KWEBEGALATIYA 5 - IsiNdebele 2012 Translation

Ikululeko yomkrestu

¹ UKrestu wasikhulula kobana sibe ngabakhululekileko. Ngalokho jamani niqine, ningazidisibezi godu ngejogi lobukhoboka.

² Lalelani, mina Powula ngithi kini, nakube niyasoka, uKrestu angekhe aba nesizo nakancani kini.

³ Godu ngiyaqinisa kuye woke umuntu osokako bona ubophelekile ukuthobela woke umthetho.

⁴ Nina enilinga ukulungisiswa ngomthetho nahlukanisiwe noKrestu, ningaphandle komusa kaZimu.

⁵ Kodwana ngoMoya silinde ngokukholwa ithemba lokulungisiswa,

⁶ ngombana kuKrestu Jesu, ukusoka nokungasoki akwenzi mahluko. Into eqakathekileko kukholwa okuzibonakalisa ngethando.

⁷ Beseze nigijima kuhle. Ngubani oniliyileko kobana ningasalalela iqiniso na?

⁸ Ukuyengwa okunjalo akuveli konibizako.

⁹ Ingumelo encani ibilisa ihlama yoke.

¹⁰ Nginethemba eKosini bona anizukuba nomkhumbulo owahlukileko. Loyo onihlangahlanganisako, uzakuthwala isibetho nanyana kungaba ngubani.

¹¹ Bazalwana, nakube ngisatjhumayela ukusoka, alo ngisazunyelwani na? Ngaleyondlela isikhubekiso sesiphambano siphelisiwe.

¹² Nakubatjitjizelabo bona, sengathi bangathuwelela baziqandule bona ngokwabo.

¹³ Nina bazalwana, nibizelwe ekululekweni, kodwana ningasebenzisi ikululeko yenu njengethuba enyameni. Kunalokho sebenzelanani ngethando

¹⁴ ngombana woke umthetho uzaliseka egameni linye lokuthi: “Thanda umakhelwanakho njengombana uzithanda wena.”

¹⁵ Kodwana nanihlalele ukulumana benirhiribidelane, yeke yelelani bona ningaqedani.

Ukuphila ngoMoya kaZimu

¹⁶ Yeke ngithi kini: Khambani ngoMoya ukuze ninganelisi iinkanuko zenyama,

¹⁷ ngombana iinkanuko zenyama ziphambene nokufunwa nguMoya, kanti nokufunwa nguMoya kuphambene neenkanuko zenyama. Iye, izintwezi ziphambene, khona ningazukwenza enikuthandako.

¹⁸ Kodwana nanibuswa nguMoya, anisingaphasi komthetho.

¹⁹ Kodwana imisebenzi yenyama isemtarini: bufebe, kusilaphala, manyala,

²⁰ kulotjha abosingazimu, buloyi, yizondo, kucabana, mumona, kubanga umguruguru, kuzicabangela wedwa, kuphikisana, kukwahlukana,

²¹ yikanuko, budakwa, kurhiribidela nokhunye okunjalo. Ngiyaniyelelisa njengombana ngenza phambilini, bona labo abaphila ngalendlela asoze balidla ilifa lombuso kaZimu.

²² Kodwana iinthelo zakaMoya zilithando, kujabula, kuthula, kubekezela, kulunga, kukwethembeka,

²³ bumnene nokuzithiba. Akunamthetho olwisana nokunjalo.

²⁴ Labo abangebakaKrestu Jesu babethele esiphambanweni inyama kanye nemizwa neenkanuko zayo.

²⁵ Nakube siphila ngoMoya, khona-ke asikhambe ngoMoya.

²⁶ Asingazikhukhumezi, sirhugane begodu simonakalelane.