IZENZO ZABAPOSTOLI 9 - IsiNdebele 2012 Translation

Ukutjhuguluka kwakaSawula

¹ USawula waphikelela ngokusongela ukubulala abafundi bakaJesu, waya kumphristi omkhulu

² wayokubawa iincwadi zokuya esinagogini eDamaseku, khona kuzakuthi nafumana nanyana ngubani weNdlela leyo kungaba madoda namkha abafazi, ababuyisele eJerusalema babotjhiwe.

³ Asakhamba njalo atjhidele eDamaseku, khonokho umkhanyo ovela ezulwini wabaneka kuye mahlangothi woke.

⁴ Waduleka phasi, wezwa ilizwi lisithi kuye: “Sawula, Sawula, ungizumelani na?”

⁵ Wabuza wathi: “Ungubani wena, Kosi, na?” Ilizwi lathi: “NginguJesu ozumana naye.

⁶ Nje-ke vuka, uye ngedorobheni; uzakutjelwa bona wenzeni.”

⁷ Amadoda agade akhamba noSawula ajama lapho akakamele; ezwa ilizwi kodwana akhange abone muntu.

⁸ USawula wasikima, kodwana kwathi nanyana amehlwakhe bekavulekile, akhange abone ilitho. Yeke bambamba ngesandla bamngenisa ngeDamaseku.

⁹ Amalanga amathathu bekangaboni, angagomi begodu angaseli ilitho.

¹⁰ EDamaseku bekunomfundi obizwa bona ngu-Ananiyasi; iKosi yathi kuye ngombono: “Ananiyasi!” Yena wathi: “Ngilapha, Kosi!”

¹¹ IKosi yathi kuye: “Khamba uye endlini kaJudasi endledlaneni ekuthiwa nguNqophile, ufune indoda evela eTarsusi enguSawula; qala iyathandaza.

¹² Yena ubone ngombono indoda engu-Ananiyasi ingena, ibeka izandla phezu kwakhe khona azakubona godu.”

¹³ Kodwana u-Ananiyasi waphendula wathi: “Kosi, ngizwe imibiko eminengi ngendoda leyo, nangazo zoke izinto ezimbi ezenzileko ngabacwengileko bakho eJerusalema.

¹⁴ Yona yeza ngegunya labaphristi abakhulu bona ibophe boke abantu abathandaza ebizweni lakho.”

¹⁵ Kodwana iKosi yathi kuye: “Khamba ngombana nguye osisitja sami esikhethiweko sokuphatha ibizo lami ebantwini abatjhili, emakhosini nebantwini bakwa-Israyeli.

¹⁶ Begodu ngizamtjengisa bona kufuze ahlupheke kangangani ngebanga lebizo lami.”

¹⁷ Yeke u-Ananiyasi waya endlini leyo wafese wangena kiyo. Wabeka uSawula izandla, wathi: “Mfowethu Sawula, iKosi uJesu eyazibonakalisa kuwe usendleleni usiza lapha, ingithume kobana ubuye ubone bewuzaliswe ngoMoya oCwengileko.”

¹⁸ Khonokho into enjengepepha yasuka emehlweni kaSawula, wabuye wabona godu. Wasikima, wabhajadiswa.

¹⁹ Kwathi selagomile, amandlakhe abuya. Wahlala amalangana ambalwa nabafundi eDamaseku.

USawula utjhumayela eDamaseku

²⁰ Masinyana wathoma ukutjhumayela emasinagogini bona uJesu uyiNdodana kaZimu.

²¹ Boke abamzwako barareka bathi: “Kanti lo akasiyo indoda eyabanga isiphithiphithi eJerusalema ngalabo abathandaza ebizweneli na? Angithi ize lapha kobana izobabamba ibase ebaphristini abakhulu baziimbotjhwa?”

²² Ukuya ngokuya uSawula wakhula emandleni, wamangaza amaJuda ahlala eDamaseku ngokubonisa bona uJesu unguKrestu.

²³ Ekukhambeni kwesikhathi, amaJuda abopha izungu lokumbulala.

²⁴ USawula wabazi ubukhwebetjhana babo. Ubusuku nemini bamlalela emasangweni wedorobho kobana bambulale.

²⁵ Kodwana abafundi bakhe bamthatha ngobusuku bamehlisa ngesiqwebu ngetjhuba elisemthangaleni.

USawula eJerusalema

²⁶ Kwathi lokha nakabuyela eJerusalema walinga ukuzihlanganisa nabafundi, kodwana boke bamesaba bangakholwa bona mbala umfundi.

²⁷ UBharinabhasi weza wamthatha wamusa ebapostolini. Wabahlathululela bona uSawula wayibona njani iKosi endleleni, nokobana iKosi yakhuluma njani naye. Wabatjela nokobana uSawula waba nesibindi esingangani ngokutjhumayela ngebizo lakaJesu eDamaseku.

²⁸ Alo-ke, uSawula wahlala nabo wakhamba yoke indawo eJerusalema, akhuluma ngesibindi ebizweni leKosi.

²⁹ Wakhuluma waphikisana namaJuda akhuluma isiGirigi, kodwana balinga ukumbulala.

³⁰ Kuthe bona abazalwana bezwe ngalokhu, bamthatha bamehlisela eKhesariya bamthumela eTarsusi.

³¹ Yeke-ke ibandla laba nokuthula kilo loke iJudiya, iGalile neSamariya. Lakheka, landa ngokuqiniswa nguMoya oCwengileko, lakhamba ngokwesaba iKosi.

UPitrosi ngeLida nangeJopa

³² UPitrosi asakhamba kizo zoke iindawo, wathekela nabacwengileko ngeLida.

³³ Lapho wahlangana nendoda engu-Ayeniya, egade ife ihlangothi iminyaka ebunane ilele ingakwazi ukuvuka phasi.

³⁴ UPitrosi wathi kiyo: “Ayeniya, uJesu Krestu uyakupholisa. Vuka uqhusulule.” Khonokho u-Ayeniya wasikima.

³⁵ Boke abahlala ngeLida nangeTjharoni bambona, batjhugulukela eKosini.

³⁶ NgeJopa bekukhona umfundikazi, ibizo lakhe elinguThabitha, nakutjhugululwako ngesiGirigi kutjho uDorkasi. Gade azinikele ukwenza okulungileko asiza nabadududu.

³⁷ Ngesikhatheso wahlatjwa kugula wafa. Isidumbu sakhe sahlanjiswa salaliswa ngelawini elingehla.

³⁸ IJopa gade ingasikude neLida; nje-ke kuthe bona abafundi bezwe bonyana uPitrosi ungeLida, bathumela kuye amadoda amabili nomlayezo othi: “Siyakuncenga yewuze msinyana kithi.”

³⁹ UPitrosi wasikima wakhamba nabo. Nafikako, bamusa ngelawini elingehla. Boke abahlolokazi bamzomba, balila bamkhombisa izambatho neempahla ezinye uDorkasi azithunga asaphila nabo.

⁴⁰ UPitrosi wabakhuphela boke ngaphandle kwelawu; nje-ke waguqa phasi wathandaza, waphendukela ngesidunjini wathi: “Thabitha, vuka!” Wavula amehlo wakhe wabona uPitrosi, wathabuluka wahlala.

⁴¹ UPitrosi wamsiza ngokumsikimisa, wabiza abacwengileko nabahlolokazi wabanikela yena sele aphila.

⁴² Lokhu kwazeka kiyo yoke iJopa, abanengi bakholwa eKosini.

⁴³ UPitrosi wahlala ngeJopa amalanga amanengi nomtjhukiinkhumba uSimoni.