KWEBEGALATIYA 3 - IsiNdebele 2012 Translation

Umthetho namkha ukukholwa

¹ Nina ndlhadlha zamaGalatiya! Niloywe ngubani na? Emehlwenenu besele kwazeka bona uJesu Krestu wabethelwa.

² Akhe nginibuze okukodwa nakhu: Namukele uMoya ngemisebenzi yomthetho namkha ngokuzwa ngokukholwa na?

³ Kanti niziindlhayela kangaka na? Ngemva kobana nithome ngoMoya, senigcina ngenyama na?

⁴ Nahlupheka kangaka ngelize na? Nakube mbala bekungelize!

⁵ Kghani loyo oninikela uMoya abe enze imikarisomraro phakathi kwenu ukwenza lokho ngemisebenzi yomthetho namkha ngokuzwa ukukholwa na?

⁶ Yeke u-Abrahamu “wakholwa uZimu, kwabalelwa kuye bona kukulunga”.

⁷ Yazini-ke bona labo abakholwako babantwana baka-Abrahamu.

⁸ Yeke umtlolo, ngokubona bona uZimu uzakulungisisa abatjhili ngokukholwa, watjhumayela ivangeli ku-Abrahamu ngaphambilini, wathi: “Zoke izizwe zizakubusiswa kuwe.”

⁹ Ngalokho-ke labo abanokukholwa babusiswa kanye no-Abrahamu, indoda yokukholwa.

¹⁰ Boke abathembela ekuthobeleni umthetho banikelelwe ngombana umtlolo uthi: “Bathuwelelisiwe boke abangakhambi ngokuya ngalokho okutlolwe encwadini yomthetho.”

¹¹ Kuyakhanya bona akakho olungisiswa ngomthetho phambi koZimu ngombana, “Olungileko uzakuphila ngokukholwa”.

¹² Umthetho awukanzinzi ekukholweni, kunalokho, “Loyo owenza koke lokho uzakuphila ngakho.”

¹³ UKrestu wasihlenga esithuwelelisweni somthetho ngokobana yena abe sithuweleliso esikhundleni sethu ngombana umtlolo uthi: “Umuntu ohlonywe esigodweni uthuweleliswe nguZimu”,

¹⁴ ukuze kuthi ngoKrestu Jesu isibusiso saka-Abrahamu sehlele phezu kwabatjhili, khona sizakwamukela isithembiso sakaMoya ngokukholwa.

Umthetho kanye nesithembiso

¹⁵ Bazalwana, akhe ngikhulume okujayelekileko ebantwini: Njengombana kungekho umuntu ongachitha namkha angezelele amezwi welifa nasele litloliwe, kunjalo-ke nangalokhu.

¹⁶ Nje-ke iinthembiso zenziwa ku-Abrahamu nesizukulwaneni sakhe. Umtlolo awuthi, “neenzukulwaneni” okutjho abantu abanengi, kodwana uthi, “nesizukulwaneni”, okutjho umuntu munye onguKrestu.

¹⁷ Engikutjhoko ngilokhu: Umthetho owafakwa eminyakeni emakhulu amane namatjhumi amathathu ngemva kwalokho, awusisusi isivumelwano esenziwa nguZimu phambilini bese ngalokho ususe isithembiso.

¹⁸ Yeke nakube ilifa liya ngomthetho, khona-ke alisayi ngesithembiso; kodwana uZimu ngomusa wakhe walinikela u-Abrahamu ngesithembiso.

¹⁹ Alo, bewuyini-ke umnqopho womthetho na? Wengezwa ngebanga lamacala kufikela lapha kuza khona isizukulwana esenzelwa isithembiso. Umthetho wafakwa ziingilozi ngesandla somlamuli.

²⁰ Yeke umlamuli akasingewomuntu oyedwa, kodwana uZimu munye.

Umnqopho womthetho

²¹ Alo-ke, umthetho ujamelene neenthembiso zakaZimu na? Awa, nakanye! Nakube umthetho bewunikelwe bona uphe ipilo, khona-ke ukulunga bekuzakuza ngomthetho.

²² Kodwana umtlolo uthi iphaseli loke nje lisibotjhwa sesono ukuze kuthi okwathenjiswa ngokukholwa kuJesu Krestu, kunikelwe labo abakholwako.

²³ Ngaphambi kobana ukukholwa kufike, umthetho bewusibambile usenze iimbotjhwa, wasivalela bekwaba kulapha kutjhatjhululwa khona ukukholwa.

²⁴ Yeke umthetho ngiwo owabekwa bona usidosele kuKrestu ukuze silungisiswe ngokukholwa.

²⁵ Njengombana kwanjesi ukukholwa sekufikile, umthetho akusesengiwo osinqophisako.

²⁶ Noke nibantwana bakaZimu ngokukholwa kuKrestu Jesu

²⁷ ngombana noke nina enabhabhadiselwa kuKrestu nembethe uKrestu.

²⁸ AkunamJuda, akunamGrigi, ikhoboka namkha otjhaphulukileko, omduna namkha omsikazi ngombana nimunye noke kuKrestu Jesu.

²⁹ Nakube ningebakaKrestu, khona-ke niziinzukulwana zaka-Abrahamu, neendlalifa ngokwesithembiso.