KWEBEGALATIYA 1 - IsiNdebele 2012 Translation

Ukulotjhisa

¹ UPowula, ompostoli ongaveli ebantwini namkha ongakezi ngabantu kodwana ngoJesu Krestu noZimu uBaba, owavusa uJesu ekufeni,

² kanye nabo boke abazalwana abanami, silotjhisa amabandla aseGalatiya:

³ Sithi sinifisela umusa nokuthula okuvela kuZimu uBaba neKosini uJesu Krestu,

⁴ owazinikela ngebanga lezono zethu kobana asihlangule esikhathini lesi sobukhohlakali ukuya ngokwentando kaZimethu nonguBaba.

⁵ Akadunyiswe ngokungapheliko! Amen.

Linye ivangeli

⁶ Ngiyarareka ngombana nimsinyana kangaka ukuhlubuka loyo owanibiza ngomusa kaKrestu, naphendukela evangelini elehlukileko,

⁷ ekhabo lakhona ekungasilivangeli nokuba livangeli. Kuyabonakala bona kunabantu abanihlangahlanganisako, abalinga ukona ivangeli lakaKrestu.

⁸ Kodwana nanyana kungaba ngithi namkha ingilozi evela ezulwini ingatjhumayela elinye ivangeli ngaphandle kwalelo esanitjhumayeza lona, ayithuweleliswe!

⁹ Njengombana besele sitjhwile, ngisabuyelela godu ngithi: Nakube kunomuntu onitjhumayeza ivangeli ngaphandle kwalelo esanitjhumayeza lona, akathuweleliswe loyo.

¹⁰ Kghani nje-ke ngizifunela ukuthandwa babantu namkha nguZimu na? Kghani ngifuna ukuthabisa abantu? Nakube bengisafuna ukuthabisa abantu, bengingeze ngaba likhoboka lakaKrestu.

Ubupostoli bakaPowula

¹¹ Akhese nginitjele bazalwana bona ivangeli engilitjhumayelakweli akusiyinto ethonywe babantu.

¹² Akhange ngilamukele emuntwini, godu azange ngafundiswa lona. Kodwana ngalifumana ngokwambulelwa nguJesu Krestu.

¹³ Nizwile ngepilo ebengiyiphila phambilini ebuJudeni bona bengilitlhagisa kangangani ibandla lakaZimu, ngilinga ukulitjhabalalisa.

¹⁴ Besele nginendima ekulu ebuJudeni, sele ngiphala namaJuda amanengi abontanga begodu bengitjhabatjheka khulu ngamasiko wabobaba.

¹⁵ Kodwana uZimu owangihlukanisela ngingakabelethwa, wangibiza ngomusa wakhe, wakuthabela

¹⁶ ukubonakalisa iNdodanakhe kimi ukuze ngimtjhumayele kabatjhili. Azange ngikhulumisane nenyama neengazi

¹⁷ namkha ngiye eJerusalema ukuyokubonana nalabo ebegade babapostoli ngaphambi kwami. Kodwana ngasuka khonokho ngaya e-Arabhiya, kwathi ngemva kwesikhathi ngabuyela eDamaseku.

¹⁸ Ngemva kweminyaka emithathu, ngakhuphukela eJerusalema kobana ngiyokwazana noPitrosi. Yeke ngahlala naye amalanga alitjhumi nahlanu.

¹⁹ Akhange ngibabone abanye abapostoli ngaphandle kwakaJakopo, umfowabo leKosi.

²⁰ Lokhu enginitlolela khona kuliqiniso phambi kwakaZimu.

²¹ Ngemva kwalokho ngaya eSiriya neSilisiya.

²² Bengingaziwa ubuso nobuso emabandleni weJudiya akuKrestu.

²³ Bebezwe kwaphela umbiko ngami othi: “Umuntu obegade azumana nathi phambilini, kwanjesi sele atjhumayela ukukholwa ebegade alinga ukukutjhabalalisa.”

²⁴ Yeke badumisa uZimu ngebanga lami.