KWEBEFILIPI 4 - IsiNdebele 2012 Translation

Ipilo yamakholwa

¹ Nje-ke, bazalwana abathandekako nengibahlulukeleko, nina enikuthaba kwami kanye nesihlohlo sami, kakarelani eKosini ngayo indlela leyo, bathandekako.

² Ngiyala u-Eyodiya noSuntirhe bona babe nomkhumbulo munye eKosini.

³ Iye, nawe ngiyakukhombela mnganami bona usize abomma laba ngombana batjhikatjhika nami emsebenzini wevangeli, bakanye noKlemente nabo boke abasebenzisana nami, labo amabizwabo angencwadini yokuphila.

⁴ Thabani njalo eKosini, ngiyabuyelela godu ngithi: Thabani!

⁵ Ukuthobeka kwenu akwaziwe babantu boke. IKosi sele iseduze.

⁶ Ningakhathazeki ngalitho kodwana kikho koke, iimbawo zenu azaziwe nguZimu ngomthandazo nangokuncenga okunokuthokoza.

⁷ Ukuthula kwakaZimu okudlula koke ukuzwisisa, kuzakubulunga iinhliziyo zenu nemikhumbulwenu kuKrestu Jesu.

⁸ Kokugcina bazalwana nanyana yini eliqiniso, ehloniphekako, elungileko, emsulwa, ethokozisako, eyazisako, iye, nakukhona ubuhle begodu nakukhona nanyana yini efanele idunyiswe, zindlani ngayo.

⁹ Ragelani phambili nokwenza enakufunda, nakwamukela, nakuzwa benakubona ngikwenza, yeke uZimu wokuthula uzakuba nani.

Ukuthokoza isipho

¹⁰ Kulithabo elikhulu kimi eKosini bona ekugcineni nibe nethuba lokuvuselela ukungitjheja kwenu. Beniseze ningitjheja, kodwana beninganathuba lokukubonisa lokho.

¹¹ Angikhulumi ngebanga lokuswela, kodwana ngikhuluma ngombana ngifundile ukwaneliswa ngalokho enginakho.

¹² Ngiyazi bona kunjani ukungabi nokwaneleko, godu ngiyazi bona kunjani ukuba nakho koke. Kikho koke nakibo boke ubujamo ngafunda ifihlakalo yokwaneliswa nanyana ngisutha namkha ngilamba.

¹³ Ngikghona ukwenza yoke into ngaloyo ongiqinisako.

¹⁴ Nokho kwaba kuhle kini kobana nihlanganyele eenhluphekweni zami.

¹⁵ Khulukhulu nina eniseFilipi, niyazi bona emihleni yokuthoma kwevangeli, nangisuka eMasedoniya, akunabandla elahlanganyela nami endabeni yokupha nokwamukela ngaphandle kwenu kwaphela.

¹⁶ Ngitjho nalokha nabengiseThesalonika, nangithumelela isizo elimalungana neendingo zami bekwaba kanengana.

¹⁷ Akusi kukobanyana ngifuna isipho, kodwana ngifuna inzuzo ebalelwa ngakini.

¹⁸ Ngifumene yoke ikokhelo bekwaba ngaphezulu; nganeliseke ngokupheleleko njengombana ngamukele izipho eningithumele zona ngo-Epafrodithu, umnikelo wephunga elimnandi, okumhlabelo owamukelekako nothokozisa uZimu.

¹⁹ Yeke uZimami uzakwanelisa esinye nesinye isidingo senu ngokomnono wakhe ephazimulweni ekuKrestu Jesu.

²⁰ KuZimethu nonguBaba, akube nedumo loke ngokungapheliko! Amen.

Isiphetho

²¹ Lotjhisani boke abacwengileko abakuKrestu Jesu. Abazalwana abanami lapha bayanilotjhisa.

²² Boke abacwengileko bayanilotjhisa, khulukhulu labo bekumba kaKhesari.

²³ Sengathi umusa weKosethu uJesu Krestu ungaba nani.