IZENZO ZABAPOSTOLI 8 - IsiNdebele 2012 Translation

¹ USawula wavumelana nabo ngokubulawa kwakaStefani. Khona mhlokho ibandla eJerusalema lathoma ukuzunywa. Boke bahlakazeka emazweni weJudiya neSamariya, kwasala abapostoli kwaphela.

USawula uzumana namakholwa

² Amadoda ebegade esaba uZimu ambulunga uStefani, abe amzilela ngokulila okukhulu.

³ Kodwana uSawula warhayila ibandla, akhamba angena indlu ngendlu arhurhubisa amadoda nabafazi, abadlhunya ngesikhungweni.

UFlebhe utjhumayela eSamariya

⁴ Labo ebegade bahlakazekile batjhumayela ilizwi lapha bakhamba khona.

⁵ UFlebhe wehlela edorobheni leSamariya watjhumayela khona uKrestu.

⁶ Iinqubuthu zabantu zalalelisisa uFlebhe ngahliziyonye; iye, bezizwa begodu zibona iimbonakaliso azenzako.

⁷ Kabanengi imimoya emimbi beyiphuma ngokulila okukhulu, abafe ihlangothi nabaziinrhole bapholiswa.

⁸ Ngalokho kwaba khona ukuthaba okukhulu eSamariya.

⁹ Edorobheni lelo bekunendoda, ibizo layo elinguSimoni, okwathi eenkhathini warara amaSamariya ngemilingo; wazikhuluma bona yena mkhulu.

¹⁰ Boke abantu, okutjho abaphezulu nabaphasi, bebamlalelisisa, barhuwelela basithi: “Umuntu lo umamandla kaZimu, aziwa bona mamandla amakhulu.”

¹¹ Bamnamathela ngombana gade sele abarare isikhathi eside ngemilingo yakhe.

¹² Kodwana kuthe nabakholwa umlayezo kaFlebhe ngeendaba ezimnandi zombuso kaZimu nebizo lakaJesu Krestu, kwabhajadiswa amadoda kanye nabafazi.

¹³ USimoni naye wakholwa bewabhajadiswa. Walandela uFlebhe kiyo yoke indawo, ararwa ziimbonakaliso neemangaliso ezikulu ebegade azibona.

¹⁴ Lokha abapostoli eJerusalema nabezwa bona abantu beSamariya sebalamukele ilizwi lakaZimu, bathumela uPitrosi noJwanisi kibo.

¹⁵ Kuthe bona bafike, bathandazela bona bamukele uMoya oCwengileko

¹⁶ ngombana uMoya oCwengileko bekangakehleli nakoyedwa wabo; kodwana bebabhajadiswe kwaphela ebizweni leKosi uJesu.

¹⁷ Yeke uPitrosi noJwanisi bababeka izandla, bamukela uMoya oCwengileko.

¹⁸ Kuthe bona uSimoni abone bonyana uMoya bekamukelwa ngokubekwa bapostoli izandla, waletha imali,

¹⁹ wathi: “Nginikelani nami amandla la, khona kuzakuthi woke engimbeka izandla, amukele uMoya oCwengileko.”

²⁰ Kodwana uPitrosi wamphendula wathi: “Kwanga ungabhubha nemadlanakho leyo ngombana ucabanga bona ungathenga isipho sakaZimu ngemali!

²¹ Awunangcenye namkha isabelo emsebenzini lo ngombana ihliziywakho ayikalungi phambi kwakaZimu.

²² Nje-ke phenduka ebukhohlakalini bakho uthandaze uZimu bona akulibalele. Mhlamunye uzakukulibalela emicabangweni enje yehliziyo

²³ ngombana ngiyabona bonyana usenyongweni ebabako nemakhamandeleni wesono.”

²⁴ Nje-ke uSimoni waphendula wathi: “Yeningithandazele kuZimu kobana koke enikutjhwileko kungangehleli.”

²⁵ Emva kobana banikele ubufakazi bebatjhumayela ilizwi leKosi, uPitrosi noJwanisi babuyela eJerusalema, bakhamba batjhumayela ivangeli emizaneni eminengi yeSamariya.

UFlebhe nesikhulu seTopiya

²⁶ Nje-ke ingilozi kaZimu yathi kuFlebhe: “Iya ngesewula endleleni enganabantu, eyehla ukusuka eJerusalema itjhinga eGaza.”

²⁷ Yeke uFlebhe wathoma ikhambo lakhe. Endleleni wahlangana nomphakulwa weTopiya obekasikhulu esiqakathekileko esiphethe amagugu wendlu yendlovukazi yeTopiya. Indoda le beyiye ukuyokulotjha eJerusalema.

²⁸ Nje-ke sele ibuyela ekhaya, beyihlezi ekaranenayo ifunda incwadi yomphorofidi u-Isaya.

²⁹ UMoya wathi kuFlebhe: “Tjhidela ekaraneni leyo ukhambe nayo.”

³⁰ Mbala uFlebhe wagijimela ekaraneni, wezwa indoda leyo ifunda incwadi yomphorofidi u-Isaya, wabuza wathi: “Uyakuzwa lokho okufundako na?”

³¹ Yona yathi: “Ngingakuzwa njani, ngaphandle kobana kube khona ongihlathululelako na?” Nje-ke yabawa uFlebhe bona akhwele ahlale hlanu kwayo.

³² Indima yomtlolo egade ifundwa mphakulwa ngile: “Njengemvu esiwa ekuhlatjweni nanjengemvana ethulileko phambi komrhunayo, ngaleyondlela azange ivule umlomayo.

³³ Ekuthotjisweni kwayo yadinywa ubulungiswa. Ngubani ongahlathulula isizukulwana sayo? Mbala, ipilwayo yasuswa ephasini.”

³⁴ Umphakulwa wabuza uFlebhe wathi: “Akhese ungitjele, umphorofidi ukhuluma ngobani, uzitjho yena namkha omunye?”

³⁵ UFlebhe wathoma ukukhuluma ngendimana le yemitlolo wamtjela ivangeli ngoJesu.

³⁶ Basakhamba endleleni, bafika endaweni lapha bekunamanzi khona, umphakulwa wathi: “Qala naka amanzi, ngingakhandelwa yini bona ngingabhajadiswa na?”

³⁷ UFlebhe wathi kuye: “Ungabhajadiswa nawukholwa ngehliziywakho yoke.” Yena waphendula wathi: “Ngiyakholwa bona uJesu Krestu yiNdodana kaZimu.”

³⁸ Umphakulwa wayala bonyana ikarana ijame. Nje-ke uFlebhe nomphakulwa behlela ngemanzini, uFlebhe wambhabhadisa.

³⁹ Kuthe bona baphume ngemanzini, uMoya kaSomnini wahlutha uFlebhe. Umphakulwa akhange abe asambona godu; yeke-ke waraga ngendlelakhe, athabile.

⁴⁰ UFlebhe wazifunyana asele ase-Atjhidodi, waraga njalo atjhumayela ivangeli emizaneni yoke bewafika eKhesariya.