IZENZO ZABAPOSTOLI 3 - IsiNdebele 2012 Translation

Indoda esirhole iyathabuluka

¹ Ngelinye ilanga uPitrosi noJwanisi baya ngethempelini kusikhathi sokuthandaza ngesimbi yesithathu malangantambama.

² Khonapho kwalethwa indoda ebegade isirhole kwekubelethweni kwayo. Indoda leyo beyigugwa imihla ngemihla ibekwa esangweni lethempeli ebekuthiwa lisango uMuhle kobana izozibawela izipho ebantwini ebebangena ngethempelinapho.

³ Kuthe lokha umuntu loyo nakabona uPitrosi noJwanisi sele bazokungena, wababawa isipho.

⁴ UPitrosi wamqala poro banoJwanisi, wathi kuye: “Siqala!”

⁵ Yeke naye wabaqala poro, asithi mhlamunye uzakufumana ilitho kibo.

⁶ UPitrosi wathi kuye: “Isiliva negolide anginalo, kodwana enginakho ngikupha khona: Ebizweni lakaJesu Krestu weNazaretha, sikima ukhambe!”

⁷ Wambamba ngesandla sesigoma wamsikimisa. Khonokho iinyawo neengogoriyana zakhe zaqina.

⁸ Weqela phezulu wajama ngeenyawo, wathoma wakhambakhamba. Nje-ke wangena ngesirhodlweni sethempeli kanye nabo, akhamba aseqa, adumisa uZimu.

⁹ Kuthe lokha boke abantu nabambona akhamba adumisa uZimu,

¹⁰ babona bonyana nguye yena loya obegade anande ahlala abawa esangweni ebekuthiwa lisango uMuhle. Nje-ke barareka bebakakamala ngokwenzekileko kuye.

Ikulumo kaPitrosi ngethempelini

¹¹ Kuthe umuntu loyo asanamathele kuPitrosi noJwanisi njalo, boke abantu ngokurareka bagijimela kibo endaweni ebizwa bona lithuri lakaSolomoni.

¹² Kwathi lokha uPitrosi nakabona lokho, wathi kibo: “Ma-Israyeli, kunirarelani lokhu na? Kwakhona kubayini nisirhudulele amehlo ngokungathi kube mamandlethu namkha ikolwethu eyenze umuntu lo bona akhambe na?

¹³ UZimu ka-Abrahamu, ka-Isaka noJakopo, uZimu wabokhokho bethu, uphazimulise uJesu incekwakhe. Iye, loyo nina enamkhaphela bona abulawe, namlandula phambi koPilatu, ngitjho nanyana besele aqede ngokuthi uyamthukulula.

¹⁴ Nina nalandula oCwengileko noLungileko ngaphezu kwalokho nabawa bona nithukululelwe umbulali.

¹⁵ Nabulala umsunguli wepilo. Kodwana uZimu wamvusa kabafileko, ekuyinto esibofakazi bayo thina.

¹⁶ Ngokukholwa ebizweni lakhe, iye, ibizo lakhe ngokwalo, ngilo elenze umuntu lo waqina. Yena enimbonako nenimaziko lo; ukukholwa okuza ngoJesu, kumnikele ukuphiliswa okupheleleko lokhu njengombana nani noke nibona.

¹⁷ “Nje-ke bafowethu, ngiyazi bona nenza lokhu ngokungazi njengombana kwenza abaniphetheko.

¹⁸ Lokhu kuyindlela uZimu azalise ngayo lokho akumemezela ngaphambilini ngabo boke abaphorofidi bakhe bona uKrestu wakhe uzakuhlupheka.

¹⁹ Ngalokho tjhugulukani nibuyele kuZimu, khona kuzakusulwa izono zenu,

²⁰ ukuze isikhathi sokuvuselelwa sivele kuSomnini onithumelele uKrestu onguJesu amkhethela nina,

²¹ okufanele izulu limamukele bekufike isikhathi lapha uZimu enza khona zoke izinto butjha, njengombana athembisa ekadeni ngabaphorofidi bakhe abacwengileko.

²² NoMosi wathi, ‘USomnini uZimenu uzanivusela umphorofidi onjengami phakathi kwenu, kubafowenu. Nguye okufanele nimlalele.

²³ Nanyana ngubani ongeze alalele umphorofidi loyo, uzakujutjwa ebantwini bekhabo.’

²⁴ “Mbala boke abaphorofidi kusukela kuSamyela nabalandelako, nabo boke abakhulumako, bamemezela ngamalanga wanamhlanjesi.

²⁵ Nina niziinzukulwana zabaphorofidi nabesivumelwano uZimu asenza naboyihlo, njengombana wathi ku-Abrahamu, ‘Zoke iinkoro zephasi zizakukhanukela ukubusiswa njengeenzukulwana zakho.’

²⁶ Yeke lokha uZimu avusa incekwakhe, wayithumela kokuthoma kini kobana inibusise ngokunitjhugulula eendleleni zenu zobukhohlakali.”