KWEBEFILIPI 1 - IsiNdebele 2012 Translation

Ukulotjhisa

¹ UPowula noThimothi, iinceku zakaKrestu Jesu, kibo boke abacwengileko kuKrestu Jesu abaseFilipi, bakanye nabaphathi namagosa:

² Akube kini umusa nokuthula okuvela kuZimu uBaba wethu neKosini uJesu Krestu.

UPowula uthandazela abaseFilipi

³ Ngihlala ngithokoza uZimu njalo nanginikhumbulako.

⁴ Kiyo yoke imithandazwami, nginithandazela ngethabo,

⁵ ngebanga lokuhlanganyela kwenu evangelini ukusuka ngelanga lokuthoma bekube gadesi.

⁶ Ngineqiniso bona loyo owathoma umsebenzi omuhle phakathi kwenu, uzawuraga abe awuqedelele bekube lilanga lakaKrestu Jesu.

⁷ Kuhle kimi ukuzizwela ngalendlela ngani noke ngombana nginithwele ehliziyweni yami! Iye ngombana nihlanganyele nami emseni kaZimu, ekubotjhweni kwami nekuvikeleni kanye nekuqiniseni ivangeli.

⁸ UZimu ungufakazi wami bona nginihlulukela kangangani noke ngesirhawu sakaKrestu Jesu.

⁹ Nginithandazela bona ithando lenu lihlale liphuphuma njalo, elwazini nelemukweni loke

¹⁰ ukuze nikwazi ukuhlolisisa okulungileko, nibe msulwa beningasoleki bekube lilanga lakaKrestu.

¹¹ Niveze iinthelo zokulunga eziza ngoJesu Krestu, kube yiphazimulo nedumo kuZimu.

Ukuphila ngoJesu

¹² Ngithanda bona nazi bazalwana bonyana izinto ezenzekileko kimi eqinisweni zaba lisizo ekuthuthukiseleni phambili ivangeli.

¹³ Ngalokho-ke, sele kwazeka kibo boke abalindi besigodlo nakiwo woke umuntu bonyana ngibotjhwe ngebanga lakaKrestu.

¹⁴ Nje-ke inengi labazalwana sele linesibindi eKosini ngebanga lokubotjhwa kwami, sele batjhumayela ngesibindi nangaphandle kokwesaba.

¹⁵ Iye, abanye batjhumayela uKrestu ngomona nangombango, kodwana abanye batjhumayela ngommoya omuhle.

¹⁶ Laba besibili bakwenza ngethando, basazi bonyana ngibekwe lapha kobana ngivikele ivangeli.

¹⁷ Kodwana laba bokuthoma batjhumayela uKrestu ngomrhobholo, ingasi ngokwethembeka, bahlose ukwengeza amatshwenyeko wami ekubotjhweni kwami.

¹⁸ Alo, kutshwenya ngani nje lokho? Okuqakathekileko kukobana uKrestu utjhunyayelwa ngazo zoke iindlela nanyana ngeenhloso zamanga namkha ngeqiniso; mina ngiyathokoza ngalokho. Iye ngizokuragela phambili ngithokoze

¹⁹ ngombana ngiyazi bona ngemithandazo yenu nesizo elivela kuMoya kaJesu Krestu, lokhu kuzakuba kukhululeka kwami.

²⁰ Kuyitjisakalo yerhuluphelwami kanye nethemba lokobana angizukurhubutjhwa ngitjho nanyana kungaba ngayiphi indlela, kodwana ukukhuluma kwami ngesibindi, uKrestu uzakuphakanyiswa gadesi njengombana kunjalo ngemihla emzimbenami, nanyana kungaba ngokuphila namkha ngokufa.

²¹ Ngambala, kimi ukuphila nguKrestu, ukufa yinzuzo.

²² Nakube ngimele ngiphile emzimbeni, lokho kutjho bona kuzakuba msebenzi oneenthelo kimi, nje-ke angazi bona ngikuphi engikwenyulako.

²³ Ngiphakathi kokubili: Isifiso sami kukobana ngemuke ngiyokuba noKrestu ngombana lokho kungcono khulu.

²⁴ Kodwana ukuphila emzimbeni kuqakatheke khulu ngebanga lenu.

²⁵ Njengombana ngineqiniso ngalokhu nje, ngiyazi bonyana ngizakuhlala ngingakhambi ngiragele phambili nani noke ngebanga lokuragela phambili kanye nethabo lenu ekukholweni.

²⁶ Ngalokho ngizazibandakanya ngokungapheliko ekuzikhakhaziseni kwenu kuKrestu Jesu lokha nangiza kini godu.

²⁷ Kwaphela philani ngendlela efanele ivangeli lakaKrestu ukuze kuthi nanyana ngiyabuya ngizonibona namkha ngingekho phakathi kwenu, nangizwa ngani, ngizakwazi bonyana nijamile begodu nidzimelele nimunye, nilwela ukukholwa kwevangeli nibambisene ngomkhumbulo owodwa.

²⁸ Yeke ningethuswa ngabajamelene nani ngombana kibo, lokho kusibonakaliso sokubhubha kwabo. Kodwana kini kukusindiswa kwenu. Lokhu kusisenzo sakaZimu.

²⁹ Yena uniphe ithuba ingasi lokulotjha uKrestu kwaphela kodwana nelokuhlupheka ngebanga lakhe,

³⁰ njengombana ninomtjhikatjhika ofana nalowo enangibona ngiphakathi kwawo, nagadesi nizwa bonyana ngisesenawo.