IZENZO ZABAPOSTOLI 4 - IsiNdebele 2012 Translation

UPitrosi noJwanisi esigungwini sabarholi bamaJuda

¹ Kuthe uPitrosi noJwanisi basakhuluma nabantu njalo, abaphristi nomphathi wabalindithempeli nabaSadusi beza kibo,

² banyenyile ngombana abapostoli bebafundisa abantu begodu batjhumayela ukuvuka kwabafileko ngoJesu.

³ Nje-ke bababamba babadlhunya ngesikhungweni kufikela ngakusasa ngombana gade sekuhlwile.

⁴ Kodwana abanengi abawuzwako umlayezo bakholwa; inani lamadoda landa lafika pheze eenkulungwaneni ezihlanu.

⁵ Ngakusasa kwakhona ababusi, abaphathi nabafundisi bomthetho bahlangana eJerusalema.

⁶ Bebahlangene no-Anasi umphristi omkhulu noKhayafasi, uJwanisi no-Alekzandra nabanye bomndeni womphristi omkhulu.

⁷ Bathi akulethwe abapostoli bajanyiswe phambi kwabo, bababuza bathi: “Lokho nikwenze ngawaphi amandla namkha ngaliphi ibizo na?”

⁸ Nje-ke uPitrosi azele uMoya oCwengileko wathi kibo: “Babusi nabaphathi babantu,

⁹ nangabe sibuzwa namhlanjesi ngesenzo esihle esenziweko emuntwini obekabuthakathaka bona wathabuluka njani,

¹⁰ akwazeke kini namhlanje nebantwini boke bakwa-Israyeli bona umuntu lo ujame phambi kwenwapha athabulukile aphilile ngamandla webizo lakaJesu Krestu weNazaretha, loyo enambethelako esiphambanweni, uZimu wamvusa kabafileko.

¹¹ “Yena lilitje eladelwa babakhi esele libe ngeliqakathekileko ejikeni.

¹² “Ayikho isindiso ngomunye ngombana alikho elinye ibizo ezulwini nephasini esinikelwe lona bona sisindiswe ngalo.”

¹³ Kwathi lokha nababona isibindi uPitrosi noJwanisi abanaso nokulemuka bona bekubabantu abangakafundi, barareka khulu bebalemuka bona bebakhamba noJesu.

¹⁴ Kodwana ngokubona umuntu opholisiweko ajame nabo lapho, akhange babe nelizwi.

¹⁵ Babatjela bona baphumele ngaphandle, nje-ke bakhulumisana bodwa,

¹⁶ babuzana bathi: “Sizokwenza njani ngabantwaba? Phela kusepanyameni bona umuntu ohlala eJerusalema uyazi bonyana isimangaliswesi senziwe ngibo begodu angekhe sakulandula lokho.

¹⁷ Kodwana ukuze senze indaba le ingarhatjheki ukuya phambili ebantwini, asibakhalimeleni abantwaba bona bangasathomi godu bakhulume nanyana kubani ngebizweli.”

¹⁸ Nje-ke bababizela ngesigungwini godu, babayala bona bangasakhulumi namkha bafundise ngebizo lakaJesu.

¹⁹ Kodwana uPitrosi noJwanisi babaphendula bathi: “Gwebani ngokwenu bona ngikuphi okulungileko emehlweni wakaZimu, ukulalela nina namkha uZimu na?

²⁰ Mbala thina angekhe salisa ukukhuluma ngesikubonileko nesikuzwileko ngokwethu.”

²¹ Ngemva kobana sele babakhalimele, babatjhaphulula bona bakhambe ngombana akhange bakwazi ukubabhambalalisa ngesizathu sokobana woke umuntu bekadumisa uZimu ngokwenzekileko:

²² Umuntu okwenzeka kuye isimangaliso sokuphulukiswa lo, bekeqile ematjhumini amane weminyaka ngobudala.

Umthandazo wamakholwa

²³ Emva kokuthukululwa, uPitrosi noJwanisi babuyela kubafowabo bababikela bona abaphristi abakhulu neenkhulu zitheni.

²⁴ Sele bakuzwile lokho, baphakamisela ilizwi lomthandazo ngahliziyonye kuZimu bathi: “Somandla, Mdali wezulu nephasi nelwandle nakho koke okukilo,

²⁵ wakhuluma ngoMoya oCwengileko ngomlomo wakakhokho wethu uDavida, inceku yakho, nawusithi, “ ‘Kubayini bezizwe bayaluza, nabantu bahumuzela na? Kungelize!

²⁶ Amakhosi wephasi ayazihlela, nababusi baluka amaqhinga ngoSomnini nangozesiweko wakhe.’

²⁷ “Ngambala uHerode noPontiyasi Pilatu bahlangene nabezizwe nabantu bakwa-Israyeli emzini lo kobana bajamelane nencekwakho ecwengileko uJesu nowayizesa

²⁸ bona izokwenza nanyana yini isandla sakho esakuhlosa bona kwenzeke.

²⁹ Nje-ke Somnini, yelela ukusongela kwabo bese unikela iinceku zakho bona zikhulume ilizwi ngesibindi esikhulu.

³⁰ Yelula isandla sakho upholise, wenze imikarisomraro neemangaliso ngebizo lencekwakho ecwengileko uJesu.”

³¹ Kuthe sebathandazile, indawo ebebahlanganele kiyo yadedemela. Boke bazaliswa ngoMoya oCwengileko bakhuluma ilizwi lakaZimu ngesibindi.

Ukwabelana kwamakholwa

³² Boke abakholwako bebamunye ngehliziyo nangomkhumbulo. Akakho noyedwa owathi ipahlakhe ngeyakhe yedwa, kodwana bahlanganyela koke abanakho.

³³ Ngamandla amakhulu abapostoli bafakaza ngokuvuka kweKosi uJesu, godu nesisa esikhulu besikibo boke.

³⁴ Akakho noyedwa ogade adududu phakathi kwabo. Ngalokho labo egade baneendawo namkha izindlu bebazithengisa balethe imali abathengelwe ngayo,

³⁵ bayibeke eenyaweni zabapostoli. Nje-ke omunye nomunye wabelwa njengokuswela kwakhe.

³⁶ UJosefa umLevi weSayipurasi, abapostoli egade bambiza bona nguBharinabhasi, nakutjhugululwako kutjho bona “indodana yenduduzo”,

³⁷ wathengisa indawakhe, waletha imali wafese wayibeka eenyaweni zabapostoli.