IZENZO ZABAPOSTOLI 26 - IsiNdebele 2012 Translation

UPowula uzivikela phambi kwaka-Agripa

¹ U-Agripa wathi kuPowula: “Unalo ilungelo lokuzikhulumela.” UPowula waphakamisa isandla sakhe wathoma ukuzivikela wathi:

² “Kosi Agripa! Namhlanjesi ngizithatha njengomuntu onetjhudu bona ngibe nokuzivikela phambi kwakho ngazo zoke izinto amaJuda angithwesa umlandu ngazo,

³ khulukhulu ngombana wazi woke amasiko wamaJuda neempikiswano zawo. Yeke ngiyakubawa, bona ungilalele ngesineke.

⁴ “Woke amaJuda ayayazi ipilwami kusukela ngisemncani; iye, ipilo engayiphila kusukela ekuthomeni hlangana nabantu bekhethu nangeJerusalema.

⁵ Sekusikhathi eside bangazi begodu nabafuna ukufakaza bangatjho bona bengiphila njengelunga lesiqhema esiqinileko ekolweni yekhethu, ngiphila njengomFarisi.

⁶ Alo-ke manjesi ngijame lapha bona ngigwetjwe ngebanga lethemba lesithembiso uZimu asenza kibokhokho;

⁷ iye, isithembiso izizwe zekhethu ezilitjhumi nambili ebezithemba ukusifikelela, njengombana zilotjha imini nobusuku. Kungalo ithembeli, wena ohloniphekileko, ngimangalelwe maJuda!

⁸ Alo, kubangelwa yini bona nanyana ngubani wenu afunyane kulikhuni ukukholwa ukuthi uZimu uyabavusa abafileko na?

⁹ “Nami ngokwami ngikholisekile bona bekufanele ngenze okunengi okuphambene nebizo lakaJesu weNazaretha.

¹⁰ Kwakhona ngikho lokho engakwenza eJerusalema. Ngemvumo engayamukela ivela ebaphristini abakhulu ngaphosela abacwengileko abanengi ngesikhungweni. Kwathi nalokha agwetjwa intambo, nami ngakusekela lokho.

¹¹ Ngeenkhathi ezinengi ngibahlunguphazele ngemasinagogini, ngilinga ukubakatelela bona bahlambalaze. Bengifutheke khulu ngabo kangangobana bengibalandelela nakwamanye amadorobho wabatjhili.

¹² “Ngiso isizathweso esangenza bona ngiye eDamaseku ngegunya elivela ebaphristini abakhulu.

¹³ Kwathi emini ekulu ngisesendleleni, wena ohloniphekileko, ngabona umkhanyo omkhulu kunelanga uphazima, wangizombeleza nalabo ebengikhamba nabo.

¹⁴ Soke sawela phasi, ngezwa ilizwi lisithi kimi ngesiHebheru, ‘Sawula, Sawula, ungizumelani na? Kunzima kuwe ukurarha itlobo yesitlhorholojakomo.’

¹⁵ Ngabuza ngathi: ‘Ungubani, wena Kosi na?’ IKosi yathi: ‘NginguJesu, ozumana naye.

¹⁶ Nje-ke, sikima ujame ngeenyawo zakho. Ngibonakele kuwe ngebanga lokobana ngizokukhetha ube sisebenzi nofakazi ngezinto ozibonileko ngami nangalokho engizakutjengisa khona.

¹⁷ Ngizokuphephisa ebantwini bekhenu nakwabatjhili engikuthumela kibo

¹⁸ bona uvule amehlwabo khona bazakusuka ebumnyameni beze ekukhanyeni; basuke emandleni kaSathana beze kuZimu ukuze bamukele ukulitjalelwa kwezono, babe nesabelo phakathi kwabacwengisiweko ngokukholwa.’

¹⁹ “Ngalokho, kosi Agripa, akhange ngibe lihlongandlebe ngombono ovela ezulwini.

²⁰ Kodwana ngathoma ukumemezela kabaseDamaseku, kwaba seJerusalema nakiyo inarha yeJudiya ngitjho nakwabatjhili bonyana baphenduke ezonweni babuyele kuZimu, benze imisebenzi ekhambisana nokuphenduka.

²¹ Kungebangelo amaJuda angidzwebule ngethempelini alinge ukungibulala.

²² Kodwana uZimu ungisize bekwaba kunamhlanjesi, kungakho ngijame lapha ngifakaza kabancani nakabakhulu. Angikhulumi okhunye ngaphandle kwalokho abaphorofidi noMosi abakutjhwileko bona kuzokwenzeka:

²³ UKrestu kufuze ahlupheke, nokuthi njengombana angewokuthoma ukuvuka kabafileko, uzakumemezela ukukhanya ebantwini bekhethu nakabatjhili.”

²⁴ Kuthe uPowula asazivikela njalo, uFestusi wamrhuwelela wathi: “Powula, uyahlanya na! Ukufunda khulu kuyakuhlanyisa!”

²⁵ UPowula waphendula wathi: “Angihlanyi, mhlonipheki Festusi, kodwana ngikhuluma iqiniso ngokuzizwisisa!

²⁶ Eqinisweni ikosi u-Agripa iyazi ngeendabezi, kiyo ngikhuluma ngesibindi, ngokwazi bonyana ayikho neyodwa yezintwezi engizizwako kiyo ngombana izintwezi akhange zenzeke emsithelweni.

²⁷ Kosi Agripa, uyabakholwa abaphorofidi na? Ngiyazi bona uyabakholwa!”

²⁸ U-Agripa wathi kuPowula: “Ucabanga bona msinyana kangaka ungangiphendula umKrestu na?”

²⁹ UPowula wamphendula wathi: “Namkha kumsinyana nanyana kungasinjalo, ngithandaza kuZimu bonyana kungabi nguwe wedwa, kodwana nabo boke abalaleleko namhlanje, sengathi bangaba ngilokhu engingikho, ngaphandle kweenketanezi!”

³⁰ Yeke ikosi yasikima nombusi noBherinike kanye nabo boke ebebahlezi nayo.

³¹ Kuthe bona basuke lapho bathi komunye nomunye: “Umuntu lo akakenzi ilitho bona angabe abulawe namkha afakwe ngesikhungweni.”

³² Nje-ke u-Agripa wathi kuFestusi: “Umuntu lo ngawuthukululwe ingathana umlandwakhe akhange awudlulisele kumbusi omkhulu.”