KWEBEFILIPI 2 - IsiNdebele 2012 Translation

Ukuzithoba kwakaKrestu nobukhulu bakhe

¹ Yeke nakube kukhona ukukhuthazeka kuKrestu, nakukhona ukududuzwa okuvela ethandweni, kukhona nehlanganyelo kaMoya godu kukhona umusa nezwelo,

² khona-ke phelelisani ithabo lami ngokuba nomkhumbulo owodwa, nibe nethando elilodwa, ngokuba mmoya munye begodu nibe hliziyonye.

³ Ningenzi ilitho ngehliziyo ede namkha ngokuzitjhaya kodwana ngokuzithoba, nithathe abanye bona bangcono kunani.

⁴ Ngiloyo naloyo angazitjheji yena kwaphela kodwana akatjheje neemfuno zabanye.

⁵ Yibani nomkhumbulo onjengalowo ebegade ukuKrestu Jesu,

⁶ owathi nanyana gade anejamo lakaZimu, azange azilinganise noZimu njengento yokuphangwa.

⁷ Kodwana wazehlisa, wathatha ijamo lekhoboka, wabelethwa njengomuntu. Wafunyaneka anejamo lomuntu.

⁸ Wazithoba, walalela bekwaba sekufeni, ngitjho ukufa esiphambanweni.

⁹ Ngalokho uZimu wamphakamisa, wamnikela ibizo elingaphezu kwamabizo woke,

¹⁰ ukuze kuthi ebizweni lakaJesu, woke amadolo aguqe, walabo abasezulwini, abasephasini nabangaphasi kwephasi,

¹¹ namalimi woke avume bona uJesu Krestu uyiKosi, kube lidumo lakaZimu uBaba.

Ukuphazima njengomkhanyo ephasini

¹² Ngalokho-ke bathandekako, njengombana beniseze ningilalela njalo, ingasi kwaphela nangikhona, kodwana khulukhulu nangingekho, yenzani isindiswenu ibe yipumelelo ngokwesaba nangokuthuthumela

¹³ ngombana nguZimu osebenza ngaphakathi kwenu, owenza bona nikghone begodu nisebenze ngokwentando yakhe.

¹⁴ Yenzani koke ngaphandle kokurhonona nokuphikisana,

¹⁵ ukuze ningasoleki begodu nibe msulwa, nibe bantwana bakaZimu abanganabala hlangana nesizukulwana esiphambeneko nesikhohlakeleko, eniphazima hlangana naso njengeenkwekwezi ephasini.

¹⁶ Kungebanga lokukakarela kwenu elizwini lokuphila ukobana ngizikhakhazise ngelanga lakaKrestu ngokuthi ukugijima namkha ukujuluka kwami azange kube lilize.

¹⁷ Kodwana nanyana ngingathululwa njengomnikelo wokuselwako phezu komhlabelo kanye nomnikelo wokukholwa kwenu, ngithokoza bengithabe nani noke,

¹⁸ ngokunjalo nani kumele nithokoze benithabe kanye nami.

UThimothi no-Ephafrodithu

¹⁹ Nginethemba eKosini uJesu bonyana ngizakuthumela uThimothi msinyana kini ukuze nami ngithokoziswe ziindaba ezivela kini.

²⁰ Anginaye omunye onjengaye onetjisakalo engazenzisiko ngepilo yenu.

²¹ Boke abanye bazifunela kwabo, abanandaba nokufunwa nguJesu Krestu.

²² Kodwana niyazi bona uThimothi uzibonakalise kangangani ngombana usebenze nami emsebenzini wevangeli njengendodana nayisebenza noyise.

²³ Ngalokho-ke ngitjhisekela ukumthumela msinyazana nasele ngibonile bonyana iindaba zami zijame njani.

²⁴ Nginethemba eKosini bona nami ngokwami ngizakuza msinyana kini.

²⁵ Kodwana ngibone kuqakathekile bona ngithumele kini u-Ephafrodithu umfowethu osisebenzi nolibutho kanye nami, godu nosithunywa senu enamthumela bona azokutjheja iindingo zami.

²⁶ Bekatjhisekela ukuzonibona noke, kodwana wakhathazeka ngombana besele nizwile bona bekagula.

²⁷ Ngambala bekagula kangangobana wapheze wahlongakala. Kodwana uZimu wamrhawukela begodu ingasi yena yedwa kodwana nami ukuze ngingabi nesizi phezu kwesizi.

²⁸ Ngalokho ngizimisele khulu ukumthumela kini ukuze kuthi nanimbonako godu, nithabe, kunciphe isizi lami.

²⁹ Yeke mamukeleni kuKrestu ngethabo loke, abanjalo nibaphathe ngehlonipho

³⁰ ngombana upheze wahlongakala ngebanga lokusebenzela uKrestu, wabeka ipilwakhe engozini ukuze ajamele imisebenzi eningazange nifikelele ukungenzela yona.