KWEBEROMA 10 - IsiNdebele 2012 Translation

¹ Bazalwana bami, isifiso sehliziywami kanye nomthandazwami kuZimu kukobana ama-Israyeli asindiswe.

² Ngingafakaza bonyana anetjisakalo ngoZimu, kodwana akanawo umkhanyo.

³ Ngokungayeleli kwawo ukulunga okuvela kuZimu, afuna ukuzenzela kwawo, azange azinikele ekulungeni kwakaZimu.

⁴ Isiphetho somthetho nguKrestu ukuze kube nokulungisiswa kwabo boke abakholwako.

⁵ UMosi uhlathulula ukulunga okuza ngomthetho bunje: “Umuntu owenza izintwezi uzokuphila ngazo.”

⁶ Kodwana ukulunga okuvela ngokukholwa kuthi: “Ungadlumbani uthi, ‘Ngubani ozakwenyukela ezulwini na?’ ” (okutjho bona ayokwewula uKrestu),

⁷ “namkha udlumbane uthi, ‘Ngubani ozakwehlela kabafileko na?’ ” (okutjho bona ayokwenyusa uKrestu ekufeni).

⁸ Kodwana kuthini na? Kuthi: “Ilizwi lihlanu kwakho, lingemlonyenakho nangehliziywenakho.” Iye, ilizwi lokukholwa esilitjhumayelako.

⁹ Lokha nawuvuma ngomlomakho bona uJesu uyiKosi, bewukholwe ngehliziywakho bona uZimu wamvusa kabafileko, uzokusindiswa

¹⁰ ngombana ukholwa ngehliziyo, ulungisiswe; uvume ngomlomo, usindiswe.

¹¹ Umtlolo uthi: “Loyo okholwa kuye akasoze arhubutjhwa.”

¹² Akunamehluko phakathi komJuda nomGirigi ngombana uSomnini unguSomnini wabo boke begodu unesisa kibo boke ababiza ibizo lakhe.

¹³ Nje-ke: “Boke ababiza ibizo lakaSomnini bazokusindiswa.”

¹⁴ Kodwana bangambiza njani nabangazange bakholwe kuye na? Begodu bangakholwa njani kuye nabangazange khebezwe ngaye na? Godu bazakuzwa njani ngaphandle kobana kube khona otjhumayela ngaye na?

¹⁵ Bazokutjhumayela njani ngaye nakube abakathunywa na? Njengombana kutloliwe kwathiwa: “Maye zithandeka kangangani iinyawo zalabo abaletha iindaba ezimnandi!”

¹⁶ Kodwana akusibo boke abalalele umlayezwethu ngombana u-Isaya wathi: “Somnini, ngubani okholwe umlayezwethu na?”

¹⁷ Nje-ke, ukukholwa kuvela ngokuzwa nokuzwa kuvela elizwini lakaKrestu.

¹⁸ Kodwana ngiyabuza-ke: Abakezwa na? Mbala bezwile ngombana, “Amaphimbo wabo azwakele ephasini loke; namezwabo emaphethelweni womhlaba.”

¹⁹ Godu ngiyabuza ngithi: “U-Israyeli akakazwisisi na?” Kokuthoma uMosi uthi: “Ngizonivusela isikhwele ngalabo abangasiso isizwe, nginithukuthelise ngesizwe esisidlhadlha.”

²⁰ U-Isaya ukhuluma ngesibindi uthi: “Ngifunyenwe ngabangazange bangifune, ngaziveza kabangazange bangibawe.”

²¹ Kodwana ngo-Israyeli uthi: “Imini yoke ngilulele izandla zami ebantwini abangalaleliko nabanekani.”