KWEBEKOLOSE 3 - IsiNdebele 2012 Translation

Ipilo etja kuKrestu

¹ Nakube navuswa noKrestu, khona-ke funani izinto zaphezulu, lapho uKrestu ahlezi khona ngesigomeni sakaZimu.

² Bekani imikhumbulwenu ezintweni zezulwini, ningatjheji zephasi

³ ngombana nafa, nje-ke ipilwenu ifihliwe kuKrestu okuZimu.

⁴ Lokha uKrestu okuphila kwenu nakabonakaliswako, nani nizokubonakaliswa kanye naye ephazimulweni.

⁵ Nje-ke bulalani koke okukini okungekwemvelo yephasini: ubudzewuri, ukusilaphala, ikanuko, iimfiso ezimbi nobumarhamaru, okukulotjha abosingazimu.

⁶ Ngebanga lakho koke lokhu itukuthelo kaZimu izokwehlela kilabo abangalaleliko.

⁷ Lezo ziindlela nani ebegade nizilandela lokha nanisaphila ipilo enjalo.

⁸ Kodwana kwanjesi kufanele nilahle zoke izinto ezinjalo: itukuthelo, ilaka, izondo, ukuhlambalaza nokukhuluma amahlazo.

⁹ Ningaleyelani amanga, njengombana sele nihlubule ubunina obudala nemikhuba yabo nje,

¹⁰ begodu senembethe ubunina obutjha, obuvuselelwe elwazini ngokomfuziselo wombumbi wabo.

¹¹ Ekuvuselelweni lokho, akusekho umGirigi nomJuda, osokiweko nongakasokwa, otjhili, umSkithi, amakhoboka nabatjhaphulukileko.

¹² Yeke njengabakhethiweko bakaZimu, abacwengileko nabathandekako, yembathani isirhawu, ukulunga, ukuthobeka, ubumnene nokubekezela.

¹³ Bekezelelanani nakube omunye uneensolo ngomunye; libalelanani njengombana neKosi yanilibalela, iye nani kumele nilibalele.

¹⁴ Ngaphezu kwakho koke lokhu, zembathiseni ngethando lona elibopha koke ndawonye kuzwane.

¹⁵ Ukuthula kwakaKrestu akubuse eenhliziyweni zenu, iye lokho enabizelwa kikho emzimbeni munye. Begodu yibani nokuthokoza.

¹⁶ Ilizwi lakaKrestu alihlale ngaphakathi kwenu ngokupheleleko; fundisanani beniyalane ngakho koke ukuhlakanipha; vumelani uZimu amarhubo, iingoma kanye nomvumo wokukholwa ngokuthokoza eenhliziyweni zenu.

¹⁷ Koke enikwenzako, kungaba ngelizwi namkha ngezenzo, kwenzeni koke ebizweni leKosi uJesu, ngayo nithokoze uZimu uBaba.

Imiyalo yamakhaya wamakholwa

¹⁸ Bafazi, thobelani amadoda wenu ngombana kuyifanelo yenu eKosini.

¹⁹ Madoda, thandani abafazi benu, ningabakhahlamezi.

²⁰ Bantwana, lalelani ababelethi benu kikho koke ngombana lokho kuyayithokozisa iKosi.

²¹ Bobaba, ningabathukuthelisi abantwana benu, khona bangazukudana.

²² Makhoboka, thobelani abaphathi benu bephasinapha kikho koke, kungabi kwaphela nabanibeke ilihlo ngombana nifuna ukubathabisa, kodwana akube ngokuthembeka ngehliziyo yoke, nesabe iKosi.

²³ Koke enikwenzako, kwenzeni ngehliziyo epheleleko kube ngathi nikwenzela iKosi ingasi abantu,

²⁴ njengombana nisazi bonyana eKosini nizakwamukeliswa ilifa njengomvuzo wenu. Khumbulani bona nilotjha iKosi.

²⁵ Ngambala loyo owenza okungakalungi, uzakwamukeliswa nanyana yini engakalungi ayenzileko begodu akukho ukukhetha ubuso.