KWEBEROMA 1 - IsiNdebele 2012 Translation

Isingeniso

¹ Incwadi le ivela kimi mina Powula, inceku kaKrestu Jesu, owabizelwa ekubeni mpostoli, wahlukaniselwa ivangeli lakaZimu.

² Ivangeli lelo walethembisa ngaphambilini ngabaphorofidi bakhe emitlolweni ecwengileko.

³ Iye, ivangeli elimayelana neNdodanakhe eyaba sizukulwana sakaDavida ngokwenyama,

⁴ begodu yatjhunyayelwa ngamandla bona iyiNdodana kaZimu ukuya ngokoMoya wokucwenga ngokuvuswa kwayo ekufeni: uJesu Krestu iKosethu,

⁵ esamukela ngaye isisa nobupostoli ukuletha ukulalela ukukholwa hlangana nabatjhili ngebanga lebizo lakhe,

⁶ ngitjho nani ngokwenu enibizelwe kobana nibe ngebakaJesu Krestu.

⁷ Kibo boke abathandekako kuZimu abaseRoma, ababizelwe ekubeni ngabacwengileko: Akube kini umusa nokuthula okuvela kuZimu uBaba wethu neKosini uJesu Krestu.

Umthandazo wokuthokoza

⁸ Kokuthoma, ngithokoza uZimami ngoJesu Krestu ngani noke ngombana ukukholwa kwenu kutjhunyayelwa ephasini loke.

⁹ UZimu engimlotjha ngommoyami nengitjhumayela ivangeli leNdodanakhe, ungufakazami bonyana ngihlala nginikhumbula njalo emthandazwenami,

¹⁰ ngibawa bonyana entandwenakhe uZimu, ngigcine ngiphumelele ukuza kini.

¹¹ Ngihlulukela ukunibona ukuze ngabelane nani ezinye zezipho zakaMoya, nginiqinise,

¹² namkha sikhuthazaneni ekukholweni kwethu, iye ekukholweni kwenu nekukholweni kwami.

¹³ Angithandi bazalwana bona ningabi nelwazi lokobana bengifuna kangangani ukuza kini (kodwana bengiseze ngiqabelwa ukwenza njalo bekube nje) ukuze ngizuze isivuno phakathi kwenu njengombana ngenzile phakathi kwabo boke abatjhili.

¹⁴ Nginesibopho kumaGirigi nakabatjhili, kabahlakaniphileko nabanganalwazi,

¹⁵ ngikho ngitjhisekela ukutjhumayela ivangeli nakini eniseRoma.

Amandla wevangeli

¹⁶ Nje-ke anginanhloni ngevangeli ngombana limamandla kaZimu wokusindisa boke abakholwako, ukuthoma ngamaJuda kulandele amaGirigi.

¹⁷ Kilo kwembulwa ukulunga kwakaZimu ngokukholwa namayelana nokukholwa, njengombana kutloliwe kwathiwa: “Olungileko uzakuphila ngokukholwa.”

Itukuthelo kaZimu phezu kwabantu

¹⁸ Ubukhali bakaZimu bubonakala buvela ezulwini, behlela phezu kwakho koke okungakhambisani noZimu kanye nobukhohlakali balabo abavimba iqiniso ngokonakala kwabo.

¹⁹ Okwazekako ngoZimu kuyakhanya kibo ngombana uZimu ubavezele khona.

²⁰ Soloko kwangesikhathi sokudalwa kwephasi, amandlakhe angapheliko kanye nemvelo yakhe yobuZimu, nanyana ingabonakali ngokwayo, phezu kobana ikhona, beyiseze izwisiswa begodu ibonwa ezintweni azidalileko. Ngalokho-ke abantu abanabo ubusithelo,

²¹ ngombana nanyana bebaseze bamazi uZimu, azange bebamhloniphe namkha bamthokoze, kodwana babe nemikhumbulo engatjho ilitho, neengqondo zabo ezingazisiko zafiphala.

²² Bazitjela bona bahlakaniphile, ngalokho baba ziindlhayela.

²³ Banana iphazimulo kaZimu ongabhubhiko ngemifanekiso emfuziselo wabantu ababhubhako namkha yeenyoni namkha yeenlwana ezinemilenze emine namkha yeenrhurhubi.

²⁴ Nje-ke uZimu wabanikela eenkanukweni zeenhliziyo zabo, emanyaleni nekuhlazisaneni ngemizimbabo

²⁵ ngombana banana iqiniso ngoZimu kobana bazuze amala, balotjha bebasebenzela okudaliweko kunoMdali, okunguye okufanele adunyiswe ngokungapheliko. Amen.

²⁶ Ngebangelo-ke, uZimu wabanikela ekutjhisakaleni okuhlazisako. Abafazi bakhona balisa indlela yemvelo yamabhayi bangena kokungasiyimvelo,

²⁷ ngokunjalo namadoda wakhona alisa indlela yemvelo yokuya emabhayini nomfazi, afuthelana ngokukhanukana wona. Amadoda enza ubuhlola namanye amadoda, ngalokho azamukelisa ngokwawo isibetho esifanele ubuhlola bawo.

²⁸ Njengombana abantwabo bangazange bakhathalele ukumazi uZimu, yeke uZimu wabanikela emikhumbulweni eyonakeleko nezintweni ekungakameli zenziwe.

²⁹ Bebazele ngayo yoke imihlobo yobukhohlakali, ubumbi, ubumarhamaru nezondo. Bazele ngomona, ukubulala, ukuphikisana, ikohliso, ubuqili, ihlebo,

³⁰ ubugongodi, ukuhloya uZimu, ukuthukana, ukuzikhakhazisa, ukuzazi, ukusungula ubumbi, ukungalaleli ababelethi,

³¹ iye, baziindlhadlha, abakholwa, abananhliziyo begodu bafe ivalo.

³² Bayasazi isimiso sakaZimu sokobana labo abenza izinto ezinjalo bafanelwa kukufa, khonapho abazenzi kwaphela, kodwana bakwakwazela nalabo abazenzako.