KWEBEKOLOSE 4 - IsiNdebele 2012 Translation

¹ Baphathi, phathani amakhoboka wenu ngokulunga nangefanelo ngombana niyazi bonyana nani ninomphathi ezulwini.

Eminye imiyalo

² Zinikeleni ngokupheleleko emthandazweni, nilinde kiwo ngokuthokoza.

³ Sithandazelani nathi kobana uZimu asivulele ithuba lokutjhumayela ukuze sizwakalise ifihlakalo kaKrestu, engingesikhungweni ngebanga layo.

⁴ Thandazani bona ngiyibonakalise kuhle njengombana ngifanele.

⁵ Ziphatheni ngokuhlakanipha ebantwini abatjhili, nisebenzise kuhle loke ithuba eninalo.

⁶ Ikulumo yenu ayibe nomusa njalo, inungwe ngetswayi ukuze nazi bona niphendule njani woke umuntu.

Ukulayelisa

⁷ UTirhikosi uzanitjela zoke iindaba ngami, ungumfowethu othandekako, isikhonzi esithembekileko nenceku kanye nami eKosini.

⁸ Kungebangelo ngimthumela kini ukuze nazi bona siphile njani nokobana akhuthaze iinhliziyo zenu.

⁹ Uzabe akhambisana no-Onesimusi, umfowethu othembekileko nothandekako, ongomunye wenu. Bazanitjela ngakho koke okwenzekako lapha.

¹⁰ U-Aristarirhusi osibotjhwa kanye nami uthe nginivuse, iye yena noMarkosi umzawakhe kaBharinabhasi enayalwa ngaye bona nafikako nimamukele.

¹¹ UJesu okuthiwa nguJustosi naye uthe nginivuse. Laba-ke ngibo bodwa abangebokusoka hlangana nabasebenza kanye nami embusweni kaZimu, begodu bayinduduzo kimi njalo.

¹² No-Ephafrasi ongomunye wenu noyinceku kaJesu Krestu uthe nginivuse. Njalo emthandazwenakhe uhlala anilwela ukuze niqine nidzimelele begodu niqinisekisiwe kikho koke okusentandweni kaZimu.

¹³ Nami ngiyamfakazela bona unisebenzele nzima kanye nalabo abaseLawodikeya kanye nabaseHerapholisi.

¹⁴ ULukasi, udorhodera othandekako, noDemasi bayanilotjhisa.

¹⁵ Yeningilotjhisele kubazalwana abaseLawodikeya nakuNimfasi kanye nebandla elihlanganela kwakhe.

¹⁶ Nasele incwadi le ifundiwe phakathi kwenu, idluliseleni nebandleni lamaLawodikeya kobana ifundwe nakhona, nani qinisekisani bona niyayifunda evela eLawodikiya.

¹⁷ Yithini ku-Arirhipusi: “Qinisekisa bona uqeda umsebenzi owawamukela eKosini.”

¹⁸ Mina Powula ngitlola isilayeliso lesi ngesandla sami. Khumbulani iinketani zami. Sengathi umusa wakaZimu ungaba nani.