IZENZO ZABAPOSTOLI 5 - IsiNdebele 2012 Translation

U-Ananiyasi noSafira

¹ Indoda ibizo layo elingu-Ananiyasi nomkayo uSafira, yathengisa ingcenye yendawo,

² yagodla enye imali nomkayo anokwazi okupheleleko ngalokho. Yaletha yoke eseleko yafese yayibeka eenyaweni zabapostoli.

³ Nje-ke uPitrosi wathi kiyo: “Ananiyasi, kuze njani bona uvumele uSathana azalise ihliziywakho kobana ukhulume amanga kuMoya oCwengileko, uzitjhiyele enye imali kileyo oyizuzileko ngendawo na?

⁴ Kanti ungakayithengisi bekungasingeyakho na? Nangemva kobana seyithengisiwe imali beyingekho kanti elawulwenakho na? Alo-ke, kuyini ekwenze bona ucabange ukwenza into enje na? Awukakhulumi amanga ebantwini kodwana kuZimu!”

⁵ Kuthe bona u-Ananiyasi ezwe lokho, waduleka phasi, wafa. Ukwesaba okukhulu kwehlela boke abezwe okwenzekileko.

⁶ Nje-ke amasokana angena, aphuthela umzimbakhe, amkhupha ayombulunga.

⁷ Pheze ngemva kwama-awara amathathu kwafika umkakhe, kodwana bekangazi okwenzekileko.

⁸ UPitrosi wambuza wathi: “Akhese ungitjele, kungabe leli linani enithengise ngalo indawo na?” Yena wathi: “Iye, linani lakhona lelo.”

⁹ Nje-ke uPitrosi wathi kuye: “Kubayini nivumelene ngokulinga uMoya kaSomnini na? Qala-ke, iinyawo zamadoda abulunge indodakho zisemnyango, nawe azokuthwala, akukhuphe!”

¹⁰ Khonokho waduleka phasi ngeenyaweni zakhe, wafa. Kuthe lokha amasokana nangenako amfumana afile, amthwala ayombulunga eqadi kwendodakhe.

¹¹ Ukwesaba okukhulu kwabamba ibandla loke nabo boke abezwe ngezehlakalwezi.

Abapostoli benza iimbonakaliso neemmangaliso

¹² Abapostoli benza iimbonakaliso neemangaliso ezinengi hlangana nabantu begodu bebamunye bahlanganyela ndawonye ngethurini lakaSolomoni.

¹³ Akakho noyedwa owaba nesibindi sokuhlanganyela nabo; nanyana kunjalo bebanedumo elihle ebantwini.

¹⁴ Abantu abakholwako bebasiya bangezeleleka ngobunengi eKosini, iye isibalo esikhulu samadoda namakhosikazi.

¹⁵ Ngemiphumela yalokho, abantu bebakhuphela abagulako eendledlaneni ngaphandle, babalalise emikghadini nemisemeni khona kuzakuthi lokha uPitrosi nadlulako, isithunzi sakhe sisithibeze abanye babo.

¹⁶ Iinqubuthu zabantu zavela kiyo yoke imizi ezombeleze iJerusalema, zaletha abagulako nalabo egade banemimoya emimbi; boke bapholiswa.

Abapostoli bayazunywa

¹⁷ Yeke umphristi omkhulu nabo boke ababambisene naye, ebekumalunga womkhandlu wabaSadusi, baba nomona.

¹⁸ Babopha abapostoli, babadlhunya ngesikhungweni somphakathi.

¹⁹ Kodwana phakathi kobusuku ingilozi kaSomnini yavula iminyango yesikhungo, yabakhuphela ngaphandle yathi kibo:

²⁰ “Khambani niyokujama eenrhodlweni zethempeli, nitjele abantu umlayezo wobuphilo obutjhobu.”

²¹ Sebezwile lokho bangena ngethempelini sekusile, bathoma ukufundisa abantu. Kwathi lokha umphristi omkhulu nababambisene naye nabafikako, babizela ndawonye soke isigungu sabarholi bamaJuda nabaphathi boke bakwa-Israyeli; bathumela esikhungweni bona kulethwe abapostoli.

²² Kodwana iinthunywa nazifika esikhungweni, akhange zibafunyane lapho. Nje-ke zabuyela emuva zayokubika zathi:

²³ “Nasifikako esikhungweni, sifumene kukhiyiwe nabalindi boke baqalile emasangweni, kodwana nasivula amasango, akhange sifumane muntu ngaphakathi!”

²⁴ Ngokuzwa lokho induna yabalindithempeli nabaphristi abakhulu bakhungatheka, barareka bona kungaba mhlolo bani-ke lo.

²⁵ Khonapho kwafika indoda eyathi kibo: “Qalani! Amadoda eniwadlhunye ngesikhungweni ajame ngeenrhodlweni zethempeli afundisa abantu!”

²⁶ Yeke induna yakhamba nabalindithempeli bayobathatha babaletha. Akhange basebenzise amandla ngombana gade besaba bona abantu bangabakhanda ngamatje.

²⁷ Sele babalethile babajamisa phambi kwesigungu sabarholi bamaJuda, umphristi omkhulu wababuza wathi:

²⁸ “Sanikhalimela bona ningafundisi ngebizwelo! Kodwana nanyana kunjalo nirhatjhe ifundiswenu kilo loke iJerusalema benafuna bona sibe nomlandu weengazi zendoda le!”

²⁹ UPitrosi nabanye abapostoli baphendula bathi: “Kufuze bona silalele uZimu kunabantu.

³⁰ UZimu wabobaba bethu wamvusa uJesu kabafileko, enimbuleleko nina ngokumphanyeka esiphambanweni.

³¹ UZimu wamphakamisela ngesigomeni sakhe njengomrholi nomsindisi, khona azakunikela abantu bakwa-Israyeli ithuba lokutjhuguluka nokulitjalelwa kwezono.

³² Thina sibofakazi bezintwezi kanye noMoya oCwengileko uZimu amuphe labo abamlalelako.”

³³ Kuthe bona bakuzwe lokho, batjhitjhibala bacabanga ukubabulala.

³⁴ Kodwana umFarisi obizwa bona nguGamaliyeli, umfundisi womthetho ogade ahlonitjhwa khulu babantu, wasikima hlangana nesigungu wabawa bona amadoda lawo akhutjhelwe ngaphandle kwesikhatjhana.

³⁵ Wathi esigungwini: “Ma-Israyeli, yelelani enihlose ukukwenza emadodeni la.

³⁶ Esikhathini esinye esadlulako uTheyudasi wakhe wavela wazikhuluma bona yena mkhulu, walandelwa madoda amakhulu amane. Yena wabulawa, abalandeli bakhe boke barhatjheka, koke kwaphenduka ilize.

³⁷ Emva kwalokho uJudasi, umGalile, wavela naye ngesikhathi sokubalwa kwabantu wadosa abantu abanengi ekuvukeleni uburholi. Kodwana naye wabulawa, abalandeli bakhe boke bahlakazeka.

³⁸ Yeke, mayelana nendaba le nginiyelelisa ngokuthi, ‘Hlukanani namadoda! Aliseni akhambe ngombana nangabe amano nomsebenzawo kuvela ebantwini, kuzakuhluleka.

³⁹ Kodwana nangabe kuvela kuZimu, angekhe naphumelela ukuwavimba; nakungasinjalo, nizazifumanisa ngokwenu nisilwa noZimu!’ ”

⁴⁰ Isigungu salandela ikhalimo kaGamaliyeli. Yeke babizela abapostoli ngaphakathi, babaritha bebabakhalima bona bangasakhulumi ngebizo lakaJesu, babathukulula.

⁴¹ Abapostoli basitjhiya isigungu sabarholi bamaJuda, bakhamba ngombana bazibona bafanele ukuhlunguphazwa ngebanga lebizwelo.

⁴² Ilanga nelanga ngethempelini nendlini ngendlu akhange balise ukufundisa nokumemezela ivangeli bona uJesu unguKrestu.