KWEBEKOLOSE 1 - IsiNdebele 2012 Translation

Ukulotjhisa

¹ UPowula ompostoli kaJesu Krestu ngokwentando kaZimu, noThimothi umfowethu,

² kibo abazalwana abacwengileko nabathembekileko kuKrestu abaseKolose: Sengathi ningaba nomusa nokuthula okuvela kuZimu uBaba wethu.

Umthandazo wokuthokoza

³ Sihlala simthokoza njalo uZimu, uYise weKosethu uJesu Krestu, nasinithandazelako,

⁴ ngombana sizwile ngokukholwa kwenu kuKrestu Jesu, nangethando eninalo kibo boke abacwengileko,

⁵ ngebanga lethemba enibekelwe lona ezulwini. Senikhe nezwa ngalelithemba ngaphambilini elizwini leqiniso, okutjho ivangeli,

⁶ iye, lona lelo esele lifikile kini. Njengombana lithela iinthelo begodu landa nephasi loke, ngokunjalo lithela iinthelo naphakathi kwenu soloko kwamhla nalizwako nabe nazi nomusa kaZimu ngeqiniso.

⁷ Lokhu nakufunda ku-Ephafrasi othandekako noyinceku kanye nathi. Usisebenzi sakaKrestu esithembekileko ngebanga lenu

⁸ begodu nguye osazise ngethando eninalo ngoMoya.

⁹ Ngalokho-ke nathi solo kwamhlana sizwa ngalo, azange silise ukunithandazela, sinibawela bona nizaliswe ngelwazi lentando kaZimu kikho koke ukuhlakanipha kanye nelemuko elivela kuMoya.

¹⁰ Siyanithandazela bona niphile ipilo efanele iKosi, beniyithabise ngakho koke, nithele iinthelo kiwo woke umsebenzi omuhle, nikhule nekumazini uZimu,

¹¹ niqiniswe ngawo woke amandla emandlenakhe amakhulu ukuze nibe nokudzimelela okukhulu kanye nokubekezela. Ngethabo

¹² nithokoze uBaba owanenza bona nifanelwe sisabelo elifeni labacwengileko embusweni wokukhanya.

¹³ Wasikhupha emandleni wobumnyama, wasibeka embusweni weNdodanakhe ethandekako,

¹⁴ esinokuhlengwa nokulitjalelwa kwezono zethu kiyo.

Ubuntu bakaKrestu kanye nomsebenzakhe

¹⁵ UKrestu umfanekiso wakaZimu ongabonakaliko, ulizibulo lakho koke okubunjiweko

¹⁶ ngombana koke kwabunjwa ngaye: okusezulwini nephasinapha, okubonakalako nokungabonakaliko, kungaba mibuso namkha ubukhosi namkha ababusi neemphathimandla. Koke kwabunjwa ngaye, kwabunjelwa yena.

¹⁷ Yena ngokwakhe waba khona koke kungakabikhona begodu koke kudzimelele ngaye.

¹⁸ Uyihloko yomzimba, okulibandla; usithomo, izibulo labavuswa ekufeni, ukuze abe ngewokuthoma kikho koke.

¹⁹ Yeke kwamthabisa uZimu bona ubuyena obupheleleko bakhe buhlale ngaphakathi kwakhe

²⁰ ukuze kuthi ngaye abuyisele koke kuye nanyana kungaba ngokusephasini namkha okusezulwini, ngokwenza ukuthula ngeengazi zakhe ezathululwa esiphambanweni.

²¹ Nani ebegade nikude noZimu, nimanaba emikhumbulweni yenu ngebanga lezinto ezimbi ebenizenza,

²² nokho sele abuyisene nani ngomzimba kaKrestu wenyama, ngokufa kwakhe ukuze aniveze nicwengile, nimsulwa begodu ningasoleki phambi kwakhe.

²³ Lokho kwenzeka kwaphela nakube nani nihlala nidzimelele benikakarele esisekelweni sokukholwa, ngaphandle kokutjhida ethembeni elathenjiswa livangeli enalizwako nelatjhunyayelwa kikho koke okudaliweko ngaphasi komthunzi welanga, mina Powula engaba sisebenzi salo.

Umsebenzi kaPowula ebandleni

²⁴ Nje-ke ngiyathaba ekuhluphekeni kwami ngenca yenu, begodu emzimbenami ngiphelelisa lokho okutlhayeleko ekuhluphekeni kwakaKrestu ngebanga lomzimbakhe, okutjho ibandla.

²⁵ Ngenziwe isikhonzi salo ngokomsebenzi kaZimu enganikelwa wona ngani, ukuzwakalisa ilizwi lakaZimu ngokupheleleko,

²⁶ ekuyifihlakalo ebeyifihliwe kiso soke isikhathi sekadeni kanye neenzukulwaneni, kodwana gadesi sele yambulelwe abacwengileko bakhe.

²⁷ UZimu waqunta bona kwazeke kibo bonyana umnono wephazimulo yefihlakalwakhe le mkhulu kangangani hlangana nabatjhili; ifihlakalo leyo inguKrestu okini nolithemba lephazimulo.

²⁸ Nje-ke nguye esimtjhumayelako, siyelelise woke umuntu besibafundise koke ukuhlakanipha kwakhe ukuze silethe woke umuntu aphelele kuKrestu.

²⁹ Iye, ngikho lokhu engikusebenzelako, ngitjhabatjheka ngawo woke umfutho awuvusa ngamandla ngaphakathi kwami.