KWEBEGALATIYA 4 - IsiNdebele 2012 Translation

¹ Kodwana ngithi lokha indlalifa nayisesemntwana, ayehluki kunekhoboka, nanyana imnini walo loke ilifa.

² Iba ngaphasi kwabeluleki nabaphatheli bayo bekufike isikhathi esibekwe nguyise.

³ Ngokunjalo-ke nathi nasisesebantwana besisebukhobokeni ngaphasi kwemigomo yephasi.

⁴ Kodwana isikhathi nasele siphelelisiwe, uZimu wathumela iNdodanakhe, ebelethwe ngowesifazana, yabelethelwa ngaphasi komthetho,

⁵ ukuzokuhlenga labo abangaphasi komthetho ukuze nathi sifunyane ilungelo elizeleko lamadodana.

⁶ Ngebanga lokobana nimadodanakhe, uZimu wathumela uMoya weNdodanakhe ngeenhliziyweni zethu, uMoya orhuwelela uthi: “Aba! Baba!”

⁷ Yeke awusese likhoboka kodwana sele uyindodana. Njengombana uyindodana, uZimu godu ukwenze waba yindlalifa.

Ukutshwenyeka kwakaPowula ngamaGalatiya

⁸ Phambilini lokha ningakamazi uZimu, benimakhoboka walabo ngokwemvelo abangasibo abozimu.

⁹ Kodwana njengombana sele nimazi uZimu namkha ngingathi senisaziwa nguZimu, kubayini-ke senibuyela eemfundisweni ezibuthakathaka nezililize na? Nithanda ukuba makhoboka wazo godu na?

¹⁰ Nihlonipha amalanga akhethekileko, iinyanga, iinkhathi neminyaka!

¹¹ Nginevalo ngani, kobana mhlamunye ngidlale ngamandlami ngani.

¹² Ngiyanirabhela, bazalwana, yibani njengami ngombana nami nginjengani. Anikangoni ngalitho.

¹³ Njengombana nisazi, bekungebanga lokugula bona ngithome ngani ukutjhumayela ivangeli.

¹⁴ Nanyana ukugula kwami kube sizizinyo kini, azange ninginyaze namkha ningiphoqe. Esikhundleni salokho ningamukele sengathi ngiyingilozi kaZimu, iye, kwanga nginguKrestu Jesu ngenyama.

¹⁵ Kwenzekeni ngalo loke ithabo lenu na? Ngingafakaza bona nabe gade nenze njalo, benizokukhupha amehlwenu ninginikele wona.

¹⁶ Alo, sengisisitha senu ngokunitjela iqiniso na?

¹⁷ Abantwabo batjhisekela ukunizuza, kodwana ingasi ebuhleni. Abakufunako kukunahlukanisa nathi ukuze nani nibatjhisekele.

¹⁸ Kuhle bona nitjhiseke, kwaphela nakube kungomnqopho omuhle begodu kuhlale kunjalo, ingasi kwaphela lokha nanginani.

¹⁹ Bantwana bami enginomrhelo ngabo kufikela uKrestu abunjwe ngaphakathi kwenu,

²⁰ maye bengilangazela kangangani ukuba nani ngitjhugulule ilizwi lami ngombana ngirareke khulu ngani!

Umfanekiso ngoHagari noSara

²¹ Akhe ningitjele nina enithanda ukuba ngaphasi komthetho, anilemuki bona umthetho uthini na?

²² Angithi kutloliwe bona u-Abrahamu bekanamadodana amabili, enye ingeyekhobokakazi, enye ingeyomkakhe okhululekileko.

²³ Indodanakhe yekhobokakazi yabelethwa ngendlela ejayelekileko, kodwana indodanakhe yomfazi okhululekileko yabelethwa ngebanga lesithembiso.

²⁴ Izintwezi ziimfanekiso kwaphela ngombana abafazi bajamele iimvumelwano ezimbili. Isivumelwano esisodwa ngesibuya entabeni iSinayi begodu sibeletha abantwana abazokuba makhoboka: Lokho kutjho uHagari.

²⁵ UHagari ujamele intaba yeSinayi ese-Arabhiya begodu ukhambisana nomuzi lo weJerusalema ngombana usebukhobokeni kanye nabantwana bawo.

²⁶ Kodwana iJerusalema eliphezulu likhululekile begodu lingumma wethu

²⁷ ngombana kutloliwe kwathiwa: “Yewuthabe wena mfazi oyinyumba iye, wena ongabelethi abantwana, phuma urhahlawule wena onganamirhelo ngombana banengi abantwana bomfazi onganabani kunebaloyo onendoda.”

²⁸ Nje-ke nina bazalwana, njengo-Isaka nibantwana besithembiso.

²⁹ Ngesikhatheso indodana ebelethwe ngokujayelekileko yatlhorisa indodana ebelethwe ngamandla kaMoya. Kunjalo nagadesi.

³⁰ Kodwana umtlolo uthini na? Uthi: “Qotjha umfazi olikhoboka nendodanakhe ngombana yona ayisoze yaba nesabelo elifeni nendodana yomfazi okhululekileko.”

³¹ Ngalokho-ke bazalwana, thina asisibo abantwana bomfazi olikhoboka, kodwana singebomfazi okhululekileko.