IZENZO ZABAPOSTOLI 6 - IsiNdebele 2012 Translation

Ukukhethwa kwabasizi abalikhomba

¹ Kwathi lokha inani labafundi nalisiya lisanda, kwaba khona ukukhalala hlangana namaJuda akhuluma isiGirigi ngamaJuda akhuluma isiHebheru ngombana athi abahlolokazi bawo abatjhejwa ekwabelweni kwangamalanga.

² Abapostoli abalitjhumi nambili babiza soke isiqubuthu sabafundi bathi: “Akukalungi bona singatjhiya ilizwi lakaZimu ngebanga lokwabela ukudla.

³ Alo-ke bafowethu, khethani hlangana nani amadoda alikhomba okwaziwa bona azele uMoya oCwengileko nobuhlakani, siwabeke bona ibe ngiwo aqala umsebenzi lo.

⁴ Thina ngokwethu sizakunikela soke isikhathi sethu ekuthandazeni nemsebenzini wokutjhumayela.”

⁵ Ilizwi leli lanelisa woke umphakathi. Yeke, bakhetha uStefani, indoda egade izele uMoya oCwengileko nokukholwa, uFlebhe, uProrhoro, uNikanori, uTimoni, uPharimenasi noNikolawu ovela e-Anthiyorhiya owatjhugululelwa ebuJudeni.

⁶ Babajamisa phambi kwabapostoli; abapostoli bathandaza bababeka izandla.

⁷ Njalo-ke ilizwi lakaZimu laya lirhatjheka lisanda. Inani labafundi eJerusalema landa nenani elinengi labaphristi lamukela ukukholwa.

Ukubotjhwa kwakaStefani

⁸ UStefani, azele umusa namandla, wenza iimbonakaliso neemangaliso ezikulu hlangana nabantu.

⁹ Kodwana amanye wamalunga wesinagogi elaziwa bona ngelabaTjhaphulukileko, asikima athoma ukuphikisana noStefani. BekumaJuda avela eSirene ne-Alekzandriya. Wona asekelwa ngamanye avela eSilisiya ne-Asiya.

¹⁰ Kodwana azange akghone ukujamelana nokuhlakanipha kwakhe namkha uMoya oCwengileko agade akhuluma ngaye.

¹¹ Nje-ke bahlohlozela amadoda athileko ngasese bona athi: “Simzwile ahlambalaza uMosi noZimu!”

¹² Ngalokho baphehla abantu, abaphathi nabafundisi bomthetho, balunga kuye, bambamba, bamusa esigungwini sabarholi bamaJuda.

¹³ Bahlela abofakazi bamanga abamrhwayela bathi: “Indoda le, ayilisi ukuhlambalaza indawo ecwengileko le nomthetho kaMosi.

¹⁴ Mbala siyizwe isithi uJesu weNazaretha loyo, uzakurhayila indawo le abe aphendule namasiko uMosi asinikela wona!”

¹⁵ Boke egade bahlezi esigungwini, bamqalisisa uStefani, babona ubuso bakhe bufana nebengilozi.