimu.

⁴ Njengombana emzimbeni munye sinamalungu amanengi, ngokunjalo amalungu lawo akenzi umsebenzi ofanako woke njalo.

⁵ Nje-ke thina esibanengi emzimbeni munye kuKrestu, ngamunye ngamunye simalunga womunye nomunye.

⁶ Sinezipho ezahlukeneko ukuya ngokomusa esiwuphiweko. Ophiwe ukuphorofida, akaphorofide ngokwesilinganiso sokukholwa kwakhe;

⁷ ophiwe ukusebenza, akasebenze; ophiwe ukufundisa, akafundise;

⁸ ophiwe ukuyala, akayale; ophiwe ukupha, akaphe ngokungagodli; ophiwe ukurhola, akarhole ngokukhuthala nophiwe ukurhawukela abanye, akakwenze ngethabo.

⁹ Ithando alibe ngelamambala; nyenyani ubumbi, nikakarele kokuhle.

¹⁰ Thandanani khulu ngethando lobuzalwana, niphalisane ngokuhloniphana.

¹¹ Ningatlhayelelwa yitjisakalo kodwana hlalani nivutha emmoyeni, nilotjhe iKosi.

¹² Thabani ethembeni, nibekezele eenhluphekweni, nikhuthale emthandazweni.

¹³ Hlanganyelani eendingweni zabacwengileko, niphathe kuhle abayeni.

¹⁴ Busisani labo abanizumako, iye, babusiseni ningabanikeleli.

¹⁵ Thabani kanye nalabo abathabileko, nilile kanye nalabo abalilako.

¹⁶ Philisanani ngokuzwana, ningazikhukhumezi, kodwana zimanyaniseni nabathobekileko. Ningazenzi inga nihlakaniphe ukudlula lokho eningikho.

¹⁷ Ningabuyiseli ubumbi ngobumbi, kodwana nakani okuhle phambi kwabo boke abantu.

¹⁸ Nakukghonekako ngokusemandlenenu, philisanani ngokuthula nabo boke abantu.

¹⁹ Bazalwana ningazibuyiseleli, kodwana nikelani itukuthelo kaZimu ithuba ngombana kutloliwe kwathiwa: “Ukubuyiselela kungokwami, ngizokubuyiselela.” Kutjho uSomnini.

²⁰ Esikhundleni salokho, umtlolo uthi: “Nakube isitha sakho silambile, siphe ukudla sigome; nakube somile, siphe amanzi sisele. Ngokwenza njalo, uzabe inga udindela amalahle avuthako ehlokwaso.”

²¹ Ungabindwa bubumbi kodwana wena kumele ubinde ubumbi ngobuhle.