KWEBEFILIPI 3 - IsiNdebele 2012 Translation

Ukulunga kwamambala

¹ Kokugcina bazalwana, thabani eKosini. Ukubuyelela ukunitlolela ebenginitlolele khona phambilini akungikhathazi, kodwana kukulondeka kini.

² Yelelani izinja, niyelele iinsebenzi ezimbi, yelelani labo ababacwiyi.

³ Ngithi esisokileko, iye, thina esilotjha ngoMoya kaZimu. Sizikhakhazisa ngoKrestu Jesu, asinathemba enyameni,

⁴ nanyana nami nginazo iinzathu zokuba nethemba enyameni. Nakube kukhona odlumbana bona uneenzathu zokwethembela enyameni, zami-ke zingaphezulu.

⁵ Ngasokwa elangeni lobunane, ngililunga lesizwe sakwa-Israyeli, ekorweni yakwaBhenjamini, ngimHebheru obelethwe maHebheru; ngehlangothini lomthetho khona ngimFarisi.

⁶ Ngokokutjhisekela, ngingowazumana nebandla, nakukulungisiswa ngokomthetho, ngimsulwa.

⁷ Kodwana koke ebengikubala njengenzuzo, namhlanjesi sengikuthatha njengokulahlekelwa ngebanga lakaKrestu.

⁸ Ngaphezu kwalapho, ngithatha koke njengokulahlekelwa ngebanga lokuqakatheka okukhulu kokwazana noKrestu Jesu iKosami. Ngebanga lakhe ngilahlekelwe ngikho koke, yeke koke lokho ngikuthatha njengeenzibi ukuze ngizuze uKrestu,

⁹ ngifunyanwe ngimunye naye. Angisenakho ukulunga okungekwami okuvela emthethweni kodwana okuvela ngokukholwa kuKrestu, okukulunga okuvela kuZimu nokudzimelele ekukholweni.

¹⁰ Ngifuna ukwazi uKrestu namandla wokuvuka kwakhe ekufeni kanye nokuhlanganyela ekuhluphekeni kwakhe ngokuba njengaye ekufeni kwakhe,

¹¹ nakube ngingahle ngifikelele ekuvusweni kwabafileko.

Ukugijimela emnqopheni

¹² Ingasi bona sele ngikufumene lokho namkha sele ngifikile emnqopheni, kodwana ngihlabela phambili kobana ngikwenze kube ngekwami ngombana uKrestu Jesu ungenze ngaba ngewakhe.

¹³ Bazalwana angitjho bona sengikuzuzile lokho, kodwana yinye into engiyenzako: Ngikhohlwa okungemva kwami, ngihlabele phambili ngamandla kilokho okuphambi kwami.

¹⁴ Yeke ngihlabela phambili nginqophe esiphethweni kobana ngizuze umvuzo wokubizwa kwezulwini okungekwakaZimu ngoKrestu Jesu.

¹⁵ Akuthi soke-ke thina esesikhulile eKosini sibe nomkhumbulo onjalo. Yeke nakube nicabanga ngokwahlukileko ngananyana yini, nalokho uZimu uzanambululela khona.

¹⁶ Kwaphela asibambeleleni kilokho esele sinakho.

¹⁷ Bazalwana, hlanganyelani nabanye ekulandeleni isibonelo sami, niqale labo abaphila ngokwesibonelo esanibonisa sona.

¹⁸ Abanengi njengombana ngakhe nganitjela ngabo phambilini, nanje engisanitjela ngabo ngeenyembezi, baphila njengezitha zesiphambano sakaKrestu.

¹⁹ Isiphetho sabo kubhujiswa; uzimabo sisisu nedumo labo lisemanyalenabo, imikhumbulwabo inamathele ezintweni zephasi.

²⁰ Kodwana thina ikhaya lethu lisezulwini, lapha silindele khona uMsindisi, iKosi uJesu Krestu.

²¹ Uzakutjhugulula imizimba yethu ethobekileko ukuze ifane nomzimba wephazimulwakhe ngamandla amenza akghone ukwenza koke bona kube ngaphasi kwelawulo lakhe.