KWEBEKOLOSE 2 - IsiNdebele 2012 Translation

¹ Ngithanda nazi bonyana ngirubaruba kangangani ngani nangalabo abaseLawodikeya, boke abanengi esingazange khesibonane nabo ubuso nobuso.

² Lokhu ngikwenzela bona iinhliziyo zabo zikhuthazeke, bahlanganiswe ethandweni ukuze babe nawo woke umnono wokuzwisisa okuqinisiweko godu babe nelwazi lefihlakalo kaZimu, okutjho uKrestu

³ okufunyaneka kuye woke amagugu afihliweko wokuhlakanipha nelwazi.

⁴ Nginitjela lokhu ukuze kungabikhona ozanikhohlisa ngeempikiswano eziyengako,

⁵ ngombana nanyana ngingekho kini siqu sami, kodwana nginani ngommoya. Begodu ngithabela ukubona ukuhleleka kwenu nokudzimelela kokukholwa kwenu kuKrestu.

Ukuphelela kwepilo kuKrestu

⁶ Njengombana senamukela uKrestu Jesu iKosi, ragelani phambili ngokuphila nikuye,

⁷ nidzimelele benakhiwe kuye, niqinile ekukholweni njengombana nafundiswa, nivame ukuthokoza.

⁸ Yelelani-ke bona kungabikhona namunye onithumba ngobuhlakani nangekohliso elilize, ngokwefundiso yabantu esekeleke phezu kwemimoya yephasi, ingasi kuKrestu,

⁹ ekuhlala kuye emzimbenakhe koke ukuphelela kwakaZimu.

¹⁰ Ngalokho-ke nani seniphelelisiwe kuye oyihloko yemibuso neyamandla woke.

¹¹ Kuye godu nasokwa ngokusokwa kwakaMoya, ngokuhlubula imvelo yokona, ingasi ngokusoka okwenziwa ngezandla zomuntu kodwana ngokusoka okwenziwa nguKrestu.

¹² Njengombana nabulungwa naye ngombhabhadiso, khona-ke navuswa kanye naye ngokukholwa emandleni kaZimu, owamvusa ekufeni.

¹³ Nani-ke ebegade nifile ngokona kwenu nangokungasoki enyameni yenu, uZimu wanenza abaphilako kanye naye lokha nakasithethelela kizo zoke iimphambeko zethu.

¹⁴ Wasula okutloliweko kanye nemiyalo yakhona ebegade ilwisana nathi begodu ijamelene nathi, wakususa lokho, wakubethela esiphambanweni.

¹⁵ Wamuka ababusi neemphathimandla iinhlabano zabo wabenza ihlaya etjhatjhalazini, wabahlula esiphambanweni.

¹⁶ Nje-ke akungabi namunye onilahla ngokudla nanyana ngokusela, namkha ngeminyanya, ukuthwasa kwenyanga namkha ngamaSabatha.

¹⁷ Lokho kusithunzi nje salokho okuzako, kodwana okungikho kungekwakaKrestu.

¹⁸ Akungabikhona umuntu onitjhaphisako, othanda ukuzenza othobileko khisibe ulotjha iingilozi abe akakarele emibonweni, azikhukhumeze ngelize emikhumbulwenakhe yenyama.

¹⁹ Onjalo sele alahlekelwe ngiloyo oyihloko, lapha umzimba woke usekeleke khona begodu uhlanganiswe malungu nemisipha, ukhule ngokukhula okuvela kuZimu.

Ukufa nokuphila noKrestu

²⁰ Njengombana nafa kanye noKrestu benakhululwa eemfundisweni zemimoya yephaseli, kubangelwa yini-ke bona niziphathe njengabantu bephaseli na? Kubayini nithobele imiyalo ethi,

²¹ “Ungakuphathi lokhu! Unganandiphi lokhu! Ungakunamathi lokhuya!” na?

²² Yoke imiyalo le itjho izinto ezibhubhako, kumithetho neemfundiso zabantu nje kwaphela.

²³ Iye, ibonakala inesifaniso sokuhlakanipha ekukhuthazeni ukulunga nokuzithoba kokuzenzisa, okulungele umzimba nje kwaphela kodwana kube kungasizi ngalitho ekuzithibeni eenkanukweni zenyama yabo.