KWEBEGALATIYA 6 - IsiNdebele 2012 Translation

Ukuthwalisana imithwalo

¹ Bazalwana, nakube kukhona obhajwe esonweni, nina enilawulwa nguMoya, mfakeni endleleni ngommoya omuhle. Kodwana zitjhejeni kobana nani ningalingeki.

² Thwalisanani imithwalo yenu, ngaleyondlela nizabe nizalisa umthetho kaKrestu.

³ Nakube umuntu udlumbana bona ulilitho ije angasililitho, uyazikhohlisa.

⁴ Omunye nomunye kufanele ahlolisise imisebenzakhe. Ngemva kwalokho-ke angazikhakhazisa ngokungokwakhe, ingasi ngokwabanye

⁵ ngombana omunye nomunye kufanele athwale umthwalo wakhe.

⁶ Akuthi nanyana ngubani ofundiswa ilizwi, abelane naloyo omfundisako kizo zoke izinto ezihle.

⁷ Ningakhohliswa, uZimu akaphoqwa. Umuntu uvuna akutjalileko.

⁸ Otjalela iinkanuko zakhe uzakuvuna ukubhubha okuvela kizo, kodwana otjalela uMoya, uzakuvuna ukuphila okungapheliko kuye uMoya.

⁹ Asingadinwa ukwenza okulungileko ngombana ngesikhathi esifaneleko sizakuvuna nakube asipheli amandla.

¹⁰ Nje-ke, njengombana sinethuba, asenzeni okuhle kibo boke abantu, khulukhulu kilabo abangebokukholwa.

Umlayezo wokugcina nokulayelisa

¹¹ Qalani, nginitlolele ngokudarhileko ngesami isandla!

¹² Abantu abathanda ukubukwa enyameni, ngibo abazonikatelela bona nisoke. Benza lokho ukuze bangazunywa ngebanga lesiphambano sakaKrestu.

¹³ Sengitjho nalabo abasokako abawuthobeli umthetho; kodwana khonapho bathanda bona nisoke ukuze bazikhakhazise ngenyama yenu.

¹⁴ Kodwana mina angingazikhakhazisi ngalitho ngaphandle kwesiphambano seKosethu uJesu Krestu, ngayo ekubethelwe iphasi kimi, nami ngabethelwa kilo.

¹⁵ Ukusoka nokungasoki akutjho ilitho, okukhulu kukobana umuntu abe sidalwa esitjha.

¹⁶ Akube kuthula nomusa kibo boke abakhamba ngomthetho lo, ngitjho naku-Israyeli kaZimu!

¹⁷ Ukusuka gadesi, akungabe kusaba nomuntu ongitshwenyako ngombana emzimbenami nginamatshwayo kaJesu.

¹⁸ Sengathi umusa weKosethu uJesu Krestu ungaba nani, bazalwana. Amen.