KWEBEROMA 11 - IsiNdebele 2012 Translation

Imisalela yakwa-Israyeli

¹ Nje-ke ngiyabuza ngithi: UZimu ulahle abantu bakhe na? Awa, nakanye. Mina ngokwami ngimIsrayeli, isizukulwana saka-Abrahamu, ilunga lekoro kaBhenjamini.

² UZimu akakalahli abantu bakhe ebekaseze abazi kwaphambilini. Anazi bona umtlolo uthini ngo-Elija na? Angithi wamangalela ama-Israyeli kuZimu ngokuthi:

³ “Somnini, babulele abaphorofidi bakho, bagiriza nama-aldarakho; sekusele mina ngedwa, nje-ke bazumana nepilwami.”

⁴ Kodwana yathini ipendulo kaZimu kuye na? Angithi yathi: “Ngizibulungele abaziinkulungwana ezilikhomba abangazange bakhothamele uBhali.”

⁵ Kusesenjalo nanamhlanjesi, kunemisalela ekhethwe ngomusa.

⁶ Kodwana nakube kungomusa, khona-ke akusese ngenca yemisebenzi, nakungasinjalo umusa awusazokuba mumusa.

⁷ Alo, sizakuthini na? U-Israyeli wahluleka ukufumana lokho ebegade akufuna. Abakhethiweko bona bakufumana, kodwana inengi lenziwa laba likhuni,

⁸ njengombana kutloliwe kwathiwa: “UZimu wabanikela ummoya wobuthongo, amehlo angaboniko neendlebe ezingezwako bekube kunamhlanjesi.”

⁹ NoDavida uthi: “Itafula labo alibe sisifu nesirarejo, iye, isiqabo nesikhubekiso kibo!

¹⁰ Amehlwabo akafiphazwe ukuze angaboni, imihlana yabo ayihlale ibhesile.”

¹¹ Godu ngabuza ngathi: Bakhutjiwe bebabhusukela phasi na? Awa, nakanye! Kodwana ngokukhutjwa kwabo, ukusindiswa kuze kabatjhili ukuze kuvuselwe u-Israyeli isikhwele.

¹² Kodwana nakube ukuphambeka kwabo kumnono wephasini, nokuhlulwa kwabo kumnono kabatjhili, uzakuba ngangani-ke umnono ozakulethwa kupheleliswa kwabo!

¹³ Ngikhuluma nani nina abatjhili. Njengombana ngimpostoli wabatjhili nje, ngiyawazisa umsebenzi lo,

¹⁴ ukuze ngivusele abantu bekhethu isikhwele, ngalokho ngisindise abanye babo.

¹⁵ Nakube ukulahlwa kwabo kukubuyisana kwabantu bephasi noZimu, kuzokuba yini-ke ukwamukelwa kwabo na? Kghani kuzakuba kuphila kwabafileko na?

¹⁶ Nakube ingcenye yehlama enikelwe njengesilumo icwengile, khona-ke ihlama yoke icwengile; nakube umrabhu ucwengile, khona-ke neengala zicwengile.

¹⁷ Kodwana nakube iingala ezithileko bezephuliwe, kwathi wena olihlumela le-oliva yemmangweni, wahlonyelelwa esikhundleni sazo, wahlanganyela emrajini onothileko womuthi we-oliva,

¹⁸ ungazikhukhumezi eengalenezo. Nakube uyazikhukhumeza, khumbula bonyana akusuwe othwele umrabhu kodwana mrabhu othwele wena.

¹⁹ Uzakuthi: “Kwaquntwa iingala ukuze kuhlonyelelwe mina.”

²⁰ Iye, lokho kuliqiniso. Zaquntwa ngebanga lokungakholwa kwazo, kodwana wena ujame ngebanga lokukholwa kwaphela. Nje-ke ungazikhukhumezi, kodwana jama ngokwesaba.

²¹ Nakube uZimu azange ababalele iingala zemvelo, nawe angeze akubabalela.

²² Qalani-ke ukulunga nobukhali bakaZimu: ubukhali bukilabo abawileko, kodwana umusa ukuwe kwaphela nawuragela phambili ngokuphila ekulungeni kwakhe; nakungasinjalo nawe uzakuquntwa.

²³ Ngitjho nalabo abamaJuda nakube abaphikeleli ekungakholwini kwabo, bazakuhlonyelelwa ngombana uZimu unamandla wokubahlomelela godu.

²⁴ Nakube uquntwe kilokho okumumuthi wama-oliva wommango ngemvelo bewahlonyelelwa emthini wama-oliva otjaliweko, ngokuphambene nemvelo, kuzokuba kangangani-ke eengaleni zemvelo lezi nazibuye zihlonyelelwe emthinazo wama-oliva na?

Woke u-Israyeli uzokusindiswa

²⁵ Angithandi bazalwana bona ningabi nelwazi ngefihlakalo le ukuze ningakhohliseki: ukukhunyalala kwehlele ingcenye ka-Israyeli kufikela lapha isibalo esipheleleko sabatjhili singena khona soke.

²⁶ Nje-ke woke u-Israyeli uzokusindiswa njengombana kutloliwe kwathiwa: “EZiyoni kuzakuvela uMsindisi; afike aqede ukungalungi kuJakopo.

²⁷ Lesi-ke sivumelwano sami nabo, lokha nangisusa izono zabo.”

²⁸ Mayelana nevangeli-ke amaJuda azizitha ngebanga lenu, kodwana ngokokukhethwa, athandiwe ngebanga labobamkhulwawo

²⁹ ngombana uZimu nakupha izipho, nalokha nakubizileko, akabuyi akwemuke.

³⁰ Njengombana nakhe naba ngabangalaleli uZimu, namukeliswe umusa ngebanga lokungalaleli kwabo,

³¹ nabo-ke babe ngabangalaleliko ukuze nabo bamukeliswe umusa ngebanga lomusa kaZimu kini.

³² UZimu uvalele boke abantu ekungalalelini ukuze abe nomusa kibo boke.

UZimu akathokozwe

³³ Maye, uzike kangangani umnono wokuhlakanipha kanye nelwazi lakaZimu! Iingwebo zakhe aziphenyeki, neendlela zakhe azilemukeki.

³⁴ Njengombana umtlolo ocwengileko uthi: “Ngubani owakhe wazi umkhumbulo kaSomnini? Ngubani owakhe waba mluleki wakhe na?

³⁵ Ngubani owakhe wamupha isipho ukuze naye aphiwe na?”

³⁶ Ngambala zoke izinto zavela kuye, zavela ngaye begodu zingezakhe. Akube kuye idumo ngokungapheliko! Amen.